Mengei Iei Rongamwahu en Sises Krais

Kitail koaros ahneki peneinei me kin alehdi kasongosong oh kin songosong sang doadoahk en Sehdan, me kin kawehla, me pahn kahreiong seri en Koht akan ahr pahn ahneki kahpwal. Ong pali laud en kitail, mie ansou me kitail sohte kak meir nihpwong kan. Kitail nantiong kapilkihpene irail akan me kin ahneki kahpwal soahng kan me mwahu. Kitail kin kapakapkin irail. Kitail kin poakohng irail. Kitail kin wia karasaras me keieu mwahu me kitail kak.

Alma, soukohp loalokong sang mahs, pil sohpeihong soahngen kahpwal ohte. Aramas akan me e kin kahluwa oh poakohng pil lelohnger nan kahpwal sang imwintihti kamasapwehk, ahpw re nantihongte en kaweid neihrail seri pwung kan nan sampah ieu me diren suwed. Alma medewe me ihte ah kopworopwor en kana iei ineng kehlail ehu me ekei pak kitail kin sohte medewehiong oh pak malaulau kin doadoahngki. E peki Sapwellimen Koht sawas.

Alma ese ma Koht en sawas, mie anahnepen koluhla sang irail akan me e kawkaweid, pil duwehte ah imwintihti kan. Ahpw, e pilada ehu soahngen wiepen mahwin.

Pwuhk en Mormon kin kawehwedi: “Eri met, pwehki ong ni kalohki mahseno eh kin kalapw kaluwa aramas en wia dahme pwung—ei, e kin mie lipwe laud nan en aramas madamadau kan sang ni arail pahn doadoahngki kedilahs, de soahng teikan, me kin wiawihong irail—eri ihme Alma medewekihda me e konehng irail en songkihong manaman en mahsen en Koht.”

Mahsen en Koht iei rongamwahu me padahk sang Sises Krais oh Sapwellime soukohp akan. Alma ese me mahsen en rongamwahuo ahneki manaman laud.

Nan18th ira laud eisek waluh en Doctrine and Covenants, Kauno ketin kasalehda poahson en Sapwellime rongamwahu:

“Pwe, kilang, I poahngoki aramas koaros wasa koaros en koluhla. …

“Pwe, kilang, Kauno ahmw Soundoar lokolongki mehla ni uduk; eri e ketin lokolongki medek en aramas koaros, me aramas koaros kak koluhla oh kohdo reh.

“Oh e ketin iasadahsangehr mehla, pwe en kak kapwurehdo aramas koaros reh, sang ni ahr pahn koluhla.“

“Oh ke pahn pwupwidi oh pwongih Sahmo ni mwarei.

“… Ke anahne koluhla oh pepdaisla, ni mwaren Sises Krais.”

“Peki rehn Sahmo ni mwarei ni pwoson, ni ahmw kamelele me ke pahn alehdi, oh ke pahn alehda Ngehn Sarawi.“

“Oh met, mwurin … ahmw alehdi met, ke anahne kolokol ei kosonned akan ni mehkoaros.“

“Alehda mwaren Krais, oh koasoia mehlelo ni maledek.

“Oh emen me pahn koluhla oh pepdaisla ni mwarei, me iei Sises Krais, oh dadaurete lel ni imwi, ih me pahn komourala.“

Nan ireh pwukat, Sounkomouro kin ketkihong kitail karasaras mwahu en mwomwen atail en padahngki Sapwellime rongamwahu. Rongamwahu wet iei pwoson Kaun Sises Krais, koluhla, pepdais, alehdi kisakis en Ngehn Sarawi, oh dadaurete lel ni imwi kin kapaiada Sapwellimen Koht serihkan koaros.

Ni atail padahngki tepin padahk pwukat ong irail akan me kitail kin poakohng, Ngehn Sarawio pahn ketin sewese kitail esehla mehlelpehu. Pwehki atail anahne kapehm kan en Ngehn Sarawi, kitail anahne soikalasang pein atail madamadau kan de pein atail kawehwehkan me laudsang padahngkan en rongamwahu mehlelo.

Met kak apwal en wia ni ahmw kin poakohng aramaso me ke songosong en kangoang. Mwein aramaso kin pohnsehse padahk kan me padahkehr. E wia kasongosong ieu en wia mehkot me kapw de kopwuriamwei. Ahpw Ngehn Sarawio pahn kasalehda ngehn en mehlelo ihte ni atail pahn keperiki oh kaneihong en dehr padahkih mehkot me laudsang rongamwahu mehlelo. Wiepen atail kak soikala padahk sapwung kan iei sand ni atail pahn pilada en mengei nan atail padahk kan. Pere kin kohsang mengeio, oh tikitik me salongala.

