He Ngāwari te Whakaakoranga a Ihu Karaiti

He whānau katoa ō tātou e arohaina nuitia ana e tātou, nā, e whakawaia ana, ā, e whakamātauria ana e ngā hau kaha o Hātana, te kaiwhakangaro, māna ngā tamariki katoa a te Atua e kukume kia pōuri. Mō te nuinga o tātou, he maha ngā pō moe kore. Kua ngana tātou ki te karapoti i ngā tāngata e raruraru ana ki ngā āhuatanga pai katoa. Kua tuku inoi ake tātou mō rātou. Kua arohaina rātou. Kua whakatauirahia te āhuatanga pai i taea ai e tātou.

I pā mai ngā uauatanga taurite ki a Arami, tētahi poropiti onamata. I kaha whakaekea te iwi i arohaina ai, ā, i ārahina ai e ia e tētahi hoariri horetītī, heoi, ahakoa tērā i te kaha ngana nui tonu rātou ki te whakatipu i ngā tamariki pai i roto i tētahi ao whakarihariha. I whakaaro ake a Arami ko te huarahi anake hei wikitōria, ko tētahi huarahi kāore e tino whaia ana e tātou i te nuinga o te wā. Nāna i inoi ki te Atua hei āwhina.

I mōhio a Arami, nā, e tika ana kia rīpenetātia e te iwi nāna nei i ārahi, e ngā hoariri anō hoki ki te hia āwhina mai te Atua. Pēnei, ka whai atu ia i tētahi atu huarahi kē atu i te pakanga.

E whakamāramahia pēneitia ana e te Pukapuka a Moromona: “Ināianei ā, i te mea he kaha nui tō te kauhautanga i te kupu ki te ārahi i te iwi ki te mahi i ngā mea e tika ana—āe rā, i nui noa atu tōna kaha ki runga i ngā hinengaro o te iwi i tō te hoari, i tō tētahi atu mea rānei, kua meatia ki a rātou—nō reira whakaaro ake a Arami e tika pū ana kia whakamātauhia e rātou te tapatahi o te kupu a te Atua.”

Ko te kupu a te Atua te whakaakoranga i whakaakona ai e Ihu Karaiti, ā, e Ana poropiti. I mōhio a Arami he nui te mana kei roto i ngā kupu whakaakoranga.

I roto i te wāhanga 18 o te Whakaakoranga me ngā Kawenata, i huraina mai e te Ariki te tūāpapa o Tana whakaakoranga:

“Nā te mea, nana, e whakahau ana ahau ki ngā tāngata katoa kei ngā wāhi katoa kia rīpenetā. …

“Nā te mea, nana, i pāngia te Ariki tō koutou Kaihoko e te mate i roto i te kikokiko; nā reira i whakamamaetia ia ki ngā mamae o ngā tāngata katoa, kia taea ai e ngā tāngata katoa te rīpenetā, ā, kia haere mai ai ki a ia.

“Ā, kua ara ake anō ia i te mate, kia kukume mai ki ngā tāngata katoa ki a ia, i runga i ngā here o te rīpenetātanga.”

“Ā, ka hinga iho koutou, ā, ka koropiko ki te Matua i runga i tōku ingoa.

“… Me rīpenetā koutou, ā, me rumaki, i runga i te ingoa o Ihu Karaiti.”

“Inoia te Matua i runga i tōku ingoa i runga i te whakapono, e whakapono ana tērā ka whiwhi koutou, ā, ka whiwhi koutou i te Wairua Tapu.”

“Ināianei ā, whai muri … i tō koutou whiwhi i tēnei, me pupuri i aku whakahaunga i roto i ngā mea katoa.”

“Tangohia ki runga ki a koutou te ingoa o te Karaiti, me te kōrero i ngā mea pono i runga i te whakaaro nui.

“Ā, ko te hunga katoa e rīpenetā ai, ā, e rumaki ai i runga i tōku ingoa, koia ko Ihu Karaiti, me te ū ki te mutunga, ko rātou te hunga e whakaorangia ai.”

