Rahn akan me Sohte Pahn Manokonokala

Riei souleng ko, poadoapoad en Mwomwohdiso en Sises Krais nan rahn pwukat inenen lingalingki soangen doadoahk sarawi tohto me kin kasalehda mwomwen Kauno ah kin ketin kaweid Sapwellime Mwomwohdiso. Mie erein sounpar eisek ieu nan atail poadoapoad, me, inenen sikilahsang koaros—erein sounpar eisek wet iei sang pahr 1820 [kid welipwiki rieisek] lel 1830 [kid welipwiki silihsek]. Tepikihda dahme Soukohp Sosep Smith esehla nan wel sarawio nan pahr 1820 [kid welipwiki rieisek], ansou me e kilangadahr Koht Sahm oh Sapwellime Iehros, Sises Krais, oh pil doulahte lel Eiprel 6, ansouo weksang ansou teikan koaros.

Medewe mwekid kapwuriamwei pwukat! Soukohp pwulopwul menet koasoihong tohnleng Moronai, kawehwehdi pleit kohl ko, oh intingihada Pwuhk en Mormon! Ih me wia dipwisou en doadoahk me kopwurehdo prihsduhd en Aron oh Melkesedek, oh mwuri e ahpw kauwada Mwomwohdiso wet! Oliver Cowdery kawehwehda mwahu duwen ansouo: “Rahn pwukat iei rahn kei me sohte pahn manokonokala.“ Soangen mwekid kapwuriamwei pwukat wihwiawihte leledo rahnwet.

Ma I kak komwad ien inda me pahret kitail tapihadahr erein ansou ieu me kak kasalehda ah wia ansou kesempwal duwehte ehu me wiawiher mwurin ansoun koukoudaho kerenieng sounpar riepwiki samwalahro.

Mweidada ien kawehwe. Nan pwungen pahr 2024, oh 2034, kitail pahn lelohng mwekid kesempwal kan me pahn elehda ansou kaselel kan en papah, ehuieng towe kan oh iengatail akan, oh pil kapehsehiong Mwomwohdiso en Sises Krais en Souleng en Imwin-Rahn akan ong aramas tohto sang mahso.

Kitail apwtehn kilangedi duwen ansou manaman ehu nan poadoapoad me sohte kak manokonokala ni atail patehngehr aramas ngehder oh kawawiher ipwidi en Preseden Russell M. Nelson ah lelehr sounpar 100 [epwiki].

Ni ahr repwohtki en Preseden Nelson ah ipwidio, Newsweek intingadahr oaralap ehu me koasoia, ”Kaun en Palien Lamalam En Sampah me Keieu Mah Lelehr Sounpar 100.” Irail ahpw kairakidi kaun en palien lamalam 10 [ehk] me keioun mah nan sampah—Preseden Nelson me tieng nan ireko me iangahki Pope Francis oh Dalai Lama.

Ire wet sang nan ehu New York Times repwoht kin weliandi pepehm en tohtohn palihkan en repwoht: ”Ni ansoun usuhs en preseden nan [United States] ah kin wiewiawi tapihadahr roprop ehu duwen mamahla oh pwukoah en kakaun, En Mr. En Nelson ansou kesempwal wet kasalehda me, nan ah Mwomwohdiso, sounpar me nempe-siluh sohte kin kahrehda kolkolpenehn peh kan ni saloh. E wiahte aramas dehde men rehn towe kan en mwomwohdiso, me kin wiahki ahr preseden kaidehnte kaun emen ahpw emen ’soukohp, sounkairoir, oh sounkaudiahl.’”

Ia uwen atail kapingki en Preseden Nelson ipwidi ah kihiong kitail ansou mwahu en kapehsehiong tohn sampah soukohp en Koht men, kamadipw ehu me sohte pahn manokonokala.

Nin tepin pahr wet, wasa kapw ehu pohn Temple Square—me kin kasale pilaik kan en sahpw tohto kan me Mwomwohdiso wet kin mihmi ie—ahpw kasansaladahr. Wasahn pidelong en wasao kilelki takai lap ehu me intingdier mahsen en kokohp pwukat powe: ”Ni rahn ekei me pahn kohdo, nahnao, was me Tehnpas Sarawio kokouda ie, pahn wiahla nahna keieu ile, ilehsang dohl akan koaros. Wehi tohto pahn kin pokondohng rehi.”

