“Ngehi Iei Ih”

Met rahn Sarawi, oh kitail kohpene pwe kitail en koasoia duwen Krais oh Sapwellime kematalahu. I Ese Me Ahi Sounkomouro Ieias.

Medewe kilel wet me wia keimseklahn wihk en Sapwellimen Sises mour. Me tohto pokonpenehr, me iangahki sounpei en Rom kan me kolokol lepin tuhke oh naip kan. Oahpiser sang rehn samworo lapalap ako me tiheng oh re wisik tehtehn pei, pwihn keper wet sohte kohlahn powehdi kanihmw ieu. Pwohnget re wie raparapahki ohl emente, ohl emen me sohte kin kolokol dipwisou keper kan, sohte ale kasukuhl en sounpei men, de pil iang pei pak ehu nan Sapwellime mour unsek.

Ni sounpei kan ahr kohkohdo, Sises, sang ni ah ketin kupwurki en doarehla Sapwellime tohnpadahk kan, ahpw ketida mwohrail oh mahsanih, “Ihs me kumwail raparapahki?“ Re ahpw sapengki, “Sises mehn Nasaret.“ Sises ahpw masanih, “Ngehi iei Ih. … Ni ansouohte … ni Eh ketin mahsanihong irail, Ngehi iei Ih, re pweieklahsang, oh pwupwudiong nan pwehl.”

Ohng ie, met wia ehu ire me keieu kesempwal nan pwuhk sarawi pwon. Pwehn kapatahieng, e padahkiong ie ni inen me patopatohte rehn Iehros en Kohto—Siohwa lapalapo me mih nan Kadehde Mering oh Soun Silepen Sihpw Mwahu nan Kadehde Kapwo, me sohte kin kolokol soangen tehtehn mahwin koaros—me sang ni rongorongete kepitie me kin Perehsang Melimelo, Nanmwariki en Popohl oh Samworo Lapalap en Kapai Koaros me pahn Kohdo, iei itar en kapwurehla imwintihti kan, koasoakoasoak irailda oh kahrehiong pwihn wet arail men alehdi pwukoah en doadoahk nan wasahn wie mwenge pwohngo.

Rahn ekei mwowe, ni ansou me E pweida ketilong nan kanihmwo, “tohn kanihmwo pwon mwoarongada,“ Pwuhk sarawi mahsanih, idihdek, “Ihs ohl menet?“ I kak iang medewe me “Ihs ohl menet? iei peideko me sounpei pwuko peipeidengki!

Pasapengpen peideko sohte kak mih ni mwomwen mese, pwe Aiseia kohpadahr sounpar isipwiki kei mwowe me “sohte wahu ehu de lingan ehu me mie reh; me kitail kak linganki oh inangih kilang. Sohte mehkot mwahu mie ni paliwere, me pahn kahrehiong atail men keiong mpe.” E sohte kohsang ni Sapwellime likou kaselel de Ah kepwehpwe. E sohte kak kohsang kasukuhl laud sang ni sinakoke kan pwe kitail sohte ahneki mehn kadehde kan me E ketin onop wasa pwuko, mehndahte ni Eh pwulopwul E kak ketin kapingada irail sounsawas en kosonned akan oh sounkawehwehn kosonned akan, kopwkopwuriamweikihong irail Sapwellime padahk kan “ni emen me sapwellimaniki mweimweio.”

Sang ni padahk en nan tehnpas sarawio me pid Sapwellime ketdo nan Serusalem oh kaimwsekpe me pweidahro, selidi ni soh kahrepe, Sises ketehr nan kahpwal rasehng dahme kin wiwiawi, kalapw lelehng mwekid sapahrek me E kin ketin kapwaiada—sang ni pweida kei me kitail sohte kak kawehwehda ihte Ih me ketin mwahngih.

