Pwuhk Sarawi Kan—Poahson en Pwoson

Me kerente, ngehi oh ai pwoudo, Mary, kilangada singiles ehu me kilelen pwuhk ehu mih ie oh nting kei mwohn sehto me nda, “Books: The Original Handheld Device.”

I medewe duen lepin mahsen kesempwal pwukat oh duen kesempwalahn soangoasoangen dipwisoun nanpeh kan. Ni ai wie medemedewe, I diarada me dipwisoun nanpeh koaros lella me pein prokramdier pahn sohte kak kesempwal sang de katapan sang kaweid en pali ngehn me kin alahldi sang ni kaudiahl.

Sohte lilpilipil me mih nan peh de kilel, Puhk Sarawi oh Pwuhk en Mormon: Pil Ehu Kadehde Pen Sises Krais kin kasalehda kaweid en pali ngehn oh padahk sang Sises Krais, Sounkomour en sampaho. Kitail kin kesempwalki pwuhk pwukat pwehki ahr audaudki Sapwellimen Koht kaweid ong soukohp oh aramas en mahsoko oh kaweid me re kiheng emen emen kitail nan atail mour.

Me patehng padahk en soukohp ieias akan, pwuhk sarawi pwukat kin kiheng kitail kaweid mehlel ong kitail nan rahn pwukat. Pwuhk sarawi pwukat kin keioun idipek ni arail kin kaweid, kapwung, kansenamwahuih emen emen aramas oh peneinei kan me kin rapahki kaweid sang rehn Kauno.

Pwuhk sarawi pwukat, patehng kaweid en pali ngehn me sang Ngehn Sarawio, kin wiewiahte dipwisoun doadoahk keioun kesempal me kin elehda weliakapwala en irail akan me ahneki mohngiong karakarahk oh ngehn peik oh inengieng en idawehn Sises Krais. Pwuhk sarawi kan kin sowese kawada poahson me kak pelian imwintihtio ah kin nantiheng kaluetehla atail pwoson.

Irail akan me kin apwetehn wiliakapwala kin kapaiada oh kin kakehlailih Mwomwohdisoht sangete mahso lel met. Mie ehu karasaras me I kin inenen kesempwalki. Ni ansou me I wia pisop pwulopwul men, serepein misineri mwahu riemen wie padapadahkih William Edward Mussman oh ah peneinei tikitik. Pahpau, lawyer koahiek men, me wia kaun emen nan kompani laud ehu. Ah pwoudo, lih mwahu men, Janet, kin nanantiheng pwe mour en ara peneinei tikitik en kin duduehla an Krais mour.

Neira pwutak men oh serepein men pil koaros mwahu, ira koaros sounpar rieisek samwa ansouo, pil iang ale ale padahk. Irail meh pahmeno koaros alehier padahk kan oh kin iang kokohla sarawi. Serepein misineri ko padahkiheng irail kesempwalpen arail pahn wadek Pwuhk en Mormon oh kapakapki pwe irail en alehdi arail kadehdepen pwuhk sarawio. Me kapwuriamweio, peneineio kapakapki oh wadekala Pwuhk en Mormono nan ansouteh kis.

Stake misineri ko, ira koaros me iangehr wia presiden en Pwihn en Lih kan, kin iangih irail kohla sarawi.

Ni ansou me peneineio kereniengehr pahn pepdaisla, irail alehdi diren kisin pwuhk kei me kin kawe Mwomwohdisoht. Met mohn interned ah mie, apw kisin pwuhk ko audehda lapalahn kakon ehu.

Serepein misineri ko luke ie ni ai wia pisop kapw men me sounpar 34[silihsek-pahieu] ien sowese ira oh sapeng arail peidek kan. Ni aht mohdpene nan arail perehn komolo, lapalahn kakon en doarepwe kei me kin kawe Mwomwohdisowet mih nan werengen pereo. I kapakapki mwomwen ahi pahn kohla sowese irailo. Ni ansou me kapakap en ritingadao wiewiawi, Ngehno apw mwoangininging ong ie, “E esehier me e mehlel.” E kesempwal met. Serepein misineriko kamehlele me liho oh serihko alehdier arail kadehde. Re sohte nohn ese ma arail pahpao pil alehdier ah kadehde.

