Mourki mour mwakelekel ong Kauno nan Momour en Ehu Ehu Rahn akan

Nan aht kapehsehn peneinei en Gong me se ahpwtehn wia mie kasalepen koaiek kaperen kei wiawi, oh kaimwsengkihla an pahpa kan siai en kemen kouruhr.

Apw siai wet me inenen kaperen. Tohn ehu pwihn iei Pahpakahlap (ngehi) oh nein nait seri riemen, sounpar 12 oh 11. Ah tohn pwihnteio irail pwihn loaloakoang ehu (AI) me riaht pirian Peter wiahda pwe en kin wiahda ehn pahpa kemenkouruhr duwehte Gerrit W. Gong. Pahpakahlap Gerrit Gong siaieng AI Gerrit Gong.

Nait serihkan oh ngehi me tep.

Dahme ke kin kahdaneki dainasohr me kawehla were sdohsahu? Olahn Dairanosahrus.

AI Gerrit Gong kaweidiki en—kin medewe duwehte Gerrit W. Gong. Lokaia duwehte ih.

AI Gerrit Gong— “Iet ehu lepin kahs en kemen kouruhr ong pahpa kan sang Gerrit W. Gong, me ahneki ah karakarahk, madamadau mwahu, oh mwohmw me mwahu: Dahme karehda tuhke karakarahk ehu ah kin kahreiong aramas en kin sirei? Pwehki e poahsoankihda limpoak oh kapahkihwei rah kadek kan. Me pil duwehte tuhkeo, kitail pil kak iang diar kehlail nan atail kaluwe kan oh popohl ni atail pahn kin kadek ong mehteikan.”

Eri, dah me komw medewe? Eri ihme e kahdanekiki en pahpa kemen kouruhr kan.

Ansou koaros mie ansou mwahu kan en kin kouruhr, peren, oh kilang mehkot kaselel mwohn mesetail kan. Atail iei rongamwahu en popohl oh momour mwakelekel en ehu ehu rahn akan. Mour mwakelekel kin kasalehda wekpeseng kan ong kahrepen pwukoah sarawi kan me mie. Ahpw mour mwakelekel pil kin lukei kitail en kalaudehkihla atail mour me sarawi kan—pwe en paieki pilawa en mour nanpwungen rohs sakanakan oh tekatek kan en sampah wet. En iangih Kauno, kitail anahne sarawihla, pwehki Ih me ketin sarawi, oh, en sewese kitail sarawihla, Kauno luhkeiong kitail en iang Ih.

Mie ehn emen emen kitail soai. Ni ansou me ngehi oh Sister Gong tuhwong kumwail—tohn Mwomwodiso kan oh kompokepatail kan sang soangesoangen wasa kan oh irair kan—amwail soai en sarawihong Kauno nan mour en rahn koaros kin sair kiht. Kumwail kin momouriki soahng isuh me tepikihda leder C ni lokaiahn wai: communion wewehki ehuiong Koht, community oh compassion me wewehki ehupene oh limpoakpene, commitment wewehki loaloapwoatieng oh covenant wewehki inou ong Koht, oh peneinei oh kempoakepamwail kan—centered wewehki poasonkihda Sises Christ me iei Krais.

Kekeirdahn mehn kadehde kan kin wia mehkot mehlel: irail akan me kin kamelele kin ahneki peren, roson mwahu, oh kin pweida laudsang irail akan me sohte mehleliong ngehno de ehupene. Peren oh insenamwahu, roson mwahu en paliwar oh madamadau, wehwe oh kahrepe, wiewia oh mour mwakelekel, ehupene kan, palien mwohni oh dipwisou kan—sang pelien teneki koaros, palien lamalam koaros kin pweida.

Irail kin paieki roson mwahu en paliwar oh lamalam oh re pereniki mour mwahu ni sounpar koaros oh soangosoangen pwihn kan.

