Kapeian Inengitail ong Kupwure

Nan ansou ehu, Sounkomouro ahpw soaiehdahr duen olen soun netnet men ah raparapahki “takai kesempwal kei.” Ni ansou me olen netneto wie ropropseli, e diaradahr ehu me “keioun kesempwal.” Ahpw, pwe en kak alehda takai lingan wet, ohlo anahne netkihla soahng koaros me e ahneki, oh ihme e mwadangete wia ni pohpohl.

Sang ni karasaras mwotomwot oh audapan wet, Sounkomouro ketin doadoahngki karasaras wet oh padahngki me wehin nanleng rasehng takai kesempwal ehu, ni mehlel, ih me keioun kesempwal me aramas konehng men alehdi sang meh koaros. Soun netneto ah mwadangete netkihla soahng koaros me e ahneki pwe en kak alehda takai kesempwalo kasalehieng kitail ni mehlel me kitail anahne kapeianehng inengitail ong kupwuren Kauno oh pein wia soahng koaros me kitail kak nan mour wet pwe kitail en alehdi kapai soutuk kan en wehin Koht.

Pwe kitail en kak warehng kisakis wet, ehu kisehn me kitail anahne wia kan, iei kitail en wia wen atail kak koaros oh pwilikihdi atail kin medemedewehte pein kitail oh soikala mehkot me kin kalopihkitail sang atail pahn kin mehlelieng Kauno oh Sapwellime wiepe sarawi kan. Wahnpoaron Pohl sairada wiepen kawekala sarawi duehte “ese duwen kupwur en Kaun-o.” Ni Sises Krais ah ketin kasaledahr, met wehwehki “[wihwia] ansou koaros soahng kan me [Kauno] kin ketin kupwurperenki“ nan atail mourkan, de me tohto aramas kin indahki nan rahn pwukat, met iei “wihwia dahme kak rehn Kauno.“

Nan rongamwahuo, “[wihwia] ansou koaros soahng kan me [Kauno] kupwurperenki” pid atail kin kiheng atail ineng pahn Kupwure. Sounkomouro padahngki kesempwalpen ire wet nan Sapwellime padapadahk ong Sapwellime tohnpadahk ko:

“Pwe I kohdihdo sang nanleng pwe I en kapwaiada kupwur en Ih me ketin kadariehdo.

“A iet kupwur en Sahmo me ketin kadariehdo, Ien dehr kasalongehla emen sang rehn koaros me e ketikihongieier, a Ien komourirailla ni imwilahn rahn.

“Pwe iet duwen kupwur en Semei me kadariehdo, irail koaros me kilang Sapwellimeo oh pwoson, re en ahneki mour soutuk: oh I pahn komourada ih ni imwilahn rahn.”

Sounkomouro alehdi uwen karakarahkala ehu me unsek oh sarawi ong Sahmo ni Eh kin mweidehng nsene en duhla pahn kupwuren Sahmo. E mahsanih ehu ansouo, “Oh ih me ketin kadariehdo kin ketin ieiang ie: iei me e sohte ketin likidmeliekiniehla, pwehki ei poaden wiewia mehkan me e kin ketin kupwurperenki.” Ni Eh ketin padahkihong Joseph Smith duen kamedek oh kaweirek en Tomwo, Sounkomouro ketin mahsanih:

Pwe kilang, Ngehi, Koht, alehier lokolok ong koaros, pwe koaros en dehr ale lokolok ma irail pahn koluhla; …

Lokolok me kahrehieng pein Ih, Koht, me lapalapasang koaros, en rerrer pwehki weirek, oh nta keredi sang nan pwoaren pwudau koaros, oh lokolok ni paliwar oh palingehn—oh sohte men sakan kepin pihl katiko oh men en kapwurupwur sang Ih—

Ahpw, kaping ong Sahmo, oh Ih alehier oh kanekelahr sapwellime kaunop ong seri en sampah kan.

Nan erein atail mihmi nan mour wet, kitail kin kalapw pwunodki dahme kitail wiahki me kitail ese, dahme kitail leme me keiou mwahu, oh dahme kitail wiahki me keiou pwung ong kitail, ahpw sohte kin song en wehwehki dahme Samatail Nanleng udahn mwahngih, dahme mwahu ong mour soutuk, oh dahme udahn pwungehng seri en nan Sapwellime pilahn. Pingiping en loaletail wet kak apwalla, ni mehlel atail kin medewe kokohp akan sang nan pwuhk sarawi kan ong atail mwehiet: “Ni imwin rahn akan … aramas pahn roporop ong pein irail, … re pahn inengieng pein arail peren laudsang kupwur en Koht.”