Ni mehlel, mwekid kopwuriamwei kan me pahn wiawi erein sounpar eisek kohkohdo pahn wia kisehn ehu kasansal me kokohp en Aiseia wet wihwiawiher.

Medewe uwen tohtohn tehnpas sarawi kan me pahn ritida oh kasarawihla me koasoandier en wiawi nan erein sounpar eisek kohkohdo, e pahn kakete tehnpas sarawi meh 164 [epwiki weneisek pahieu] de tohtohsang. Medewe kowe oh kompoakepahmw milien kei amwail alialu nan tehnpas en Kauno ieu. Kasalepen kemwekid pwukat iei kasarawi me pahn pwurehng wiawi ong Tehnpas Sarawi en Salt Lake oh kemwekid kan me wia kiseh. Mepwukat pahn wia rahn akan me sohte pahn manokonokala.

Pahr Riekid silihsek mie song mwahu tohto pahn wiawi ong sampah pwon pwe en kasarawihala sounpar riepwiki ni koukou dahn Mwomwohdiso wet. Mendahte ah nohn karwaruhla koasoiepen kekeirdahn Mwomwohdiso wet, e pahn udahn mweidohng kitail en luke atail peneinei, kompoakepatail kan, iengetail kan, oh soangesoangen aramas teikan en “kohdo oh kilang” oh en esehla duwen manaman laud me e wia nan mour en towe kan en Mwomwohdiso wet.

Nan 2034, aramas lapalap, aramas me pwarek kan, oh soun mwadong kan sang wasa koaros nan sampah me kid kei pahn audaudehla ahl akan en Salt Lake City, en patehng Winter Olympic Game kan. Mwein e pahn sohte ehu wiepe lapalasang met nan sampah me rasehng ehupene me mih ni Olympic Game kan. Mahs koaros nan sampah kan pahn mih pohn Mwomwohdiso wet oh towe kan, me pahn kihda soangesoangen pwukoahn kan en sawas, papah, oh ehukihda rohng mwahu sang ni wiewia kadek kan—mwekid ehu me sohte pahn manokonokala.

Mwekid kohkohdo pwukat pahn kahrehiong towe kan en Mwomwohdiso wasa koaros me re mihmi ie lapalahn ansou mwahu kan en ehukihda rohng mwahu en rongamwahu en Sises Krais sang ni koasoi oh wiewia, ansou ehu me sohte pahn manokonokala.

Nan mihting ehu wihk kei mwohn ah rahn en ipwidio, Preseden Nelson ehukihwei kahrepen ah kesempwaliki lepin koasoi “rohng mwahu kan.“ Ni sansal, e kasalehdahr, lepin lokaia wet kin direki popohl oh peren. Ahpw “rohng mwahu“ kin wehwehki mehkot laudsang mwo. E kawehwehda me lepin koasoi pwoatet kohdo sang ni lepin koasoi en Kirihk euangelion, me wehwehki “Rohng Mwahu“ de “rongamwahu.” Peren oh popohl nan mour wet oh nan mour me pahn kohdo kin ansou koaros wia kisehn rongamwahu en Sises Krais. Eri lepin lokaia “rohng mwahu kan“ koledi wehwe pwukat ni wiepe kaselel ehu.

“Ohl [oh lih] me, pwe ira en kak ahniki peren.” Samatail Nanleng ketkihda pilahn en peren me pahn wahdo popohl sang ni Sapwellime kapai kan. Mepwukat iangahki kousoan Reh kohkohlahte nan peneinei kan. Tomwpen Sises Krais me wia poahsoan en Sapwellimen Koht pilahn en doarei kitailla. Pwe kitail en kak alehdi mour soutuk, kitail anahne kohdo rehn Krais. Ni atail pahn wia “oh sewese mehteikan en wia soangen mwohmwohte, kitail iang wia Sapwellimen Koht doadoahk en komour oh mour soutuk.”

