“Kilang Ngehi Me Maraino Me Kumwail Pahn Kolada”

Ong kadede tohto kan nan tupene lap wet, I patehng ahi kadede me Sises Krais iei Sapwellimen Koht Ieros, atail Kaun oh Sounkomour, Soundor en Samatail Nanleng seri kan koaros. Sang ni Sapwellime tomwo, Sises Krais ketin kahrehiong atail kak, ma kitail warohng, en pwuralahng sihlangin Koht me ketket Nanleng oh mih rehn atail peneinei kan kohkohlahte.

Sounkomouro sohte ketlahsang kitail nan seilok en mour wet. Rahn riau wet kitail karonge Sapwellime mahsen sang rehn Sapwellime kaun milipilip kan pwe kitail en karenih Ih. Ansou koaros, sang ni eh limpoak mehlel oh mahk, E ketin utung kitail ni ansou en kapwal akan. Nihpai kasalehda: “Ei Koht me wia kakehlepei; ih me ketin kahluwaie sang nan ei kahpwal akan. … E ketin audehkinie sapwellime limpoak.”

Limpoak wet iei mehn kasansalpen atail utuht ohng emen emen nan Sapwellime doadoahk.

Kitail utung atail soukohp nan kapokon lap, oh Presedensi Keieu, Wahnpoaron Ehk-Riemenko, Kaun Lapalap teikan, oh Tohn Doadoahk kan en Mwomwohdiso. Utung wewehki en kolada lahp emen, kihong irail atail ahng, en mehlelohng arail likilik, en kapwaiada arail mahsen kan. Re kin lokaiahki kaudiahl en Kauno; re wewehki kahpwal akan en ansou wet, madamadau me wie susuwedla, oh ehn imwintihtio doadoahk en uweng Sapwellimen Kauno koasoandi kan me kin wie lalaudla. Ni atail kin kawada pehtail kan, kitail inoukihda atail utuht, kaidehnte nan ansouo ahpw erein atail mour.

Utuht kin iangahki kawada peh ong atail steik preseden kan oh pisop kan, kuorum oh kaun kan, oh iangahkihte tohn apwalih kamp nan ward kan oh steik kan. Karenih imwatail, kitail kin utungada atail pwoud kan, neitail seri kan, pahpa oh nohno kan, peneinei lap, oh mehn mpatail kan. Ni atail kin utungada emen emen met wewehki, “I mihmi met pwehki kowe, kaidehn en kawadahte pehmw kan ansou me re ‘lahngdi pah’ ahpw en wia mehn kansenamwahu oh kakehlepomw.

Madamadau en utungada tepda sang nan pwuhk sarawi. Ni Pihl en Mormon, irail me tohn mwomwohdiso me apwtehn pepdaisla inoukihda “me re pahn wahda en emen katoutou kan pwe irail en kak marahrahda; … [en] kaloalamwahuih irail kan me anahne kaloalamwahu, oh wia sounkadehde en Koht nan ansou kan koaros oh ni soahng kan koaros, oh wasah kan koaros.”

Ong mehn Nihpai ko, Sises ketin mahsanih: “Kawada amwail marain pwe en kak kamarainih sampah. Kilang ngehi me maraino me kumwail pahn kolada.” Kitail kolada Sapwellimen Kauno marain ni ansou me kitail kolokol teng atail inou kan oh ansou me kitail utung soukohp ieias ni eh padahngki mahsen en Koht.

Preseden Russell M. Nelson mahsanih, ni ansou e wie papah nan Pwihn en Wahnpoaron ehk riemen ko, “Atail utuht en soukohp akan iei pein atail inou me kitail pahn wia uwen atail kak en kapwaiada arail kokohp akan.”

En utungada soukohpo iei doadoahk sarawi ehu. Kitail sohte kin mwohndihte oh nennenla ahpw sinsile ih ansou koaros, idawehn ah kaweid, padahngki ah mahsen kan, oh kapakapki ih.

