Ideidawehn Krais
Ni atail wia iengen Krais, kitail padahngki oh kadehdehki duen Sises Krais, atail Mehn Kalimeng Unsek. Eri kitail idawehn Ih sang ni atail pahn kin sohte akamaipene.
Nan pahr wet lopw kei me mwekidkihda pilahn en onop en rongamwahu me Sounkomouro lukehieng kitail “Kohdo, Idawehn Ie.“ Ideidawehn Krais kaidehn ongete lepin ahnsou de ahnsou kesempwalte me en kin wiawi. E wia inou ehu pahn kin wihwia ansou koaros oh ahl en mour me pahn kaweid kitail ahnsou koaros oh wasa koaros. Sapwellime padahk kan oh oh Sapwellime karasaras kasalehda duwen ahl ong emenemen tohnpadahk en Sises Krais. Oh koaros luhkehngehr pohn ahl wet, E ketin lukehier koaros en kohdo Reh, “me toantoal oh pwetepwet, me sensel oh saledek, ohl oh lih; … oh koaros songetehiou rehn Koht.”
I.
Keieu en kahk en idawehn Krais iei peikiong dahme E ketin kawewehda duwen “kosonned keieu kesempwal nan pelien kosonnedo”:
“Ke pahn poakohng Kauno omw Koht, sang nan mongiong unsek, sang ni ngenohmw unsek, oh sang nan omw lamalam unsek.”
“Ih met kosonned me keieu lapalap oh kesempwal.
“A me keriaun kesempwal, me rasohngete met, iei, pil duwehte, Ke pahn poakohng mehn mpomw duwen omw kin poakohng pein komwi.
“Sang ni kosonned riau pwukat me wia poahsoan en palien kosonned koaros oh soukohp akan.”
Kosonned akan en Koht kin sewese kaukaweid oh kolokol teng kehlepen atail mour. Atail kemwekid kan me nan mour wet duwehte an kisin pwutako oh ah pahpao me kapkapihr neira kaid ni rahn en kisinieng ehu. Ni ansou me kaido pipihr kohda, kisiniengo kin kahrehieng ah wiahkinte waik sahlo nan pehn kisin pwutako. Pwehki Ah sohte nohn wehwehki kehlail en kisinieng kan, e nda en lopuk sahlo pwe kaido en kak pihrdahla ile. Ah pahpau ahpw kaweidki me soh, kawewehiong me sahlo me kin kol kaido pwe en kak kehlailieng kisinieng kan. Ma kita pahn kadarala sahlo, kaido sohte pahn kak pihrdahla ile. Kisinieng kan pahn kapihrseli oh ahpw pahn pwupwidieng pohn sampah.
Sahl me anahno rasehng inou sarawi kan me kadokei kitailahng Koht, samatail Sahm Nanleng, oh Sapwellime Iehroso, Sises Krais. Kitail kin wauniki inou sarawi kan sang ni atail kin kapwaiada Sapwellimarail kosonned akan oh idawehn Sapwellimarail pilahn en lapwepen dihp, Sapwellimarail inou en kapai kan kin sewesei kitail en nantiheng kohla wasa me keieu ile.
Pwuhk en Mormon kin kalapw kalohngki me Krais iei “marain en sampah.“ Ni ahnsou me E ketin pwarehng mehn Nihpai kan, Kaun iasadahro ahpw kawewehda padahko ni ah mahsaniheng irail: “I kasalehiong kumwailehr karasaras ehu.” “Kilang ngehi me maraino me kumwail pahn kolada—me kumwail kilangehr dahme Ih wia.” Ih me ketin wia atail mehn kahlmengih mwahu. Kitail esehla dahme E ketin mahsaniher oh wiahier sang ni onopki iren pwuhk sarawih kan oh ideidawehn padahk en soukohp akan, nin duwen me Preseden Russell M. Nelson padahkieng kitail en wia. Nan tiahk sarawi en kamadipw sarawi, kitail inoukihda me ehu ehu rahn en Sabad kitail pahn “tamataman ih ansou koaros oh kapwaiada sapwellime kosonned akan.”
II.
Nan Pwuhk en Mormono, Kauno ketin ketkihong kitail poahson kesempwal me E ketin kadaniki “padahk mehlel en Krais.” Mepwukat iei pwoson Kaun Sises Krais, koluhla, pepdais, ale kisakis en Ngehn Sarawi, dadaurete lel imwi, oh duwehla kisin serih kan, me wewehki kitail en likih Kauno oh kitail en kihong mehkoaros me E ketin kupwuriki.