I roto i aua rerenga whiti ruarua, e homai ana e te Kaiwhakaora tētahi tauira tika rawa ki a tātou e mōhio ai me pēhea tātou e whakaako i Tana whakaakoranga. Ko tēnei whakaakoranga, koia, mā te whakapono ki te Ariki a Ihu Karaiti, te rīpenetātanga, te rumakitanga, te whiwhi i te takoha o te Wairua Tapu, me te ū ki te mutunga e manaakitia ai ngā tamariki katoa a te Atua.

I a tātou e whakaako ana i ēnei tikanga ki te hunga e tata ana ki a tātou, ka āwhinatia tātou e te Wairua Tapu kia mōhio ai tātou ki ngā mea pono. I te mea me rongo tātou i ngā kukumetanga a te Wairua Tapu, me karo e tātou te whakapae, te whakatau mōhio kore rānei e tāpiri ake ana i ō ake whakaaro, kāore e ū ana ki te whakaakoranga tūturu.

Ka uaua tēnā ina nui tō aroha ki te tangata e ngana nei koe ki te kukume mai. Tērā pea kāore ia i aro ki te whakaakoranga i whakaakona ai. He nui te whakawai kia mahia tētahi mahi hou, tētahi mahi mīharo rānei. Engari ka huraina mai e te Wairua Tapu te wairua o te pono i ngā wā anake e āta tūpato ana tātou kia kaua e whakaako i ngā mea i tua atu i te whakaakoranga pono. Ko tētahi o ngā huarahi tino pai kia kaua e pātata atu ki ngā whakaakoranga teka, arā, ko tāu whakaako i runga i te ngāwari. Ka whakaruruhautia e te ngāwari, ā, kāore e tamō atu tētahi mea.

Mā te whakaako ngāwari e taea ai te tuku i te whakaakoranga whakaora i ngā wā tōmua, i ngā tamariki e urutapu tonu ana kāore anō kia pākia e ngā whakawai a te mea tinihanga e wero ai ki a rātou, i mua noa atu i te waipuketanga iho o ngā mea pono e tika ana kia akona rātou, ā, ka waipuketia aua mea e te hoihoi o ngā kukumetanga nui o te waea pūkoro, ngā hoa, me ō rātou ake uauatanga e pā ai ki a rātou. Me mau ki ngā huarahi katoa e puare ake ki a tātou hei toha atu i ngā whakaakoranga a Ihu Karaiti ki ngā tamariki. He taonga ēnei wā e taea ana te whakaako, he ruarua noa ēnei i ngā wā e kaha karawhiua ana rātou e ngā hau kaha o te hoariri. Nā, hei ia te hāora e whakatō ana i te whakaakoranga ki roto i te tamaiti, he maha noa atu ngā hāora e karawhiu ana ki ngā karere, ngā whakaahua e werowero mai nei, e kore rānei e aro ki ngā mea pono e whakaora ai i a tātou.

Ka whakaaro ake ētahi o koutou tērā pea he pai ake te whakatata mai i ā koutou tamariki ki a koutou mā te mahi pārekareka, ka whakaaro ake rānei mehemea ka taumaha tō tamaiti i āu whakaakoranga. Mahue tērā, me whakaaro pēnei kē tātou, “I te mea he poto rawa te wā, ā, he iti noa ngā huarahi hei kōwhiri, he aha ngā kupu whakaakoranga e tika ana kia tohaina atu ai ki a rātou hei whakakaha i a rātou ki ngā wero e karawhiua mai ai ki tō rātou whakapono?” Tērā pea ka mau tonu atu i a rātou ngā kupu e tohaina atu ai e koe ki a rātou i tēnei rā, ā, ākuanei pahure atu ai te rā nei.

He nui taku hōnore ki tōku tupuna kuia a Mary Bommeli me tana ū ki te tohatoha atu i te whakaakoranga a Ihu Karaiti. I ākona tana whānau e ngā mihingare i Switzerland i te wā e 24 tōna pakeke.

Whai muri iho i tana rumakitanga, i te hiahia a Mary kia hono atu ki ngā Hunga Tapu i Amerika, nā konā, ka haere atu ia i Switzerland ki Berlin kātahi ka rapu mahi i te taha o tētahi wahine nāna nei ia i utu kia tuitui kākahu mō tōna whānau. I noho a Mary i roto i tētahi whare pononga, ā, ka whakatūria tana mea tuitui i roto i te ruma whānau o te kāinga rā.