I mwadangete ndahieng me Ngehno sairekiniehier me miehier ah kadehde. “E mehlel mwo?” E kilengdohngie oh kakiliehdi, oh nda me Ngehno kadehdehiengehr ih duen mehlel en Pwuhk en Mormon oh Mwomwohdiso wet.

Ngehi eri uhd idek rehrail ma se anahnehte kilang audepen pwuhko, ma irail alehdier kadehde sang Ngehno?

Pahpao sapengkinie me e pahn sohte anahnepe. Arail peneineiko pil kasalehda me irail utung ah pasapengo.

E nda me mie ah peidek laud ehu: Ehu kahrepen arail alehdi diren kisin doarepwe kan me uheng Mwomwohdisoht iei pwehki irail tohn ehu pelien lamalam tohror. Pwe pil patehng mwo, e inoukihda me e pahn sawaskihda woahn sent laud ehu ong kokouda en imwen sarawi ong pelien lamalamo. E ndahiengie me serepein misineri ko padahkiheng duen kesempwalpen meirong en eisek kis ehu, me e kalanganki oh pahn kapwaiada, apw e medemedewe ma e pil kak kapwaiadahte sawas me e inoukiheng irailehro. I ndahieng me ah pahn painla sent me e inoukiheng irailo pahn wia mehkot me waun oh konehng.

Peneineio pwon pepdaisla. Mwurin sounpar ehu irail apw katengteng pene nan California Oakland Temple. I paiekihla ai kak iang mih mwo. Neira pwutangko kanekehla sukuhl en pelien kosonned, pweida nan skeng en pelien kossonned en California, oh mwadangete wia ah papah nan Sapahn. I kin kilekilang nan pahr akan kohdo kadudokerail akan arail kin memehleliengete rongamwahuo. I pil paiekihla ai pil kak wia doadoahk en katengeteng pene ong emen nein neira serihko.

Weliakapwala me wiewiawi nan rahn pwukat pil duwehte mwo me kesempwal. Nan Suhn samwalahro, Coach Andy Reid, kaun en Coach ong Kansas City Chiefs, oh Ngehi, oh pil iangahki meh kei me weliandi pelien lamamalam wet oh pil pelien lamalam teikan, wia kaparek nan kapokon en pelien lamalam kei nan Imwen Sarawi en Riverside nan New York City. Coach Reid kasalehda kesempwalpen aramas kin pwurehng song wia mehkot de kamwahuiala mehkot oh alehda luhk kan, me iei kahrepen rongamwahu en Sises Krais. Nimenseng en rahn en mwurio, kiht oh aht pwoudko, Tammy Reid oh Mary, kohla iang kamadipw sarawi ni Keriau en Ward en Manhatten. I innen kehn Ngehno nan sarawio. Diren me apwetehn weliakapwala nan pokono. Memper me apwetehn pepdaisla meh limmen, ohl pahmen oh emen mwahnakapw, me iang pwihn en Aaronik Prihsduhd oh pahs kamadipw sarawio. I perenikihda oh men pakairki me soangen diren memper kapw pwukat wiwiawi nan Mwomwohdiso wet.

Kitail kin kalahnganki woahnn tohtohla me sansal en irail akan me kin sapeng luhk sarawi kan, wekidala arail mour, kasamwohieng nan arail mour elen idawehn Sises Krais. Irail kin pidelong nan elen inou sang ni arail kin pwoson, koluhla, pepdaisla, oh alehdi kasarawi ni duen me Pwuhk Sarawi oh Pwuhk en Mormon padahngki.

