Sarepedi Neitail Dipwisoun Mahwen en Uhweng kan

Pwuken Mormon kilelehdi me ele sounpar 90 mwohn ipwidien Krais, nein Nahnmwarki Mosaia pwutangko tepda kalohkehng mehn Leimen ko duwehte me kin kalohngki sounpar 14. Nan mwehin keinek tohto arail doadoahk en kapwurehdo mehn Leimen kan ren kamehlele padahk en Krais sohte katepe. Ansou wet, ni mehlel, sang ni sawas kopwuriamwei en Ngehn Sarawi, mehn Leimen meh kid kei weliakapwalahr oh wiahla tohnpadahk kei en Sises Krais.

Kitail wadek, “Eri, nin duwen Kauno e ketin ieias, oh nin duwen tohtohn irail me kamehlelehla, de tohto me wehwehkihla me mehlelo, sang ni en Amon oh rie kan ar padahk, nin duwen ngehn en kaudiahl oh kokohp, oh sapwellimen Koht manaman wiewiahda doadoahk kapwuriamwei kan rehrail—ei, I ndaiong kumwail, nin duwen Kauno e ketin ieias, tohto mehn Leimen kan kamehlelehda arail padahk kan, oh wiliakapwalahng Kauno, sohla pwurehng pwupwula.”

Pasapengpen arail weliakapwla ni mehlelo sansal nan ire tikitik wet: “Pwe irail wiahla aramas pwung kei; irail pwilikihdi neirail dipwisoun mahwen en uhweng kan, kahrehda irail sohla pwurehng pelianda Koht, de pil uhwong riarail akan.”

Ire me mahsani “dipwisoun mahwen en uhweng” wia karasaras oh mwekid. E wehwehki neirail kedlahs oh ekei dipwisoun mahwen kan ahpw e pil duwehte arail sapeikieng Koht oh Sapwellime kosonned kan.

Nanmwarki en mehn Leimen kan me weliakapwalahro mahsani nin duwe met: “Eri met kilang, rieiko, … mehkoaros me kitail kak wia (ni atail wia aramas keieu salongala) en koluhkihla dipatail kan koaros oh kam aramas tohto me kitail wiahier, oh patowanong Koht en ketin ketikihsang irailehr nan atail mohngiong kan pwe iei ih mepwukat koaros me kitail kak wia pwe en kak itarohng koluhla mwohn silangin Koht pwe en kak ketikihsang mwahi en dipatail akan.”

Kilelehdi mahsen me sang nanmwarkio—kaidehnte arail ineng mehlel enkoluhla me kahrehieng mahkpen diparail kan, ahpw Koht pil kihsang mwahi en dihp oh ineng en dihp sang nan arail mohngiong kan. Nin duwen ahmw esehier, irail sohte wia mehkot me pahn kasalehda arail kahngohdi ohng Koht, irail ahpw sarepedi neirail dipwisoun mahwen kan. Oh ni arail sarepedi neirail kepwehn mahwen kan, wekidala arail mohngiong kan, irail pil sarepedi diparail kan.

Kitail kak idek rehtail dahme kitail kak wia pwehn idawehn koasoandi wet, eri “pwilikihdi neitail dipwisoun mahwen en uhweng kan,” sohte lipilipil dah, oh “weliakapwalahng Kauno” pwe mwahi en dihp oh ineng en dihp en kohsang nan atail mohngiong kan oh kitail solahr pahn pwupwidi.

Kahngohdi kin kak wiawi de loieng. Karasaras en ineng mehlel en uhweng iei Luhsiper, iei ih, me mwohn mour wet, uhwengada Sapwellimen Sahm pilahn en komour oh pitihedi mehteikan en alasang, “oh, ni ansouo, me tohto idawehnla ih.” E sohte mengei en kasawihda me ah karasaras en uhweng wiwiawihte nan atail mwehiet.

Aramas silimen nan Pwuken Mormon imwintihtiheng Krais—Serem, Nihor, oh Korior—me kasalehda mwomwen uhweng kupwuren Koht. En Nihor ih Korior padahngko dene sohte dihp; eri, sohte anahnepen koluhla, oh sohte Sounkomour. “Emen emen aramas kin pweida nin duwen eh loalokong, oh … emen emen aramas kin kalowehdi nin duwen eh kehlail; oh dahme aramas men [kin wia] sohte kin kauwehla kosonned.” Me kin imwintihtiheng Krais sohte kin men alehda kamanaman en mwomwohdiso, doadoahngki tiahk sarawi kan oh inou kan “pahn tiahk oh koasoandi me samworohn mahs akan koasoanehdier pwe re en kaunirailda oh ahneki manaman pohrail.”