Sang ni poadoapoad kohdo me ngeder kin kamengeihte, pil kin katikala mwomwen atail kilang Ih oh Sapwellime kadehdeh ohng udahn ihs Ih. Irail katikitikilahr Sapwellime pwung kan ong ni kadeikte, Sapwellime mehn kopwung ong ni lingeringerte, Sapwellime kupwurmahk ong ni mweimweihte. Kitail anahne tetehk soangen kilel mengei kan en Ih me pohnsehse padahk kan me kiheng kitail pepehm en koasoansuwed. “Katikala” wet kin pwung mendahte Sapwellime kupwurmwahu, Sapwellime limpoak.

Nan erein Eh ketket sampah, Sises padahngki me mie kosonned lap riau. E sansalehr nan kapokon wet oh pahn wie kohkohda erein: “poakohng Kaun-o omw Koht [oh] poakohng mehn mpomw duwen omw kin poakohng pein uhk.” Ma kitail pahn idawehn Sounkomouro ni loalopwoat nan kosonned kesempwal oh kasapwurupwur pwukat, kitail konehng kolokol teng ong dahme E ketin udahn mahsanih. Oh dahme E udahn mahsanih iei, “Ma ke poakohng ie, kolokol ei kosonned akan.” Nin soutik ohte, E masanih “poakpene nanpwungamwail; duwen ei poakohng kumwail.”

Nan irehkan en pwuhko, lepin lokaia me kawehwehda mehlelpen, Sapwellimen Krais limpoak—ekei pak adaniki limpoak unsek—inenen kesempwal.

Dahme re kawehwehki? Ia mwomwen limpoak en Sises?

Keieu, Ah limpoak sang ni “[Sapwellime] mohngiongi unsek, kehl, madamadau oh kehlail,” kihkihong Ih koahiek en kamwahuiala medek laud oh padahngki me mehlel apwal kan. Ni mwotomwot, Ih emen me kak ketkihda mahk oh kangoange mehlel ni ansouohte. Ni Lihai e kapaiada nah pwutak Seikop, “Mesaia Sarawio me kin ketin komourala aramas; pwehki ih me diren kalahngan oh mehlel.” Sapwellime limpoak kin elehieng insenamwahu ansou koaros me mie anahnepe oh kep katik ieu ni ansou me e anahne nimala. Eri kitail song en poakpoakehki—mohngiongatail unsek, kehl, madamadau oh kehlail—pwe iei mwomwen Eh ketin poakohng kitail.

Keriau en wiewiahn Sapwellimen Sises limpoak poatoapoat iei Sapwellime peik ong mahsen koaros me ketsang dawasahn Koht, me ansou koaros kin kapahreki kupwure oh wiewia kan pahn Kupwuren Seme Nanleng.

Ansou me e lella sampah mwurinte Sapwellime Iasadao, Krais mahsanihong mehn Nihpai ko: “Kilang, Ngehi iei Sises. … I tungoalehr sang nandahl katiko me Sahmo ketikihong ie, … me I lokolongki kupwuren Sahmo … sangete nin tapio.”

Sang ni soangsoangen wiepe kan me E ketin kapehsehkihda pein Ih, Sises ketin wia met sang ni kalohkihda Sapwellime peik ong ni kupwuren Sahmo—tamatamante me e sohte reirei sang awa en Sapwellime anahn laud, Iehros en Koht menet kehnda me Seme solahr kin ketiket Reh. Limpoak en Krais—sansal nan peik unsek pahn kupwur lapalapo—nantihongete oh pahn pil kohkohlahte, kaidehnte sang ni rahn mengei oh kansenamwahu akan ahpw pil sang ni rahn rotorot oh keieu apwal akan.

Sises wia “ohlen lokolok men,” iei me pwuhk sarawi mahsani. E lelehng insensuwed, pwangada, mwoaroskihla, oh inenen kelkelehpw. Nan mepwukat oh ansou kan koaros, Sapwellimen Sises limpoak sohte pahn sohrala, oh pil limpoak en Seme. Iangahki limpoak laud—soahng me kin kasalehda, kamanahieng, oh ketkihong—atail pil sohte pahn sohrala.

