Ka Haere Mai Anō te Ariki a Ihu Karaiti

E aku teina me aku tuāhine aroha, e whakawhetai ana ahau kua manaakitia ahau e te Ariki kia taea te kōrero atu ki a koutou.

I tēnei huinga whānui, kua kōrero mai te Ariki ki a tātou mā roto i Ana pononga. E akiaki ana ahau i a koutou kia rangahaua ā rātou kōrero. Meatia aua kōrero hei whakamātau i ngā mea e pono ana me ngā mea ehara i te pono i roto i ngā marama e ono e heke mai nei.

Kua tata rima tau te whakahaeretanga o ngā mahi tiaki me ngā mahi whakahou ki Temple Square me ērā atu wāhi anō hoki. E ai ki ngā whakapae i tēnei wā, ka oti aua mahi hei te mutunga o te tau 2026. Ka nui te mihi ki ngā tāngata katoa e mahi ana i tēnei mahi nui.

I roto i ngā marama e ono kua taha ake nei, kua whakatapua, ā, kua whakatapua tuaruatia ngā temepara kei ngā whenua e rima. Hei waenga i tēnei wā me te mutunga o te tau, ka whakatapua e tātou ngā mea e rima anō.

I tēnei rā, e koa ana te ngākau kia whakapuakina ake ngā mahere waihanga i ngā temepara 17 anō. Tēnā koa, kia āta whakarongo i ahau e whakapuaki ko hea.

• Juchitán de Zaragoza, Mexico

• Santa Ana, El Salvador

• Medellín, Colombia

• Santiago, Dominican Republic

• Puerto Montt, Chile

• Dublin, Ireland

• Milan, Italy

• Abuja, Nigeria

• Kampala, Uganda

• Maputo, Mozambique

• Coeur d’Alene, Idaho

• Queen Creek, Arizona

• El Paso, Texas

• Huntsville, Alabama

• Milwaukee, Wisconsin

• Summit, New Jersey

• Price, Utah

E aku teina me aku tuāhine, kei te kite ake koutou e aha ana i mua i ō tātou karu? E inoi ana ahau kia kaua e mahue i a tātou te ātaahua o tēnei wā! E tino whakateretere ana te Ariki i Ana mahi.

He aha tātou e hangahanga hohoro nei i ngā temepara? He aha ai? Nā te mea kua tohua tātou e te Ariki kia pēnei ai. Mā ngā manaakitanga o te temepara e āwhina ai i a tātou ki te whakahuihui i a Iharaira i ngā taha e rua o te ārai. Ka āwhinatia anō hoki ēnei manaakitanga kia whakaritea e tātou tētahi iwi e hiahia ana ki te whakarite i te ao mō te Haerenga Tuaruatanga Mai o te Ariki!

He pērā ki tā te poropiti a Īhāia i poropititia ai, ā, e rite ana ki te mea kua maharatia i tā Handel Messiah, ina hoki mai a Ihu Karaiti, “ka huraina mai te korōria o te Ariki, ā, ka kitea ngātahitia e ngā kikokiko katoa.”

Hei taua rā, “ka tau te kāwana ki runga ki tōna pokohiwi: ā, ko tōna ingoa e karangatia ake ai, arā, ko Mīharo, ko Kairūnanga, Te Atua kaha rawa, Te Matua ora tonu, Te Wheao o te Maungārongo.”

Ka whakahaere kāwana a Ihu Karaiti i Hiruhārama tawhito me te Hiruhārama Hou “e hangaia ake ai i te whenua o Amerika.” Mai i ēnei pito e rua, Māna ngā āhuatanga o Tana Hāhi e whakahaere.

Hei taua rā ka mōhiotia te Ariki ko te “Kīngi o ngā Kīngi, ā, ko te Ariki o ngā Ariki.” Ka karangatia te hunga i tana taha ko te “hunga kua karangatia, ā, te hunga kua kōwhiria, ā, te hunga whakapono.”