I taua wā, kāore i whakaae te ture o Berlin kia whakaakona ai te whakaakoranga o Te Hāhi o Ihu Karaiti o te Hunga Tapu i ngā Rā o Muri Nei. Engari tē taea e Mary te kopi i tōna māngai i tana tohanga atu i ngā mea i akona ai ia. Ka huihui tahi te wahine nōna taua whare rātou ko ōna hoa taiāwhio noa i te mea tuitui ki te whakarongo ki a Mary e whakaako ana. I kōrero ia e pā ana ki te putanga mai o te Matua i te Rangi rāua ko Ihu Karaiti ki a Hōhepa Mete, te toronga mai o ngā anahera, me te Pukapuka a Moromona. Nā runga i tana maumahara ki ngā kōrero a Arami, i whakaako ia e pā ana ki te whakaakoranga o te Aranga. I whakaaturia e ia e pā ana ki te whakakotahitanga mai anō o ngā whānau i te kīngitanga o Tikitiki o Rangi.

Ka tutū te puehu nō muri tata iho nā te hīkaka o Mary ki te toha atu i te whakaakoranga o te rongopai kua whakahoki mai nei. Kāore i roa ka mauherea atu a Mary e ngā pirihimana ki te whare herehere. I a rātou e haria atua ana ia ki reira, ka ui atu ia ki te pirihimana ko wai te ingoa o te kaiwhakawā e tū atu ai ia āpōpō. I ui atu anō ia e pā ana ki tōna whānau, mehemea he matua pai ia, he hoa tāne pai anō hoki. I whakamāramahia mai e te pirihimana rā he tangata nō te ao taua kaiwhakawā.

I a ia e noho ana i te whare herehere, ka tono a Mary kia haria mai he pene rākau me ētahi pepa. Ka pau te pō i tana tuhi reta ki te kaiwhakawā, e tuku whakaaturanga e pā ana ki te Aranga o Ihu Karaiti e rite ana ki tā te Pukapuka a Moromona, e kōrero ana mō te ao wairua, ā, e whakamāramahia ana te rīpenetātanga. I kī atu ia, nā, me whai wā anō te kaiwhakawā rā kia huri ōna whakaaro ki tōna oranga i mua i tana whakawākanga whakamutunga. I tuhi atu a Mary, nā, i mōhio ia he nui ngā mea hei rīpenetātanga mō taua kaiwhakawā rā, ngā mea nui mā konā pōuri rawa tōna whānau, ā, mā konā heke iho ai ia ki roto i te pōuritanga nui. Ao ake te ata, i te wā i whakakōpanitia e ia tana reta, i hoatu e ia ki te pirihimana kātahi ka tonoa atu ia kia haria atu ki te kaiwhakawā, ā, ka pērātia e te pirihimana nei.

Nā wai rā, ka tonoa taua pirihimana e te kaiwhakawā kia haere ki tōna tari. He taunaki nui tā Mary reta nāna nei i tuhi e mōhio ai kei te whakaako ia i te whakaakoranga o te rongopai kua whakahokia mai nei, nā konā, kua whatia te ture. Heoi anō, kāore i roa i mua i te hokinga mai a te pirihimana ki a Mary. Ka kī atu te pirihimana ki a Mary, nā, kua makere iho ngā hāmene katoa, ā, kua wātea ia kia haere. Nā ana whakaako i te whakaakoranga o te rongopai a Ihu Karaiti kua whakahoki mai nei i makaia ai ia ki roto ki te whare herehere. Ā, nā tana whakapuaki i te whakaakoranga o te rīpenetātanga ki te kaiwhakawā i makaia atu ai ia ki waho i te whare herehere.