Sapwellimen Kauno kosonned akan mih ni pali riau: me poatoapoat, duwehte padahk mehlel en Krais, oh me ong lepin ahnsou. Kosonned akan en lepin ahnsou iei kosonned akan me anahnehte ong anahn akan en sapwellimen Kauno Mwomwohdiso de me loaloapwoat ongete lepin ahnsou en kemwekid kan, ahpw pahn pwilikihdi ni ahnsou me anahno epwelahr. Ehu karasaras en kosoned en lepin ahnsou kan me sansal iei an Kauno kaweid ong irail kaun akan en Mwomwohdiso ren kamwakid souleng kan sang New York kohla Ohio, kohla Misori, oh pil Illinois oh kaimwsakala kahluwa pokon en paionihr kan kohla Intermountain West. Mendahte eh wia men lepin ahnsou, ni eh wie doadoahk kosonned pwukat wiawihda pwe kitail en kapwaiada.
Ekei kosonned poatoapoat akan wiaier poatoahkpoa keneinei pwe irail en doadoahngki. Ni karasepe, en Preseden Lorenzo Snow kapahrek mwahu me pid duwen kosonned en meirong en eisekis ehu wiawidahr mahso ahpw toweh kan en Mwomwohdiso sohte kin doadoahngki. E anahne en pwurehng kalipwalipwih pwehki irail Mwomwohdiso oh toweh kan mih loale ansouo. Karasaras en kalipalipw me keren kei pil anahn pwehki irair de anahn me souleng en imwin rahn akan oh Mwomwohdisoht mih loaleo. Mepwukat pil iangahki kalohk en peneinei, me President Gordon B. Hinckley kasalehda sounpar kei samwalahro, oh en Presiden Russell M. Nelson ah pakairkihda me Mwomwohdiso wet en sansalki ahd me Kauno ketkiheng, Mwomwohdiso en Sises Krais en Souleng en Inwin-rahn Akan.
III.
Pil ehu en atail Sounkomour padahk kan anahne kitail en kin pwurehng tehk ong dahme kin wihwiawi nan atail mour rahn wet.
Met e wia ahnsou ehu me diren lokoaia laud oh kansensued nan koaskoasoi en nan pwungen aramas akan oh ekei pak pil nan atail peneinei kan. Koasoai laud kan ong ireh kan en kosonned en wehi kin kalapw imwikihla mwekid en lemei—de pil kailok—nan pwungen aramas akan oh nan pwungen riemen. Nan irair en uhpene wet ekei pak kin kak kerempwahla wen doadoahk kan ong wiawihdahn kosonned ong ire kesempwal akan me palimoron en tohn wehi kan kilang me mie anahnepe laud en wiawi ong wehi.
Dahme irail me kin idawehn Krais kan anahne padahngki oh wia nan irair en lokaia sohte mwahu me wihwiawi rahn pwukat? Iahnge Sapwellime padahk kan oh karasaras kan?
E inenen kesempwal pwe keieu en padahk sarawi kan me Sises padahngki ni ahnsou me E ketin pwarehng mehn Nihpai kan iei irail en kalekeirail sang akamai. Ni ahnsou me E ketin padahngki met ni duen uhpeneh kan ong palien lamalam en iren padahk kan, kahrepen E ketin mahsanih pwe en sansal mwahu ong ni doadoahngki ong ni atail lokaia kan oh doadoahk en palien wehi kan, kosonned en wehi kan, oh nanpwungen peneinei kan. Sises padahngki:
“Mehmen me kin ahneki ngehn en akamai kaidehn nei, ahpw nein tepilo, me iei pahpahn akamai, oh e kin kamwakidada mohngiong en aramas akan re en lingeringerda, nanpwungarail.
“Kilang, met kaidehn ei padahk, en kamwakidada mohngiong en aramas en lingeringer, nanpwungamwail; ahpw iet ei padahk, soahng wet en solahr wiawi.”
Ereihn ahnsou me E ketketseli nanpwungen mehn Nihpai kan, Sises padahngki pil ekei kosonned akan me karahnihte Sapwellime kaweido me en dehr mie akamai en wiawi. Kitail ese sang nan Paipel me E ketin padahngkiher ehu ehu mepwukat nan Sapwellime Kapahrek en Pohn Dohlo, ni soangen mwomwen lokaiahute me E ketin doadoahngki ong mehn Nihpai kau. I pahn wadek mahsen en nan Paipel.