Padahk wet en rohng mwahu en rongamwahu en Sises Krais iei me keieu kesempwal pohn sampah. Oh met wasa me me pwulopwul kan oh YSA en Mwomwohdiso kan pahn patehng ie.

Eri, pwe ansou kei pahn kohdo kak audaudki rahn ekei me sohte pahn manokonokala ong towe kan koaros en Mwomwohdiso, met udahn pahn mehlelihong kumwail dih kekeirda met. Ke mihmi pohn sampah met pwe ke pilipildahr ke en mihmi met ansou wet. Ke ahneki kehl oh koaiehk en wia tohnpadahk en Krais kei ni wiepe ehu me kitail saikinte kilang.

Preseden George Q. Cannon padahngki, “Koht ketin koasoanedier ngehn kan ong mwehi wet me eimah oh loalopwoat en sohpai sampah oh manaman kan koaros en me suwedo, [oh en] … kauwada Saion en atail Koht oh sohte periki mehkot.”

Ong ni kaimwseklaho, I men lokaiaheng kumwail dih me kekeirda, en luke kumwail en medewe ia uwen kaperen en ansou kan me kohkohdo, ansou ehu me sohte pahn manokonokala, e kak wiahla met ong uhk. I pil men kihwei koasoi en kaweid oh kangoang kan me pahn kakehlailih iuk erein ansou kohkohdo wet.

Duwehte pali laud en kumwail, I naineki smartphone ehu me, ekei pak oh ni ahi sohte wia mehkot, kin kihpene kilel kan me kin kasalehda dahme I wiewia ehu rahn. E kin inenen kapwuriamwei ahi kilang uwen lauden wekidekila me wiawihong ie oh ahi peneinei mwurin pahr kei.

Medewe kilel kan noumw sehl pahn kihda sounpar 10 [eisek] sang met! Ke kak medewe ahmw neksang high school de college, alialehdi ahmw endaumen, iang kohla wia ahmw misin, pwopwoudla, oh nainekihda noumw mesenih. Ong pein uhk, met pahn wia ansou ehu me sohte pahn manokonokala. Ahpw e pahn pak riau laudsang ama ke nantiheng wia kamarain en sampah nin duwen rohngamwahu en Sises Krais ah pahn kak kadirehla oh kalaudehla kaidehn ongete pein kowe ahpw pil ong amw peneinei, kompoakepahmw kan, oh irail akan me kin idawehn uhk nan social media.

Ke mwein pahn medemedewe ia mwomwen ahmw pahn wia met.

Soukohp en Koht akan padahkiong kitail mwomwen atail pahn wia met sang ni mwekid pahieu, me kahdanki pwukoah sarawi kan: keieu, momouriki rongamwahu en Sises Krais; keriau, apwapwalih irail akan me anahne sawas; kesiluh, lukeihong koaros en iang alehda rongamwahuo; oh kapahieu, katengtengpene en peneinei soutik. Ni kapwuriamwei, ehu ehu kak wiawi ni ahl ekei me soanamwahu oh kaselel.

I inoukihong uhk me met pahn wia ansou ehu me sohte kak manokonokala ong uhk ma ke pahn alehda pwukoah sarawi pahieu pwukat. Kitail medewe mahs dahme met pahn kak pidada.

Keieu, momourki rongamwahu en Sises Krais. Onopiki mahsen en soukohp akan, oh esehla poakohng Semomw Nanleng. Kihong Ih mohngiongamwail akan, oh nantieng alu pohn Sapwellime ahl. Kehlailkihda “kopwoaropwoar en inou kan” me Elder Ulisses Soares kawehwehdahr. Kopwoaropwoar wet kin kohsang wiawidahn inou kan pwe ken idawehn Sises Krais, ni ahmw ese me Sounkomouro pahn ketin kakehlaka oh sewesei uhk.

Mweidehng kompoakepahmw kan en kilang popohl me ke ahneki sang ni ahmw momouriki rongamwahuo, oh kowe me pahn wia padahk en rongamwahu me re keieu pwungki.