E ngā teina me ngā tuāhine, ko nāianei te wā mō koutou, mōku hoki, ki te whakarite mō te Haerenga Tuaruatanga Mai a tō tātou Ariki, ā, tō tātou Kaiwhakaora, a Ihu Karaiti. Ko nāianei te wā kia whakamatuahia tō tātou apatakitanga hei aronga mātāmua mō tātou. I tētahi ao e kikīa ana ki ngā kukumetanga rorirori, me pēhea tātou e pēnei ai?

Mā te haere putuputu ki te temepara e āwhina ai i a tātou. Hei roto i te whare o te Ariki, ka aro pūmau tātou ki a Ihu Karaiti. Ka ako tātou Mōna. Ka meatia e tātou ngā kawenata kia whai atu i a Ia. Ka mōhio haere tātou ki a Ia. I a tātou e pupuri ana i ō tātou kawenata temepara, ka nui atu tā tātou āheinga atu ki te rapu i te mana whakakaha o te Ariki. Kei roto i te temepara, ka tiakina tātou i ngā karawhiunga o te ao. Ka rangona nuitia e tātou te aroha poke kore o Ihu Karaiti me tō tātou Matua i te Rangi! Ka rongo tātou i te rangimārie, ā, ka whakaūngia te wairua, hei tauaro ki te tīkokitanga nui o te ao.

Koinei taku whakaari ki a koutou: Ka rapu ngā kaiaru pono katoa o Ihu Karaiti i a Ia i roto i te temepara. Ka rongo koutou i Tōna aroha. Ka rapua e koutou ngā whakautu ki ngā pātai uaua. Ka nui ake tō māramatanga ki te hari o Tana rongopai.

Kua ākona ahau, nā, ko te pātai matua me whakautu e tātou katoa, arā: Ka tukuna atu tōku oranga ki a wai, ki te aha rānei?

Ko taku kōwhiringa ki te whai atu i a Ihu Karaiti te kōwhiringa nui rawa kua meatia nei e ahau. I a ahau i te whare wānanga tākuta, i whiwhi au i tētahi whakaaturanga e pā ana ki te tapu o te Atua te Matua me Tana Tama, Ihu Karaiti. Mai i taua wā, ko tō tātou Kaiwhakaora te kāmaka kua hangaia ake nei e ahau tōku oranga ki runga. Kua rerekē tōku ao i tērā kōwhiringa! Nā taua kōwhiringa kua māmā rawa ake ētahi atu kōwhiringa. Nā taua kōwhiringa kua mōhio au ki tōku pūtake me te huarahi mōku. Nā konā taea e au ngā marangai o te oranga. Tukuna au ki a tohaina atu ngā tauira e rua:

Tuatahi, i te matenga ohorere o taku hoa wahine a Dantzel, kīhai i taea e au te whakapā atu ki tētahi o ā māua tamariki. I reira ahau, ko au anake, e karanga ana mō te āwhina. E whakawhetai ana te ngākau, mā roto i te Wairua, i whakaakona mai au e te Ariki he aha te take i kahakina atu taku tau a Dantzel ki te kāinga. I runga i taua māramatanga, i tau ai tōku ngākau. Nā wai rā, i kaha ake au ki te pīkau i tōku pōuritanga. Nō muri iho, ka mārena au ki taku tau, taku hoa wahine a Wendy. Koia tētahi wāhanga nui o taku tauira tuarua.

I a māua ko Wendy e mahi ana i tētahi whenua pāmamao, i hikina ake e ētahi kaipāhua tētahi pū ki tōku upoko kātahi ka kumea te keu. Engari kāore i pakū te pū. I roto i taua āhuatanga, i mōrearea rawa atu mō ō māua oranga. Engari i rongo māua ko Wendy i tētahi wairua rangimārie kaha. Koia te rangimārie “kei tua atu i ngā māramatanga katoa.”

E aku teina me aku tuāhine, ka whakaāiotia koutou anō hoki e te Ariki. Māna koutou e whakakaha. Māna koutou e manaaki ki te rangimārie, kei roto pū anō i ngā tutūnga puehu.