Padapadahk ni mengei kin mweidehng kitail en ehukihda rongamwahu en komouro ansou mwadang, ni ansou me seri kan pahn sohte kak alehdi kasongosong kan en soun likamwo me pahn mwuhr kohdohng irail, werei mwohn mehlel kan me re anahne kasukuhlki pahn duhkihla katairong en social media, iengarail kan, oh pein arail kahpwal akan. Kitail en doadoahngki ansou mwahu koaros en ehukihda padahk kan en Sises Krais ong serihkan. Ansou en padahk pwukat inenen kesempwal oh malaulau ong ni karasapene en doadoahk en pali en uhwongo. Awa koaros ni padahngkan ah kin wiawih nan an emen seri ah mour, pil miehte awa tohto me soun uhwongo kin audehki padahk oh kilel kan me kin uhwong de pohnsehse padahk en komour pwukat.

Ekei kumwail pahn medewe ma e pahn mwahu kumwail en karanihla noumwail serihkan sang ni amwail pahn kin pereperen pene, de kumwail pahn kin peidengki ma serio tepda toutoukihla ahmw padahk kan. Ahpw, kitail en medewehki met, “Pwehki ansou ah nohn tikitik oh sohte itar, soahngen koasoia en padahk mehlel dah me I pahn kak ehukihda pwe en kakelailih irail ong soahngen kahpwalo me udahn pahn uhwong ahr pwoson?“ Lokaia kan me ke pahn ehukihong irail rahnwet nek wia lokaia kan me re pahn kolokol, oh rahnwet pahn mwadangete nekila.

I kin kalapw medeweki en ahi nohno kahlap en mahs Mary Bommeli ah ngoang en ehukihda rongamwahu en Sises Krais. Ah peneinei alehdi padahk kan rehn misineri kan nan Switzerland ansou me e sounpar rieisek pahieu (24).

Mwurin ah pepdaisla, Mary inengiong en patehng Souleng ako nan Amerika, eri e kohsang Switzerland ong Berlin oh diarada doadoahk rehn lih emen me kihong ah doadoahk en kin wiahda likou ong ni peneineio. Mary mihmi nan perehn tohn doadoahk oh kihda ah mehn wiahda likou nan wasahn peneinei en ihmwo

Ni ansouo, padahki me pid padahk kan en Mwomwodiso en Sises Krais en Souleng-en-Imwin-Rahn akan ong souleng kan nan Berlin uhwongki kosonned en sahpwo. Ahpw Mary diarada me e sohte kak uhdihsang ehukihda soahng ko me e esehla. Lih en ihmwo oh kompoakepah kan kin kohpene kapilpene mehn wiahda likouo pwe re en rong padahk kan sang Mary. E koasoia duwen pwaradahn Samatail Nanleng oh Sises Krais ong Joseph Smith, pwareko en tohnleng kan, oh Pwuhk en Mormono. Ni eh tamataman ehn Alma wiewiahkan, eh padahngki padahk en Iasadahu. Eh kadehdehki me peneinei kan pahn kak pwurpene nan wehin selesdiel.

En Mary ngoang en ehukihda padahk en rongamwahu kopwurpwurdohu mwadahngete kahrehda kahpwal. Mwurin ansou kis pwolihs kan ahpw wahla Mary nan kalapwuhs. Ni ansou me re tangatang kohla, Mary ahpw kalelepek rehn pwolihso ia eden sounkopwung me pahn wia kopwung lakapwo. Mary pil kalelepengki duwen ah peneinei oh ma e wia pahpa mwahu men oh ohl pwopwoud mwahu men. Pwolihso kawehwehda me sounkopwungo wia ohl en sampah men.

Nan kalapwuhs, Mary pekihda pensel oh doaropwe kei. Nihpwong e intingida kisin likou ehu ong sounkopwungo, wiewia ah kadehde duwen Iasadahn Sises Krais me sansal nan Pwuhk en Mormon, koasokoasoi duwen sapwen ngehn, oh kawkawehwe duwen koluhla. E koasoiahda me sounkopwungo pahn anahne ansou en tehk mahs ah mour mwohn ah pahn uh mwohn kadeik lahso. E intingidi me e ese me mie dir me e anahne koluhkihla, me pahn kahrehda insensuwed laud ong ah peneinei oh pahn wahdong ih pahtou laud. Ni mensengo, ansou me e kanekelahr nah kisin likouo, e kieng polihs meno oh peki reh en wahla rehn sounkopwungo, eri e pwungki oh wia.