Eri, ma ekei pak ke wia uwen ahmw kak, Ih uwen ah pahn pil kin apwalla; ma, duwehte ahmw kin songosong en kapwungala ahmw luwet oh sou itar kan, ke diar aramas emen de mehkot ehu me pahn uhwong ahmw pwoson; ma, ni ahmw pahn doadoahk ni mehlel, ke kehnte ansou en peikasal kan lepeiukala, tamataman me e kin wiawihong aramas loalopwoat kan nan soangosoangen dih kan. Pil tamataman me mie manaman ehu nan wehwe me kin nantihong uhwong soahng en mwahu koaros me ke kin song en wia.

Eri, sang nan ansoun kapai tohto iangahki ansoun apwal, sang nan kapinga rir pil duwehte kauwe ni sansal, sang ni kisehn Kopwurupwurdo kan iangahki sapwung en aramas akan me pahn udahn iang, kitail kin nantihlahte pohn ahlo iangahki sapwellimen Sises Krais Mwomwohdiso mehlelo. Pwekida? Pwe me rasehng atail Soundoaro, kitail iangala ong mehn kasukuhlo pwon—kaidehn en ididi ni des en tapio ahpw lella ni keimwseklahn sukuhlo. Pereno me mih nan met iei me Kaun en sukuhlo kihdong kitail koaros Pwuhk-ritida ehu en pasapeng kan koaros mwohn sukuhlo ah tepidahr. Pil doulahte, kitail ahneki sounsawas tohto me kin katamankin kitail pasapengko ni wasahn kommoal kan pohn ahlo. Ahpw, mepwukat sohte kak pweida ma kitail sohte pahn kin kohla nan atail perehn kaskuhl.

“Ihs me kumwail raparapahki?“ Sang mohngiongatail unsek kitail sapengki, “Sises mehn Nasaret.” Ni ansou me E ketin mahsanih, “Ngehi iei ih,” kitail kin keipwekidi oh kadehdehki lewatail me Ih iei Krais ieiaso, me Ih kelehpw me kalopwuhlahki dipatail kan, me E ketin wouwa kitail ni atail medewe me E ketin keseikitailahr. Ansou kitail pahn uh mwohn Ih oh kilang lipwen ohlahkan nan limehkan oh aluweluwehkan oh pengepenge, kitail pahn tepida wehwehki ia wehwe ong Ih en alehda dipatail kan oh kehnda pahtou, en peikiong ni unsek kupwuren Semeho—soahng koaros pwehki sapwellime limpoak mwakelekel ong kitail. Pwehn kapehsehieng mehteikan duwen pwoson, koluhla, pepdais, kisakis en Ngehn Sarawi, oh alehdi atail kapai kan en nan tehnpas en Kauno—iei mepwukat me wia poahsoanpen “padahk oh tiahk sarawi kan” me kin kasalehda atail limpoak ohng Koht oh mehn impatail oh perenkihda kasalehda mehlelpen Mwomwohdiso en Krais.

Riei souleng kan, I kadehdehki me Mwomwohdiso en Sises Krais en Sounleng en Imwin-Rahn akan iei dakepatail me Koht ketkiheng kitailehr ong komourpatail. Rongamwahu me e kin padahngki mehlel, oh prihsduhd sohte kohsang ehu soahng tohrohr ahpw e kohdo sang ni manaman en Koht. I kadehdehki me Russell M. Nelson iei soukohp en atail Koht, me duwehte Sapwellime kan me tienglahr mwowe oh Sapwellime kan me pahn kohdo mwuhr. Oh ehu rahn kaweid en soukohp wet pahn kahluwa ehu dih en kilang atail Meninkeder en Komouro ah pahn ketdihdo me rasehng “lioal piripir… sang ni palimese,” oh kitail pahn werkihda, “Sises mehn Nasaret.” Nin lime kan me erein pahn kapahwei oh limpoak mehlel, E pahn sapeng mahsanih, “Ngehi me Ih.” I inoukihwei sang ni manaman en wahnpoaron men oh mweimwei en Mware sarawi, me iei Sises Krais, ahmen.