Tēnā kia whakarongo ki te whakaari o Ihu Karaiti ki a koutou: “Māku kei tō ringa matau me tō mauī, ā, kei roto tōku Wairua i ō koutou ngākau, ā, ka karapotia e āku anahera, hei pīkauria ake koutou.”

Kāore he mutunga ki ngā mea e taea ana e te Kaiwhakaora hei āwhina i a koutou. Mōu Tana whakamamaetanga nui whakaharahara i Kehemani me Kāwari! Mōu Tana Whakamārietanga mutunga kore!

E akiaki ana ahau kia rāhui ai ētahi wā i ia wiki—mō te roanga atu o ō koutou oranga—kia whakawhānui ake i tō māramatanga e pā ana ki te Whakamārietanga o Ihu Karaiti. E mamae ana te ngākau mō te hunga e oru ana i te hara, ā, kāore e mōhio ana me pēhea e puta ai. E tangi ana ahau mō te hunga e raruraru ā-wairua ana, e waha ana rānei i ngā pīkauranga taumaha ko rātou anake i te mea kāore rātou e mōhio ana ki tā Ihu Karaiti mō rātou.

I tangohia ake e Ihu Karaiti ki runga ki a Ia anō ō koutou hara, ō koutou mamae, ō koutou auhi, me ō koutou ngoikoretanga. Ehara i te mea me waha koe i aua mea ko koe anake! Māna koe e muru i a koe e rīpenetā ana. Māna koe e manaaki ki ngā mea e tika ana māu. Māna tō wairua mamae e mahu. I a koe e piri ki a Ia, ka māmā ake ō pīkauranga. Mehemea ka meatia, ka puritia hoki e koe ngā kawenata ki te whai i a Ihu Karaiti, ka kite koe, nā, he poto ngā wā mamae i tō oranga. Ka “horomia ake i roto i te koa o te Karaiti” ō whakamamaetanga.

Ehara i te mea he moata rawa, he tōmuri rawa rānei mōu kia meinga hei apataki ū nā Ihu Karaiti. Kātahi ka rangona rawatia e koe te raneatanga o ngā manaakitanga o Tana Whakamārietanga. Ka kaha ake koe ki te whakahuihui i a Iharaira.

E aku teina me aku tuāhine, hei tētahi rā e kainamu mai ana, ka hoki mai a Ihu Karaiti ki te ao hei Mīhaia manonga tau. Nō reira, i tēnei rā, e karanga ake ana ahau ki a koutou kia whakatapuria tuaruatia ō koutou oranga ki a Ihu Karaiti. E karangatia ana koutou e au kia āwhina ki te whakahuihui i a Iharaira kua whakamararatia atu nei me te whakarite i te ao mō te Haerenga Tuaruatanga Mai o te Ariki. E karangatia ana koutou kia kōrero mō te Karaiti, kia whakaaturia mō te Karaiti, kia whakapono ki te Karaiti me te hari i te Karaiti!

Haere mai ki te Karaiti me te “tāpae i tō [wairua] katoa” ki a Ia. Koinei te kura huna mō tētahi oranga koa!

Kāore anō kia puta mai ngā mea pai rawa ake, e aku teina me aku tuāhine, i te mea ka haere mai anō te Kaiwhakaora! Kāore anō kia puta mai ngā mea pai rawa ake, i te mea kei te whakateretere te Ariki i Tana mahi. Ka puta mai ngā mea pai rawa ake ina huri katoa ō tātou ngākau me ō tātou oranga ki a Ihu Karaiti.

E whakaatu pono ana ahau, nā, ko Ihu Karaiti te Tama a te Atua. Ko au Tana apataki. He hōnore mōku kia mahi hei pononga Māna. Hei Tana Haerenga Tuaruatanga Mai, “ka huraina mai te korōria o te Ariki, ā, ka kitea ngātahitia e te kikokiko katoa.” Ka kikī taua rā i te koa mō te hunga tika!

Mā roto i te mana o ngā kī tapu o te tohungatanga e puritia nei e ahau, e whakapuaki atu au i tēnei pono ki a koutou, ā, ki te ao hoki! I runga i te ingoa o Ihu Karaiti, āmine.