Ehu kilelepen kepweipweida en kokohp wet iei mehkot me rekila pohn sampah, me diren aramas mihlahr loale, me aramas arail kin medemedewehte pein irail oh kin kalap nda, “Mendahte dahme pahn wiawi, I pahn wia dahme I nda me pwung de dahme pwungehngie.” Nin duen Wahnpoaron Pohl mahsaniher, re “nsenohkihte pein arail mwekid kan, ahpw kaidehn doadoahk en Sises Krais.” Madamadau wet “manlahr” rehn aramas akan me kin raparapahkihte me mwahu ong pein irail, pein arail nsen, men kamwahuih arail wiewia kan me sohte pwungehng sapwellimen Koht pilahn oh Kupwure ong irail, kin kalapw akipwungki me met mwau pwe re “mehlelieng pein irail.” Ma kitail mweidohng atail mwongiong oh atail madamadau en utung soangen madamadau wet, kitail kakete kahpwaliala atail pahn kak alehdi takai kesempwal me Koht me diren limpoak kaunopehngehr Sapwellime seri kan—me iei mour soutuk.

Mendahte ah mehlel me emen emen kin kelehpw alu nan atail seiloak en tohnpadahk on elen inouo, songosong en kainene atail mwohngiong oh atail madamadau ong Sises Krais, kitail anahne kanaiehng oh tetehk mwahu pwe kitail dehr pwupwidieng nan kasongosong oh elehieng nan atail mour soangen madamadau en sampah wet. Elder Quentin L. Cook nda me kahlmangih Krais inenen kesempwal sang atail kin songosong en mehlelehng pein kitail.”

Kempoakepahiko, ni atail pahn pilada kitail en mweidehng Koht en wia ahng me keioun kehlail nan atail mour me lapasang soahng kan me kitail koadoakoadoahke ong pein kitail, kitail kin keirda nan atail idihdawehn Krais oh kalaudehla atail kak en ehukihong Soukomouro loaletail oh atail madamadau. Ahpw, ni ansou me kitail sohte mweidehng Koht en kaunda atail mour, kitail kin kelehpwla, oh ni atail solahr alehdi Sapwellimen Kauno kaweid, kitail pahn kak akipwungki soahng koaros me kitail kin wia de sohte wia. Kitail pil kak kamwahuiheng pein kitail ni atail pahn kin idawehn pein atail madamadau, oh kin nda, “ih mwomwen ai kin wia met.”

Ehu ansouo, ni ansou me Sounkomouro kasakasalehda Sapwellime padahk, ekei aramas, ni mehlel Parisi kan, soikala Sapwellime padahk oh soumahkki arail koasoia me irail nein Eipram seri, oh wiahki me pwehki arail keineko irail kesempwalsang mehteikan pahn sihlangin Koht. Madamadauwo elehieng irail en kamehlelehte dahme irail ese oh sohte kamehlele dahme Sounkomouro padapadahngki. En Parisi ko arail lokaia oh mwokid ong Sises kasalehda me loallap en loalerail sohte mweidehng Sapwellimen Sounkomouro mahsen oh Sapwellimen Koht wiepe en pidelong loalerail. Ni Eh ketin sapeng irailo, Sises ni eripit oh komwad mahsaniheng irail me ma irail udahn nein Eipram serihn inou kei, irail pahn wia en Eipram doadoahk kan, mehlel pwehki Koht en Eipram ah ketket mwohrail and padapadahkiheng irail mehlelo ni ansouo.

Rieiko, nin duen amwail esehier, kahpwal en pilada oh idawehn “dahme pwungehng ie“ oh wihwia “dahme pwungehng Kauno“ kaidehn mehkot me kapw oh ongete atail mwehiet. Madamadau wet sangete mahs oh wie momour kohdo sounpar kid kei oh kin kalapw perehla mesen irail akan me kin wiahki me irail loaloakong oh kapweipweihda oh kaluwetihala diren Sapwellimen Koht seri kan. Madamadau wet, ni mehlel, wia wiepe ehu me sang rehn imwintihtio; E wia ahl sued ehu me kin ekis ekis kakahluwa Sapwellimen Koht seri kan sang elen inou me mehlel oh pwung. Ni pein atail irair kan me duwehte atail intahn keinek kan, wasahn kousoan, oh kahpwal en paliwar oh madamadau kin kak katanga atail seiloak wet, ahpw nan mehkan me udahn kesempwal, e kin miehte wasahkei me kitail ahnekihte saledek en pilada ma kitail pahn de sohte pahn idawehn wiepe me Kauno ketin kaunopadahngehr atail mour. Ni mehlel, “E ketin kileledier ahlo, Oh [kawehwedier] wasa kesempwal koaros.”