Ehu karasaras en imwin-rahn akan duwen inangih uhweng ni mehlel me imwikihla peren iei soaipen William W. Phelps. Phelps iangala Mwomwohdisoht nan 1831 oh pilipilda en wia pwukoahn soun prinder. Eh wiahda an mwomwohdiso pakair tohto, intingihda koulin sarawi tohto, wia pwukoahn soun inting ong Joseph Smith. Oh ahpw, uhwengada Mwomwohdiso oh Soukohpo, lau ih kadehdehda mehkot sapwung pwehn uhwengada Joseph Smith nan mwoalen kopwungen Missouri, me elehieng Soukohpo ah pil pedelong nan kalapwuhs.

Mwuhr, Phelps intinglahng Joseph oh peki mahk. “I ese ahi mwekido, komwi pil ese, oh Koht mwahngih, oh I men komourla ma kempoakepahi kan pahn sewese ie.”

Nan en Soukohpo pasapengo dene: “E mehlel me dahme ke wiahu elehieng kitail nan kahpwal laud. … Ahpw, nekier pilen kepo, kupwuren Samatail Nanlengo pweidahr, oh kitail momourte. … Kohdo, riei kesempwal, pwehki mahweno nekehr, oh kempoakepahn ni tapio pahn pilehu tep ni imwilahu.”

Sang ni koluhla mehlel, William Phelps “sarepedi ah dipwsoun mahwen en uhweng kan” oh sawas unsek kohieng, oh e solahr pilehu pwupwidi.

Mwein soangen mwekid keper me kin uhweng kupwuren Koht, iei, alasang wiewia mehkot me emen indahwei—en pohnsehse Kupwure nan atail mour. Me tohto irail me sohte medewe re kin uhweng kakete pil uhweng kupwure oh Sapwellimen Koht mahsen sang ni arail kekeid nan pein arail ahl me weksang sapwellime. E kataman dohngie koul indand ehu me wiawihda sounpar kei samwalahro sang soun koul Frank Sinatra me ni imwio inda, “I wia ni pein ahi ahl.” Mehlel me nan mour wet mie soahng tohto me aramas emen kak pilada, ahpw ong ni koasoiapen komour oh mour soutuk, atail ire laud en koulo anahne inda, “I wia ni kupwuren Koht,” pwehki ni mehlel sohte ehu ahl tohrohr.

Kilang, ni karasepe, karasaras en pepdais en Sounkomouro. E ketin pepdaisla pwehn kasalehda sapwellime loaloapwoat ohng Sahmo oh wia emen karasaras ong kitail:

“E ketin kasalehiong aramas akan me, ni pali uduk e karakarahkala mwohn Sahmo, oh kadehdehiong Sahmo me e pahn peikiong ih ni e pahn kapwaiada sapwellime kosonned akan. …

“E ketin mahsanih ong aramas akan: Kumwail idawehn ie. Eri, riei ohl kesempwal oko, kitail kak idawehn Sises ma kitail sohte pahn inangih kapwaiada sapwellimen Sahmo kosonned akan?”

Sohte “pein ahi ahl” ma kitail idawehn karasaras en Krais. Songsongen rapahki ehu ahl en kolahng nanleng rasehng kawehkihlahn ansou en kawkawadahn Imwen Doulik en Papilono me weksang sohpeilahng Krais oh Sapwellime komouro.

Kedlahs kan oh ekei dipwisoun mahwen me mehn Leimen kan sarepedierko wia dipwisoun mahwen en kahngohdi pwehki sang dahme re kin doadoahngkiheng. Dipwisoun mahwenko duwehte dahme neirail pwutangko kin doadoahngki, ahpw irail kin doarehki arail peneinei oh arail saledek, e sohte wia mehn mahwin en uhweng kupwuren Koht. E pil duwehte nein mehn Nihpai dipwisoun mahwen kan: “Irail sohte pepeiki wehin nanmwariki de pil manaman ahpw irail pepeiki imwarail kan oh arail mour saledek, arail pwoud kan oh neirail seri kan, oh soahng koaros me arail, ei, arail pwuhng en kaudok oh arail mwomwohdiso.”

Ni soahngohte, miehte mehkot nan atail mour me sais mwahu de pil mwahu douluhl ahpw kakete pwarada ni sapwung oh wiahla “dipwisoun mahwen en uhweng kan.” Atail lokaia, ni karasepe, kak wia mehn kasukuhl de kawehla. Ni Seims ah mahsani:

“Ahpw sohte aramas emen [me kak] irehdi lowe; lowen aramas uhdahn suwed douluhl oh ketihwo, diren pwoisin suwed.

“Kitail kin doadoahngki lowatail ong ni kapingpen Kaun-o oh Samatailo, oh pil ong ni atail kin keriahla iangatail kan me wiawihda rasehng Koht.