Dahme irail soun ropirop kan kin kahdaneki “kehlail en pwihn en souleng” kihwei ni sansal, kahrepe, oh ineng en mour kan me kin pirekek oh wekidekila seli. Ihmw en pwoson oh pwihn en Souleng kan kin torohrla oh wiahla pwihn ehu. Mour mwakelekel ohng Kauno weweki soh ong me kin uhwong, soh ong loalokong en irail akan me kin kawehla, soh ong me kin kawehla oh kalaudehla lingeringer en sampah. Mour mwakelekel ohng Kauno kin weweki ei ong sarawi oh wahu, ei ong atail kin saledekla, peren, mwakelekel, ni atail kin idawehn Ih ni pwoson.

Dahme kasarawihong Kauno nan momour en ehu ehu rahn kan duwehte?

Mour mwakelekel ohng Kauno nan momour en ehu ehu rahn duwehte aramas riemen, me pwopwoud sounpar ehu, kin ehukipene rongamwahuo oh inou kan koaros, tohnmetei, oh kin papah nan ara mour.

Lih pwoudo tepikihda koasoia, “Nan high skuhl, i kin mihmi wasa rotorot. I kin ahneki pepehm me Koht sohte kin mihmi rehi. Ehu pwohng, deks ehu kohsang rehn kompokepahio koasoia, ‘Oii ke wadekehr Alma 36?’

“Ni ahi tapida wadawad,” e nda, “I audaudkihda popohl oh limpoak. I pehmada me mie emen me pwoleiehdi. Ansou me I wadek Alma 36:12, I ese me Sahm Nanleng masaniher ngehi oh e mwangih mwomwen ahi pepehm”

E pil doulahte, “Mwohn aht pwopwoudda, I lokaia mehlel ong ahi pwoud inouo me I sohte ahneki kadehde laud duwen meirong en eisek kis ehu. Dahme karehda Koht anahneki kitail en kihong mwohni ansou me mehteikan ahneki diren mehkot me re kak kisakiski? Ah pwoud inouo eri sewese ie ni e kawewehda me e kaidehn duwen mwohnio ahpw duwen ideidawen kosonned me E ketin peki rehtail. E padahkiong ie ien tepida pwain ai meirong.

“I diarada me ahi kadehde keirida,” e nda. “Ekei pak mwohni kin sohla itar, ahpw se kilangehr kapai tohto, oh wiepe me sohte kak kawehwe peidei kan itarete.”

Oh pil, “nan ai kilahs en nursing,” e nda, “ngehi kelehpw me wia towe mehlel en Mwomwodiso oh me pil pwopwoud. Pak tohto I kin nek ahi skuhl ngehi kin insensuwed de sengiseng pwehki I kin pehm me iengei kau kin sohte men patehng ie oh kin kalapw koasoiakin ie duwen dahme I kamelele, duwen ahi doadoahngki ahi karment kan, de ahi mwadangete pwopwoudda.”

Iet e pil doudoulahte, “Nan semester me nekiero I esehla ia mwomwen ahi pahn kin koasoia dahme I kamelele oh mwomwen ahi pahn wia karasaras mwahu men en rongamwahuo. Ahi wehwe oh kadehde laudla pwehki I doadoahngki ahi koahiok en kesihnen kelehpw oh loalopwoatihong dahme I kamelele.

Ah pwoud pwulopwul ahpw pil kapatehng, “Mwohn ahi misin mie ahi pilipil en iang mwadong basketball nan college. I pilada pilipil apwalo, I pwilikihdi pilipil teiko oh I kohla papah Kauno. Sohte mehkot me I kak welianda pahr riau ko.

“Ni ahi pwurodohng ahi wasahn kouson,” e nda, “I kasik me e pahn apwal ahpw I diarada me paliwereiet kehlailla, mararahla, oh pil roson mwahu. I inenen kehlail sang ansou me I mweselo. Pekipek dirsang ansoun ai mweselo pil kohdohng ie, me pil iangahki sukuhl me I keieu men kohlahng. Ahpw, me keieu kesempwal,” e nda, “I kin kehliki Kauno laudsang mahs.”

E kaimwsengkihla, “Ni ahi wia emen misineri I kin padahngki me Sahm Nanleng inoukihong kitail manaman nan atail kapakap kan, ahpw ekei pak I kin manokehla met.”