Keriau, sewese irail akan me anahne sawas. Ahmw dih kin pohnese irail akan me mih nan kahpwal. Ansou me kahpwal pahn kin kohdo oh towe kan en Mwomwohdiso pahn mwadahngete kohla sawas kamwakehlehda ahl akan oh sewese irail akan me insensuwedla, E mwomwen pali laud en irail akan me likawih seht en ”Helping Hands” iei me pwulopwul kan de sounpar rieisek samwa kan. Iei me koasoandi ”sawaskipene amwail wisik toutou kan” oh ”koaloalamwahwih irail akan me anahne koaloalamwahu.” Sang ni atail kin wia met kitail ”kapwaiada kosonned en Krais.”

Evan, kisin pwutak en Praimeri-men, pilada en doadoahngki ah ansoun summer sang ah kin kihpene mehn wiahda peanut butter oh jelly sandwiches pwe en iang tohnmeteikihong palien food bank. E diarada project wet pohn JustServe website. Evan pil kapidolong ienge tohn skuhl ko pwe ren sewese kihpene pwoatoal en jelly dirisang meh 700 [isipwiki]! Mweidehng aramas akan me ke kin papah en ese me ahmw kin medemedewe irail kin tengeteng nan amw limpoak ong Koht oh ahmw ineng en apwalih mehn impomw kan duwen ahmw kin apwalih pein kowe.

Kesiluh, luke aramas koaros en alehda rongamwahuo. Nan pahr wet se tapihada misin kapw 36 [silihsek wenou] pohn sampah pwe en apwalih koaros me inengieng en wia arail misin. Nan ansou wet me me pwulopwul tohto solahr iang patehng wiewia sarawi kan, met inenen koapwuriamwei oh e kasalehda uwen kaselel en amwail kadehde kan. Mendahte ma ke wiewia ahmw misin ansou koros de lepin ansou soh, menlau wehwehki uwen lauden ahmw kak wia karasaras mwahu ong iengomw kan oh luke irail en songada rongamwahu en Sises Krais.

Kapahiou, katenepene peneinei kan ong mour soutuk. Ni ahi kin pwarek tehnpas sarawi kan wasa koaros nan sampah, I pwuriamweikihla pokon en me pwulopwul me kin awiawih ni wasahn papdaiso oh pil tohtohn me pwulopwul kan ahr wia tohn doadoahk kan nan wasahn wia tiahk sarawi kan. Me keren pwihn pwulopwul tohtohsang meh 600 [wenepwiki] sang Scotland oh Ireland seiloak ong ni Tehnpas Sarawi en Preston England, oh wia tiahk sarawi tohtohsang meh 4,000 (pahkid), me tohto iei arail peneinei me mehlahr akan! I kangoangekin uhk ken loalopwoatiheng doadoahk en ahmw keinek kan, pwilikihdi ansou en mihmi ni tehnpas sarawi kan, oh ni keneinei kaunop uhkada pwe ken kak wia ohl de lih me onopada oh warohng en pwoudkihda emen me pil warohng nan tehnpas sarawio. Wiahda mwohmw ehu nan ahmw mour met me kahrehiong tehnpas sarawi en wia mehkot kesempwal nan ahmw mour.

Riei souleng ko, kompoakepahi pwulopwul ko, mie kahpwal me pahn kohdong emen emen kitail nan rahn akan me pahn kohdo. Ahpw, ni atail pahn pidelong nan ansou kesempwal wet, kitail en ehukihda rohng mwahu kan sang ni mwekid mengei kan en momourki, apwahpwalih mwahu, lukuluke, oh eiehupene. Ni atail pahn wia met, Kauno pahn ketin kapaikinuhkda pepehm oh wiewia kan me sohte pahn manokonokala.

I kadehdehki me koaros me alehda Kauno ni mohngiong karakarahk oh ineng mehlel, koaros me kin padapadahngki Mwaren Sounkomouro oh Ngehn Sarawio nan palingenerail kan, koaros me pahn iang seiloak lap oh kaselel wet pahn diarada oh esehla kapai me tohto en wehin selesdiel oh alehdi kadehde me Koht kin ketin karonge iuk, mwangih iuk, oh poakohng uhk. Ke pahn lelehng rahn ekei me ke sohte pahn manokehla. Ni mwaren Sises Krais, ahmen.