Nanmwarki Pensamin, nan Pwuhk en Mormon, mahsenihong aramas ako, “Ahpw I duwehte kumwail, me kak soumwahuki soangen soumwahu kan koaros en paliwar oh madamadau; ahpw I pilipildahr … oh semeio kasarawiehlahr, …oh E ketin sinsile ie oh nekinekid ie sang ni sapwellime manaman kowahlap, pwe I en kak papah kumwail sang ni kehl unsek, lamalam unsek oh roson unsek me Kauno ketikihong ie.”

Ni mwomwohte, erein sounpar 100, Preseden Nelson kasarawihlahr oh pilipildahr sang rehn Kauno. Preseden Harold B. Lee, ni ansou me e wia emen towe en Keioun Presedensi, eh kawehwehda duwen karasaras en Moses ni e kesikesihnen pohn wasa ileile nan Rephidim. “Pehn [Preseden en mwomwohdiso] kak luwetala,” eh mahsanih. “Irail kin luwetala ekei pak pwehki arail pwukoah toutou kan; ahpw ni ansou me kitail kin kihda peh ko, oh mih pahn eh kaweid, ieiang ih, wenihmw en ehl pahn sohte kak powehdi kowe oh pil Israel. Mwahupomw oh pil mwahupatail kawahki ma kitail idawehn de sohte idawehn irail akan me Koht ketin malipe en apwalih Sapwellime Mwomwohdiso. E ketin mwangih ihs me Eh kupwurki en apwalih Sapwellime Mwomwohdiso, oh E sohte kin sapwungala.”

Preseden Nelson kileldihsang sounpar tohto en ah papah ong Kauno. Ah mahmahla, ah diren koaiek, erepit, oh kaudiahl kan udahn dokeihong atail rahn akan. Eh ketin mahsanih: “Mwomwohdiso en Sises Krais en Souleng en Imwin-rahn akan kin kaukaunop sampah ong rahno me ‘sampah pahn direkihla kupwuren Kauno’ (Aiseia 11:9). … Doadoahk wet kehlailkihda pakair kesempwal me wiawiher sounpar riekid samwalahro. Me pidada lepen lokaiate isuh: ‘Met iei Sapwellime Iehros Kempoake. Rong Ih!’ (kilang Joseph Smith—Poadopoad 1:17.”

Preseden Nelson pil mashanih: “Sohte ehu ansou nan poadopoad en sampah me atail wehwehpen atail Sounkomour iei kesempwal sang oh konehng mour en palingehn en aramas koaros. Song medewe uwen mwadang en kahpwal kan en sampah—oh kahpwal kan nan atail mour kan—ah pahn kin sohrala ma aramas koaros kin idawehn Sises Krais oh peikiong Sapwellime padahk kan.”

Riei ko, kitail anahne wia sawas laud oh katikitikala kaulihm kan, kolokol teng mahsen en Kauno, Sapwellime ahl, oh Sapwellime soukohp, me mahsanih: “Kapwal me keieu laud ong kitail rahnwet iei tenekih nanpwungen mehlel en Koht oh ehn Sedan kasongosong. Ih me kahrehda Kauno kehkehlingkiong kitail en ‘kapakap ansou koaros, oh … pitilahsang pahn pehn ladu en Sehdan kan me kin kakehlaka [en sehdan] doadoahk.’”[Tepin Padahk oh Inou kan 10:5; patehng kesempwelpe].”

Epreil samwalahro, Sister Rasband oh ngehi ahniki ansou mwahu en patehng atail soukohp kompoake oh Sister Nelson ong ni kasarawi riau en Tehnpas Sarawi en Mandai Udah.