Kitail en dehr katikala kesempwal en pwuhk sarawi kan ong atail kin weliakapwala oh kehkehlail nan rongamwahuo. Soukohp en mahs akan me sansalehr nan Pwuhk en Mormon wehwehki kahrepen Sapwellimen Sises Krais doadoahk oh kin padahngki Sapwellime rongamwahuo. Pwuhk en Mormono kin sowesei kitail en karaniala Koht ni atail pahn kin onopki, wehwehkihla, oh doadoahngki Sapwelime padahk kan. Soukohp Joseph Smith padahngki me, “ohl emen [de lih emen] pahn karaniala Koht sang ni ahr pahn momouriki padahk en kosonned akan me mih nan [pwuhko], sang pwuhk teikan.”

Ma kitail men ese me Pwuhk en Mormon iei mahsen en Koht, kitail anahne wadek, medemedewe, oh kapakapki oh momourki padahk oh kosonned kan me mih loale. Soukohp Moroni inouki me Koht pahn ketin kasalehieng kitail mehlel en pwuhk wet ni atail pahn kapakapki ni mohngiong mwahu, ineng mehlel, oh pwoson Krais. Onohnopki Pwuhk en Mormon wia mehkot kesempwal ohng weliakapwala me pahn poatoapoat.

Ni atail pahn medewe duen ehupenehn Paipel oh Pwuhk en Mormon dipwisoun nanpeh, kitail kakkete peidek wet. Ia woahn katapan oh mwahu ma ke song medewe pwuhk riau pwukat pahn wia ma Kauno mahsanih me ira pahn patpene oh “wiahla ehu”? Ih met me Kauno ketin mahsanih me pid “lepin dinapw en Suda,” Paipel, oh ”lepin dinapw en Sohsep,” Pwuhk en Mormon.

Nan pali kesempwal kei, Pwuhk en Mormon kin kihda poahson en padahk me kin kakehlaka oh pil kokouda pohn Paipel. Padahkpen Sapwellimen Sises Krais Tomwo wia ehu karasaras me lap.

Paipelo kihda koasoaiepen sapwellimen Sises Krais doadoahk nin sampah me pwung, pil iangahki Sapwellime pwoula oh Iasadao. Pwuken Mormono kosoia laud duen kawehwepen sapwellimen Sises Krais Tomwo, mehkot ehu me souhkohpko kawehwehdi mwahu mwohn Sapwellime iwpidio.

Oaralap en iralaud 42[paisek-riau] en Alma kasalehda kesempwalpen padahkpen sapwellimen Sises Krais Tomwo.

E kosoia: “Nan mour wet iei ahnsou en songosong me mweidohng aramas en kak koluhla oh papah Koht—Pwupwudio kahrehda mehlahn paliwar oh palingehn ong aramas koaros—Koluhla me kahrehiong aramas kak komourla—Koht pein tomwkihla dipen sampah—Kupwurkalahngan pahn kohieng irail akan me pahn koluhla—Koaros me pahn luhwehdi pahn mihla pahn manaman en sapwellimen Koht pwuhng—Mie kupwurkalahngan pwehki Tomwo—Ihte irail me koluhla mehlel me pahn komourla.”

President Russel M. Nelson ketin patohwan, “I inoukiheng kumwail me ni amwail pahn kapakap oh onopiki Pwuhk en Mormon rahn koaros kumwail pahn kak wiahda pilipil mwahu kan—rahn koaros.” E pil inoukihda me ma “kumwail pahn duhla nan Pwuhk en Mormon rahn koaros kumwail pahn kak silasildi sang me sued akan en rahno.”

Ni duen ai patowanehro, I perenikihda madamadau me nda tepin dipwisoun nanpeh—pwuhk ehu. Apw, I ese uen internet ah inenen kesempwal pohn sampah nan rahn pwukat. Ehu dipwisoun nanpeh kak kolokol uen audepeh kei me mahs kin audehla ehu laiprehri me laud. Kitail kin kapingki atail momour nan soangen ansou wet. Ni mehlel I kalahnganki pwehki pwuhk sarawi kan oh en mwomwohdiso wet dipwisou teikan ah pil kakehr mie nan interned. Interned wia dipwisou kesempwal ong atail kin onopki rongamwahuol. Rahn pwukat, diren aramas kin doadoahngki dipwisou pwukat ehukiheng iengerail kan iren pwuhk sarawi kan. App enPwuken Mormono, pwe en wia mehn karasepe, iei ehu wiepe kaselel me kitail kak doadoahngki oh ehukiheng iengetail kan Pwuhk en Mormon ni mwomw ehu me pahn mengei oh sohte kasoakoahiek.