Aht kapai kan en misineri ni aht kasarawihong Kauno me inenen dir oh kapaida laud. Palien mwohni, ahnsou, oh soahng teikan kin ekei pak sohte mengei. Ahpw ni ansou me misineri kan sohte lipilipil sounpar depe oh sohte lipilipil wasa re kohsang ie kan kin kasarawihong Kauno, soahng koaros pahn kak pweida ni kupwuren Kauno.

Met ni sounpar 48, misineri mah men ehukida, “Ahi pahpa mwahuki ien kohla college, ah kaidehn misin. Mwurihte mwo, e alehdier soumwahu en mohngiong oh mehla ni ah sounpar 47. Udahn I insensuwedkihla. Ia mwomwen ahi pahn kak kamwahuihala soahng koaros rehn ahi pahpao?

“Mwuhr,” e doulahte, “mwurin ahi lemehda ien wia ahi misin, I ouramankihda ahi pahpao. Ni popohl oh meleilei, e inenen pereniki ahi pahn kohla wia ahi misin.“

Misineri mah menet doulahte koasoia, “Ni Doctrine and Covenants 138 padahngki, ih kamelele me ai pahpao kak wia pwukoahn misineri men nan sahpwen ngehn. I kak kilang ahi pahpao sewesewese aht pahpa kahlapo, me kohkohlahsang Germany ni ansou me e sounpar 17 oh salongalahsang peneinei, oh met kak dierekla.”

Ah pwoudo kapataihong oh koasoia, “Nan pwungen perien limeno en peneinei en ahi pwoud, irail meh pahmen me kohla wia arail misin iei irail me alehdi dikirih kan en college.”

Mour mwakelekel ong Kauno nan momour en ehu ehu rahn kan duwehte misineri pwulopwul men me pwurasang ah misin me eselahr en mweidohng Koht en kaunda ah mour. Ahnsou kis samwalahro, ni ansou me aramas peki en kapaiada me soumwahu men, misineri menet koasoia, “I ahneki pwoson, I pahn kapaiada pwe en kak mwahula. Ahpw,” misinerio ahpw inda, ”I esehda me ni ansouo en kapakapki kaidehn dahme I inengieng, ahpw ong dahme Kauno mwangih aramaso pahn anahne. I kapaiakihda ohlo popohl oh nsenamwahu. Mwurin mwo e mehla ni meleilei.“

Kasarawihong Kauno nan momour en ehu ehu rahn kan duwehte siar en liol me pwar ni likou puhpo pwehn kadokepene, kaloalemwahuih, oh kakehlailihla. Emen kaun en ohpis en university men ahpw koasoia me e kin pepehm ehn aramas akan kapakap kan kohieng ih. Aramas pwukat doadoahk ong university wet palilaud en arail mour oh pousehla apwalih mwahu koasondi en skuhl wet oh tohn skuhl kan.

Sister men kin wia uwen ah kak koaros nan ehu ehu rahn akan, mwurin ah pwoud ah sohte mehlelieng ih oh neira serihko. I inenen kesempwaliki ih, oh koaros me duwehte ih. Ehu rahn ni ansou me e limlimpene ah kepwe ko, peh kau pohn likou en karmend kei, e ahpw esingekda oh koasoia, “Ia kahrepe?“ E pehmada ngihl kansenamwahu ehu ah koasoia, ”Ahmw inou kan koaros mihmite rehi.”

Mwurin sounpar 50, pil emen sister inengieng en kamwahuihala nan pwungen ih oh ah pahpao. ”Ni ai kekeirda,” e koasoia, ”mie riei pwutak ko oh ahi pahpa, oh pil ngehi—me wia serepein kelepwo. Ihte me I mwahuki ien kak ’itarete’ ong ahi pahpa.

”Eri ahi nohno ahpw mehla! Ih kelehpw me kin wia soun kamwahu nan pwungen ngehi oh ahi pahpa.

”Ehu rahn,” sistero ndahda, ”I rongada ngihl ieu koasoia, ‘Luke ahmw pahpao oh wahla ih ni tehnpas sarawio.‘ Met me tapiada aht pak-riau-nan ehu ehu sounpwong nan pwungen ngehi oh ahi pahpa ni aht kohlahng tehnpas en Kauno. I ndahiong ahi pahpao me I poakepoake ih. E pil ndahiong ie me e pil poakepoake ie.