“Atail kaping kan oh lokaiahn keria kan kin pwiliweisang wasatehkis nan awatail. Riei ko, soahng wet sohte konehng en kin wiawi.”

Doaralahr lokaia sakanakan oh kailok wasa koaros oh nan en emen mour. Lokaiahn loamwoahmw oh lokaia suwed laudlahr, lel irail me pwulopwul kan. Soangen padahk wet wia “dipwisoun mahwen en uhweng” Koht, “diren pwoisin en mehla.”

Medewe ehu karasaras me pil mwahu ahpw kakete uhwengada kaweid en Kauno—en emen doadoahk. Emen kak diar pweidahn ah doadoahk, kahrepen ah doadoahk, de sahpis oh kitail koaros kin insenamwahuki dahme aramas ngoangki oh koahiek kan kin pweida loale oh wiahda.

Ahpw, e pil kak lelehng me insenohki doadoahk en kesempwalkihla ehute mour. Ah luhwehko koaros solahr nohn kesempwal, me duwehte mweidehng ansou oh koahiek rehn Sounkomouro. Ohng ohl, oh pil ohng lih akan, tiahk en kaskasaula ansou mwahu en pwopwoud, de sohte kin loaloapwoat oh utung ah pwoud, de sohte kin apwalih seri mwahu, de pil pohnsehse kapai oh pwukoahn naineki seri pwehki men pweida nan pelien doadoahk kakete kahrehieng ineng mwahu ieu en wiahla tiahk en kahngohdi.

Ehu karasaras pid duwen paliwaratail kan. Paul katamanki kitail en kepinga Koht ni paliwar oh pali ngehn koaros oh me paliwar wet iei tehnpas en Ngehn Sarawi, “kaidehn uhdamwail kumwail, pwe sapwellimen Koht.” Met, mie atail ansou mwahu en kesempwalki paliwaratail kan ni uwen atail kak. Ekei kitail kilang pweida kan me wiawiher nan Olimpiko, oh me ekei kitail kehn pepehm en mahmahla, de dahme Presedend M. Russell Ballard kin kahdanki “sukuru kan wie pwumpwupwsang.”

Ahpw, I kamehlele me e kin kapereniada atail Sounkepikipiko ansou me kitail kin wia uwen atail kak pwehn apwalih mwahu Sapwellime kisakis en paliwar kan. E wia ehu mwahi en uhweng pwehn kasaminehla de kawehla paliwar, de mwamwahlki, de sohte kin apwalih mwahu. Ansouohte, mehkot mwahl oh mwohnkihlahte mwomwen paliwar ehu, kasansalpe, de likou kakete wia mwohmw en uhweng laud, ihme kin elehieng emen ah kaudekieng kisakis en Koht ahpw kaidehn Koht.

Ni imwilahu, sarepedi dipwisoun mahwen en uhweng kupwuren Koht wehwehki karakarahkala oh peikiong kaweid en Ngehn Sarawio, pwilikihdi ahnepen aramaso oh wiahla “souleng men sang ni tomw en Krais Kauno.” E wehwehki kitail en mweidehng tepin kosonnedo en wia tapwin atail mour. Me wehwehki mweidehng Koht en pweida. Ma atail limpoak ohng Koht oh atail ngoang iei en papah Ih sang ni kehl unsek, madamadau unsek oh roson unsek wiahla poahsoan en atail kadeikih soahng koaros oh wiahda atail koasoandi kan koaros, kitail pahn sarepedi dipwisoun mahwen en kahngohdi. Sang ni kupwuramwahu en Krais, Koht pahn mahkehng dipatail kan oh kahngohdi kan en mahsoko oh pahn kihsang mwahi en dihp oh kahngohdi en atail mohngiong kan. Ansou konehng, E pahn kihsang ineng koaros me suwed, duwehte dahme E ketin wia ohng mehn Leimen kan. Eri mwuhr, kitail pil “sohla pahn pwurehng pwupwula.”

Sarepedi neitail dipwisoun mahwen kan kak kiheng kitail popohl. Ohng koaros me weliakapwalahr rehng Kauno, kitail en “[koulki ]komour en limpoak.” Samatail Nanleng oh Sapwellime Iehros, atail Soundoar, koasoanehdier Sapwellimara inou sohte imwio ong atail peren unsek sang ni limpoak oh meiroang mehlel. Kitail kin kehn Sapwellimara limpoak rahn koaros. Kitail pil kak kapwurehieng Ira soahngohte sang ni pein atail limpoak oh loaloapwoat. Kitail nantiheng sarepedi—lau loal douluhl—mwekid en kahngohdi ohng Koht nan atail mour oh weliankihdi mohngiong oh madamadau mwahu. Ni mwaren Sises Krais, ahmen.