“Poakohng amwail imwintihti kan, kapaiada Irail akan me kariai Kumwail, wia mwahu ong me kin kailongkin kumwail, oh kapakapki me kin wie suwed ong kumwail, oh me kin kalokei kumwail.“
Met wia ehu sapwellimen Krais kosonned kan me koaros-dehdehki—keieu kesempwal oh ahpw apwal en idawehn. Ahpw e pil wia ire keieu kesempwal ong Sapwellime luhk ong koaros en idawehn Ih. Ni Preseden David O. McKay padahngki me, “Sohte ehu ahl mwahu en kasalehda limpoak ong Koht likin en kasalehda limpoak mehlel ong emen emen aramas.”
Iet pil ehu padahk kesempwal me sang rehn Ih me wia atail soun karasaras mwahu: “Meid pai me kin wia doadoahk en kamwahu: pwe Irail pahn wiahla sapwelimen Koht Seri kei.“
Soun Kamwahu kan! Ia mwomwen ah pahn wekidala nan pwungen riemen ma Irail akan me kin idawehn Krais pahn sohte kak kesehla wia lokaia sakanakan oh kamedek ansou koaros me re kin kosoia pene.
Nan kapokon lap en pahr nekiero, Presiden Russell M. Nelson kiheng kitail me kitail en koadoahke pwukat:
Ehu me keieu mengei pwehn kasalehda kahlmang mehlelen Sises Krais iei mwomwen emen aramas ah kin ngoangki sewese mehteikan.
“… Sapwelimen Sises Krais tohnpadahk mehlel kan wia soun kamwahu kei.
“… Ehu me keioun mwahu me kitail kak wia pwehn kawauih Soundoaro iei en wiahla soun kamwahu men.“
Kaimwseklahn Sapwelime padahk kan: “Uhpene wia mehn pilipil ehu. Soun kamwahu wia pilipil ehu. Mie ahmw pilipil en pilada uhpene de ehupene. I kangongehkin kumwail en pilada en wia soun kamwahu men, met oh kokolahte.”
Pali en uhwong kan pahn anahne tapiada arail kosoi sang ni arail pahn pwungkipene ehu mehkot.
Pwe kitail en idawehn atail Soun Karasaras Mwahuo oh Sapwellime soukohp, kitail anahne kaiahnda ong dahme keieu mwahu me re kin kahdaniki Golden Rule: “Song koros me ke pahn mwahuki emen en wiaieng komwi, wiahiong irail pil songohte: pwe iei kosonnedo met oh soukohp akan.” Kitail anahne poakoahng oh wia mwahu ong koaros. Kitail anahne dehr akamaipene oh kitail en wia soun kamwahu nan atail koasoi koaros. Met e sohte wewehki kitail en pilada nanpwungen dahme kitail kamehleleh kan oh pwukoah kesempwal kan ahpw kitail en uhdihsang lokaia lemei ong mehteikan. Iei met me atail Soun Karasaras Unseko wia nan Sapwellime papah. Karasaras wet me E ketin kasalehiong kitail, ni Ah ketin lukei kitail en idawehn Ih.
Nan kapokon lap wet pahr pahiou samwalahro, Preseden Nelson ketkihong kitail sikeng ehu ong peihn atail ahnsou.
Ah kumwailinengieng en mweidohng kupwuren Koht en pweida nan amwail mour? Kumwail inengiengehr en mweidehng Koht en wia soun kaweid keieu kesempwal nan amwail mour? Kumwail pahn mweidehng Sapwellime mahsen kan, Sapwellime kosonned akan, oh Sapwellime inou sarawi kan en wia pahsoan en dahme kumwail kin wia nan ehu ehu rahn akan? Kumwail pahn kak mweidehng Kepitie en wia ngihl me pahn keieu kesempwal sang mehkoaros?”
Ni atail wia iengen Krais, kitail padahngki oh kadehdehki Sises Krais, atail Mehn Kalimeng Unsek. Eri Kitail idawehn Ih sang ni atail pahn kin sohte akamaipene. Ni atail pahn kin doulahng kosonned akan nan atail wiewia nan pokon, kitail nantieng warohng Sapwellime kapai kan sang ni atail Pahn doadoahngki lokaia oh wiepeh kan en soun kamwahu kei. Nan atail peneinei kan oh nanpwungen mehteikan, kitail dehr mweidada lemei oh kailok en mie. Kitail nantieng pwe kitail en sarawi, duwehte Sounkomouro, me mware sarawi me I kadehdehki oh peki ni ngidingid Sapwellime kapai en sewesei kitail en wia Souleng kei, ni mwaren Sises Krais, ahmen. Ni mwaren Sises Krais, ahmen.