“Aht kin kohla nan tehnpas en Kauno kamwahuihkihtala. Ahi nohnou sohte kak sewesei kiht pohn sampah, Ni ah mih palio kadengo e sewese kamwahuiala dahme oalahro. Tehnpas sarawih kahrehda aht seilok en mour wet ong aht peneinei kak unsekla oh kak wiahla peneinei kokohlahte.”

Pahpao ahpw inda, “Kasarawi en tehnpas sarawio wia ehu pepehm laud ong ngehi oh nei serepein ni aht kehn ngehn sarawi laud. Met se kin ehu kohla oh kak kehn aht limpoak ah kin kehlailla.“

Kasarawihong Kauno nan mour en ehu ehu rahn kan kin iangahki ansou me irail akan me kitail poakohng pahn mehla. Nan tepin pahr et, ahi nohno, Jean Gong, ahpw kohla nan mour en pali ngehn mwohn ah sounpar 98.

Ma ke pahn idek rehn ahi nohno, “Ke mwahuki rocky road, white chocolate ginger, de strawberry ice cream?“ Ai nohnou pahn nda, “Ei, menlau, I kak song irail koaros? Ihs me kak nda “soh“ ong arail nohno, ahpw mehlel ansou me e pereniki neminem en mour koaros?

Mie pak me I idek rehn ahi nohno mehnia pilipil kan e wiahda me keieu kamwahuihala ah mour.

E koasoia, ”Sang ni ai pepdaisla oh wiahla towe en Mwomwodiso en Sises Krais en Souleng en Imwin-Rahn akan oh kohsang Hawaii ong Mainlando, wasa me I tuhwong ahmw pahpao.”

E pepdaisla ni ah-sounpar-15, ih kelehpw me wia towe mehlel en Mwomwodiso sang ah peneinei laudo, ahi nohno ahneki pwoson sang ah inou kan oh likilik rehn Kauno me kapaida ah mour oh pil kapaida kadoudouke kan koaros. I loaloidki ahi nohno, duwehte ahmw kin loaloidki tohn ahmw peneinei. Ahpw I ese me ahi nohno sohte salongala. Ihte me e sohte kin mihmi wasaht met. I kin wauneki ih oh irail akan me kin kasalehda karasaras mwahu en kasarawihong Kauno ehu ehu rahn akan.

Mehlel, kasarawihong Kauno nan momour en ehu ehu rahn akan me iangahki kokohdo rehn Kauno nan Sapwelime tehnpas sarawi. Met mehlel, mendahte ma kitail wia tohn Mwomwodiso de kompoakepah men.

Kempoakepah silimen me kohdo ni kasarawihn Tehnpas Sarawi en Bangkok Thailand.

“Wasaht wasahn kamwahu,“ emen irail ahpw inda.

Nan wasahn pepdaiso, emen koasoia, “Ansou me I mih met, I men kamwakelda oh mwakelekel oh sohte pwurehng wiahda dihp.“

Kesilimeno koasoia, ”Ke kak kehn manaman en ngehno?”

Lepin lokaia sarawi duwau, atail tehnpas sarawi kan kin wia luhk oh kalohk:

“Kasarawihong Kauno.“

“Tehnpas en Kauno.“

Kasarawihong Kauno kin elehiong momour en rahn akan ah kin sarawi. E kin karanih kitail ehng oh kaperenda Kauno oh emen emen kitail oh kaunopada kitail en kouson rehn Samatail Koht, Sises Krais, oh atail peneinei kan.

Duwehte kempoakepahio, ke mweihn medemedewe ma Samatail Nanleng poakohng uhk. Pasapengo iei mehlel, udahn ei! Kitail kak kehn sapwellime limpoak ni atail kin wia kasarawi ohng Kauno rahn koaros, ni peren oh me pahn kohkohlahte. Me kitail en wia met, I kin kapakapki ni mware sarawi en Sises Krais, ahmen.