Nin duen atail wia Sapwellimen Krais tohnpadahk kei, kitail kin men alu nan ahl me E ketin kilelehiong kitailehr nan Sapwellime doadoahk en sampah. Kitail sohte kin inangihte kitail en wia Kupwure oh soahng koaros me pahn kaperenda Ih ahpw kitail pil kin nantiheng kahlmangih Ih. Ni atail pahn kin nantiheng mehlelieng inou sarawi kan koaros me kitail wiadahr oh momourki “mahsen koaros me kin pwilipwilsang nin doauesen Koht,” kitail pahn silasildi pwe kitail en dehr lohdieng nan dihp oh sapwung en sampah —sapwung kan en madamadau oh padahk me pahn kahluwa kitail sang takai keiou kesempwal ko.

Palingeni kin kehlailkihda soangen karakarahk en palingehn ong Koht ah wekidalahr mour en Sapwellimen Krais tohnpadahk pwoson kan ni arail kin pilada en wia soahng kan me pwungohng Kauno. I ese mwahnakapw men me sohte nohn soanamwahuki en iang doadoahk en misineri ahpw uhd alehdi kehl en kohla oh papah Kauno ni ah rong emen kaun en Mwomwohdiso wet ah wia ah kadehde oh koasoaiahda mwehkid sarawi kei me e lelehng ni ah wia ah misino.

Ni pein ah lokaia, mwahnakapw menet, me pwurasangehr ah misin, pein ndahla: “Ni ai rong kadehdehu me sang emen Sapwellimen Sounkomour Sises Krais Wahnpoarono, I kehnda sapwellimen Koht limpoak ohng ie, oh I men ehukiheng mehteikan limpoako. Ansouote I esehier me I konehng iang misin mendahte ah miehte mehkot me I periki, soukoapwoaroapwoarki, oh pwunodki. I kehnda koapwoaroapwoar laud ong kapai oh inou kan me sang Koht ong Sapwellime seri kan. Rahnwet, Ngehi aramas kapw men; Mie ai kadehdepen mehlel en rongamwahu wet oh me Mwomwohdiso en Sises Krais kapwurupwurdohngehr sampah.” Mwahnakapw menet pilada Sapwelimen Kauno ahl oh wiahla karasepen tohnpadahk mehlel nan soahng koaros.

Peinakapw pwoson men pilada en dehr kawehla ah koasoandi en likou mwahu ni ansou me tohn ah wasahn doadoahko peki reh en likawih likou me sohte mwomwahu pwe en pwungehng nan wasahn doadoak en pelien fashion. Pwehki ah wehwehki me paliwereo iei kisakis ehu sang Samatail Nanleng oh wia wasa me Ngehno kak ketket loale, e pilada en momourki koasoandi ehu me ilehsang koasoandi en sampah. E sohte wiahlahte aramas en koapwoaroapwoar nan mesen irail akan me kilang ah wie momourki mehlel en rongamwahu en Sises Krais, ahpw e pil kolokolete ah doadoahko, me e kerenieng sohla ahnekio. Ah kin men wia dahme pwung ong Kauno, ahpw kaidehn dahme pwung ong sampah, kahrehieng en ahneki koapwoaroapwoar en inouo nan ansou en pilipil apwal.

Rieiko, ansou koaros kitail kin lelehng soangen pilipil wet nan atail seiloak en rahn koaros. Kitail anahne loaletail en kehlail oh onopada pwe kitail en kak uhdi oh kadeik pein kitail ni karakarahk pwe kitail en kak kilang luet en pali uduk nan atail mour me pahn kak kerempwa atail pahn kiheng Koht atail mour, oh laoh kitail pilada kitail en alehda Sapwellime ahl, kaidehn pein atail ahl. Kasalepe keioun lap duen atail wia Sapwellime werek kei mih nan inengieng soikala mwomwetail kan oh kiheng Koht loaletail oh ngenetail unsek pwe kitail en anekihla Kupwure.

Ehu ansou me keioun lingan nan mourwet kin wiawi ni atail kin diarada popohl kitail kin alehdi ansou kitail wihwia soahng kan koaros me “pwung ong oh kaparanih Kauno“ oh “dahme pwung ong kitail“ kin wiahla ehu oh soahngetehieu! Pwe kitail en katengehdi oh ahnekihla kupwuren Kauno ni soh peikasal anahne tohnpadahk en Krais me kaselel oh soumahk ki atail kalmangih! Ni ansou kaselelo, kitail pahn kasarawihengala Kauno, oh kitail kiheng Ih atail ineng kan koaros. Soangen karakarahk en palingehn wet inenen kaselel, manaman, oh kin kaweliakapwih aramas.

I kadehdehieng kumwail me atail kin idawehn kupwuren Kauno nan atail mour, e pahn elehieng kitail en diar takai keiou kesempwalo pohn sampah—me iei wehin nanleng. I kapakapki me emen emen kitail, ni ah pahn lel atail ansou, pahn kak nda, ni koapwaroapwoar en inou, ong Samatail Nanleng oh Sounkomour Sises Krais me “dahme pwung ong Komwi, pwung ong ie.” I patohwan mepwukat ni mwaren Sounkomouro Sises Krais, ahmen.