Kīhai i mutu noa tā Mary Bommeli whakaako i tana whakawāteatanga atu. Kua heke iho ngā tuhinga o ana kupu whakaakoranga pono ki ngā reanga kāore anō kia whānau mai. Nā tana whakapono, e mea ana, e taea ana e te tangata kātahi anō ka uru mai ki te Hāhi te whakaako i te whakaakoranga a Ihu Karaiti, nā konei whakaū ai i roto i ōna uri, nā, i whakakahangia ai rātou i roto i ō rātou ake pakanga.

I a tātou e whakapau kaha ana ki te whakaako i ō tātou whānau e pā ana ki te whakaakoranga a Ihu Karaiti, tērā pea kāore tonu ētahi e aro mai. Ka kuhu pea ngā whakaaro rangirua ki roto i tō hinengaro. Ka ui ake pea koe mehemea kei te tino mōhio rānei koe ki te whakaakoranga a te Kaiwhakaora e pai ai tō whakaako atu. Ā, mehemea kua ngana kē atu koe ki te whakaako atu, tērā pea kei te whakaaro ake he aha e kore ai e taea te kite atu i ngā hua. Kaua e tuohu ki ngā whakaaro rangirua. Me huri ki te Atua hei āwhina.

“Āe rā, me karanga ake ki te Atua hei tautoko katoa i a koe; … tukua ngā kare o tō ngākau kia ū atu ai ki te Ariki mō āke tonu atu.”

“Ināianei ā e hiahia ana ahau kia whakaiti koutou, ā, kia ngāwari, ā, kia hūmārie; e kaha ana ki te whakarongo; e kikī ana i te manawanui me te manawaroa; e ngāwari ana i roto i ngā mea katoa; e ū ana ki te pupuri i ngā whakahaunga a te Atua i ngā wā katoa; e inoi ake ana koe mō ngā mea e hapa ana, ngā mea ā-wairua me ngā mea ā-tinana; e tuku whakamoemiti ana ki te Atua i ngā wā katoa nō ngā mea kua whiwhi nei koe.”

Ki te inoi koe, ki te kōrero koe ki te Atua, ā, ki te inoi koe mō Tana āwhina ki tō whānau, ā, ki te tuku whakawhetai koe ki a Ia ehara noa i te mea mō te āwhina engari mō te manawanui me te ngāwaritanga e ahu mai ana i te korenga o te whiwhi ki ngā mea katoa e kōingo nei koe i taua wā tonu, e kore rawa rānei pea e whiwhi, nā, kei te whakaari ahau ki a koe ka whakatata atu ki a Ia. Ka meinga koe hei mea ū tonu, ā, hei mea manawanui. Kātahi ka taea e koe te mōhio, nā, kua mahia tāu katoa e taea ai ki te āwhina i tō whānau me te hunga e inoia ana e koe kia āta haere i roto i ngā whakawainga a Hātana i tana whakapau kaha ki te whakakōtiti i a rātou.

“Engari ka whakahoungia te kaha o te hunga e whanga nei ki te Ariki; ka kake ake anō nei ngā parirau o te kārearea; ka oma rātou, ā, e kore e ngenge; ā, ka hīkoi rātou, ā, e kore e hemo.”

Ka rapu tūmanako koe i roto i ngā tuhinga karaipiture o ngā whānau. E pānui ana tātou e pā ana ki te hunga i tahuri atu i ngā mea i whakaakona ai rātou, te hunga e nonoke ana ki te Atua kia murua ō rātou hara, pērā i a Arami te Tamaiti, ngā tama a Mōhia, rātou ko Īnohi. I ngā wā i aituā ai rātou, i mahara rātou ki ngā kupu a ō rātou mātua, ngā kupu whakaakoranga a Ihu Karaiti. Nā te maumahara rātou i whakaorangia ai. Ka maumaharatia tō whakaako i taua whakaakoranga tapu.

E whakaaturia ana e ahau e pā ana ki te mahi tapu o te whakaako ki ngā tamariki a te Matua i te Rangi te whakaakoranga ngāwari o Ihu Karaiti, mā konā taea ai tātou kia horoia ā-wairua, ā, hei te mutunga, kia pōhiritia ki te aroaro o te Atua, kia noho tahi ki a Rāua ko Tana Tama i roto korōria mō āke tonu atu i roto i ngā whānau. I runga i te ingoa o Ihu Karaiti, āmine.