Ni interned ah kin kihda soangen kapai tohto, ni mehlel, duwehte kisin pwuhk me kin kawe mwomwohdiso wet ko me I koasoaiahdau, aramas pil kin doadoahngki pwe en ahneki soulikilik oh katikala atail kin koapwoaroapwoarki poasoan en padahk kesempwal akan en rongamwahuo. E kin kak wia kisehn “me sued akan en ehu ehu rahn” me Presiden Nelson kasaledahro.

Imwintihtio oh irail akan me kin sowese ih, mwein re ese de re sehse, apw re wiahdahr nan interned mehkot me duwehte kakon me i koasoaiahda me direkihla pwuhk me kin kawe Mwomwohdiso wet, oh ih kahrepehn en kahluwa kumwail sang sapwellimen Koht padahk mehlel kan.

Irehkan me kin kohda pwe en kahrehda soulikilik nan pahr akan kohkohdo kin duepenehte. Met udahn mehlel ma ke pahn karasahieng rahnpwukat nan pahr 1960[kid-duwepwiki-weneisek] samwa ko, ni ansou me I sounpar 20[rieisek] samwa.

Pwuhk sarawi kan padahkiheng kitail kitail en kasawih mwahu oh doadoahngki eripit nan soahng koaros. Kitail kak doadoahngki internet ong me mwahu kan oh e pil kak wia kaupetail.

Koaros towe me wereilahr akan oh me kapwieng onohnopki rongamwahuo, kitail koaros anahne kitail en dehr soulipilipki dahme kitail pahn kin kilang. Dehr rong, wedek, de kilang mehkot me samin, likamw, de suwed. Ma ke pahn wia met, prokrahm en nan interned kan kak kahluwaiuk ong nan ahl me pahn kawehla amw pwoson oh kaluwetiala amw keirda soutuk. Kumwail kak idawehn me mwahu oh kumwail pil kak idawehn me suwed. Rapahki me mwahu kan oh kadohwansanguhk mehn sued akan en nan interned. Audehki nan amw mour madamadaw me mwahu oh sarawi, ahneki pophl, oh iang peren dehr kieng uhk mehkot sohte mwahu. Ira wekpeseng. keisek-siluh en iren pwoson akan wia mehn kawied kaselel. Me keioun kesempwal, kumwail en kin poad en kaduh kumwaildieng nan Pwuhk en Mormon, me pahn kihdohng Ngehno nan amwail mour oh sowese iuk ken kak kasawiada mehlelo sang me sapwungo.

Ai kaweid ong kumwail kan me, ni mwohmw ehu, pwupwisang nan elen inouo iei kumwail en pwuralang nan pwuhk sarawi kan, idawehn kaweid sang powe, mowmourki rongamwahuo nan imwamwail kan, oh rong koul en sarawi. Aramas koaros kesempwal rehn Kauno. Se anahnei kumwail!! Kauno anahne kumwail, oh kumwail anahne Ih! Ansou koaros se pahn kasamwo kumwail. Nan erein pahr tohto me I wie papahkiher nan Mwomwohdiso wet, I kin inenen kesempwalki aramas mwahu kan me pwurodohng nan elen inuo oh kapaiada arail peneinei oh koaros me irail kin tuhweng.

Pwuhk sarawi kan oh soukohp ieias akan iei wiepe lap kei me Sahm Nanleng kin ketin doadoahngki pwe En kak kalelehwehng Sapwellime seri kan Sapwellime pilahn en popohl.

I ehukiheng kumwail ai kadehde mehlel duen Sarawi en Sises Krais oh duen mehlel en Sapwellime Tomwo, ni mwaren Sises Krais, ahmen.