Mwuri, pilihsmeno pekipeklahng ni ohpis en sounkopwungo. Kisin likou me Mary intingidi wia mehn kadehde ehu me e sohte kak kamahmki me e wiewia padahk en kopwurupwurdohn rongamwahuo eri, sang ni ah wiewia met, e kawkawehla kosonned. Ahpw, e sohte werei me pilihsmeno pwuredo rehn Mary. E ndaihong me soahng koaros me uhwong ih kasohralahr oh e ahnekier saledek en kokohla. Ah padahngki kapwurupwurdohn rongamwahu en Sises Krais kahrehiong ah lekideklong nan kalapwuhs. Eri sang ni ah kalohkpen koluhla ong sounkopwungo e saledeksang nan kalapwuhs.

Ehn Mary Brommeli padahk kan sohte imwikihdi ah pidohi sang nan kalapwuhs. Rekord en ah lokaia kan kahrehda padahk mehlel en mie lel dih tohto me pil saikinte ipwidi. Ah kamehlele me aramas me apwtehn pepdaisla pil kak iang padahngki rongamwahu en Sises Krais kahrehda teng me kadaudoke kan pahn kehlailla nan pein arail mahwin kan.

Ni atail wia uwen atail kak en padahkih irail akan me kitail poakohng duwen Sises Krais, ekei mwein sohte pahn sapeng. Peikasal nek pidelong nan ahmw madamadau. Ke nek peidengki ma ke ese Sapwellimen Sounkomour rongamwahuo itarete pwe ken padahngki. Oh ma ke nantihongehr en padahngki, ke pahn kak medewe dahme e saikinte doadoahngki. Ke dehr lohdi nan peikasal pwuhko. Sohpeilang Koht ong sawas.

“Ei, oh peki rehn Koht en ketin seweseiuk nan mehkoaros; … Mweidohng audepen mohngiongamwail en tengeteng rehn Kauno kohkohlahte.“

“Oh met I men kumwail en karakarahk, oh mpai oh kadek; mengei en alehda kaweid; diren kanengamah oh nannanti nan apwal; kin kaunda nsenemwail kan nan soahng koaros; kin loalloapwoat kolokol kosonned en Koht akan ahnsou koaros; kin kapakapki soahng koaros me kumwail anahne, nan pali ngehn oh paliwar; kin kapikapingkihong Koht ahnsou koaros soahng kan koaros me kumwail alehdi.“

Ma ke kin kapakap, ma ke kin koasoihong Koht, oh ma ke kin peki Sapwellime sawaski kompoakepomw kan, oh ma ke kin kapingkihong Ih kaidehn ongete sawas ahpw pil kanengamah oh nsenamwahu me kin kohsang ahmw sohte alehdi nin duwen nsenomw kan ansou mwadahng de mwein sohte pahn alehdi douluhl, eri I pahn inoukihong uhk me ke pahn kin karanihong Ih. Ke pahn wiahla loalopwoat oh kanengamah ansou werei. Eri ke pahn kak ese me ke wiadahr soahng koaros me ke kak wia en sewese irail akan me ke poakohng oh kin kapakapki weweid mwahu nan ehn Sehdan kasongosong en kesehdi irail.

“Ahpw irail kan me kin koapworopworki Kauno, pahn onehda sapahl ar kehl. Re pahn kin kehlail, rasehng ikel kan; ni ar pahn kin tang, re sohte pahn pwangada; ni ar pahn kin alu, re sohte pahn luwetala.”

Kitail kak diarada koapworopwor nan iren pwuhk sarawi duwen peneinei kan. Kitail kin wadek duwen irail akan me kin sohpeisang dahme irail kasukuhlki de irail akan me kin pekipeki mahk rehn Koht, me duwehte nein Alma pwutak Alma, nein Mosaia pwutak kan, oh Ihnos. Ni arail lelohng nan kahpwal, irail tamanda mahsen kan en arail pahpah oh nohno kan, mahsen en rongamwahu en Sises Krais. Tamataman doare irail. Ahmw padahngki padahk sarwio pahn mihmihte.

I kadedehki duen doadoahk sarawi en padahk ong Sapwellimen Samatail Nanleng serihkan padahk mengei duen Sises Krais, me kahrehiong kitail en mwakelekelda ni pali ngehn oh pahn kak kasamwohiong kitail rehn Koht, oh kousonla Reh oh Sapwellime Iehros ni lingan kohkohlate. Ni mwaren Sises Krais, ahmen.