Preseden Nelson kapwuriamwei koaruhsie ni e pidelong nan perehu. Malaulau nan pwungat me ese me eh pahn ketdo. Patopato reh, I mwadangete pehmda duwen marain oh manaman en pwukoah me e kolokol. I sohte pahn kak manokehla peren pohn mesarail akan ni ahr kilangada soukohpo ni mehlel.

Nan kapakap en Kasarawi Riauo, Preseden Nelson kapakapihong Kauno me Sapwellime Tehnpas sarawi pahn kolada koaros me pahn pidelong nan tehnpas sarawio, “pwe ren kak alehdi kapai sarawi kan oh doudoulahte warohng oh loalopwoationg arail inou sarawi kan … pwe en kak wia tehnpas en onepek mwahu, tehnpas en insenamwahu, oh tehnpas en kaudiahl ong emen emen me pahn warohng pidelong nan wenihmwo.”

Kitail koaros kin anahne sawas sang rehn Kauno pwe kitail en meleilei, insenamwahu, oh me keieu anahnepe iei me emen emen en alehdi pein ah kaudiahl en powehdi masepwehk, rotorot, oh kasongosong kan me kin mihmihseli pohn sampah.

Mwohn kaudoko, se kesihnen liki pahn ketipino rehn Preseden oh Sister Nelson pwe sen kak kilang doadoahk kaselelo. Ehn Preseden Nelson kadaudok en peneinei me mihmi wasahu inenen laud douluhl. Kawaliemen en eh pahpa kahlap ako kousoanla sahpwo me kapil tehnpas sarawio, duwehte ekei ahi peneinei. Ehn ei pahpa kahlap eh pahpau Andrew Anderson wie papah nan pelien konsdurukdion nan pwihn ehu me doadoahk erein sounpar eisek ehu pwe ren kaimwisekla Tehnpas Sarawi en Mandai, kesiluh nan Wasahn Nahna Takai ko.

Ni aht kesikesihnen rehn Preseden Nelson, se ahniki ansou mwahu en kolada oh utung soukohp en Koht ni aht kasarawih Sapwellime Kauno tehnpas sarawio. E wia ehu rahn me I sohte pahn kak manokehla.

“Kitail kawada tehnpas sarawi kan pwehn wahuniki Kauno,” Preseden Nelson koasoaia rahn sarawio. “Re koukoukihda en wia wasahn kaudok oh kaidehn mehn kasansal. Kitail wiahda inou sarawi kan me keieu kesempwal oh sohte imwi nan tehnpas sarawi pwukat.” Kitail kapwkapwurpene peneinei en Israel.

Preseden Nelson oh soukohp kan me kohdo mwowe kin apwalih mwahu oh kesempwaliki tehnpas sarawi nan arail mour. Rahnwet, nan sampah pwon, kitail ahniki tehnpas sarawi en Kauno me [silipwiki lemeisek] 350 me wie doadoahk, pakairdahr de wiwiawihte. Ni eh wia soukohp, tepsang 2018, Preseden Nelson pakairkidahr tehnpas sarawi meh [epwiki weneisek waluh] 168.

“Nan atail ansou,” eh koasoaiahier, “kapwurpwurpene en mwehi kan, kih kan, oh manaman kan en wiala ehu, ni e pwonla, oh unsekla (kilang Tepin Padahk oh Inou kan 128:18). Pwehki kahrehpe sarawi pwukat, tehnpas sarawi kan mihmihseli pohn sampah. I pwurehng koasoaiahki tehnpas sarawi kan me wie koukouda mwein sohte pahn wekidala ahmw mour, ahpw ahmw doadoahk nan tehnpas sarawi me pahn kak.”

“Sounkomouro oh Sapwellime padahk kan me wia poahsoan en tehnpas sarawi,” Presedeno kin mahsanih. “Soahng koaros me padahkda nan tehnpas sarawi, kin kohsang kaweid oh sang ni Ngehno, pwehn kalaudehla atail wehwehpen Sises Krais. Sapwellime tiahk sarawi kesempwal akan katengedi kitail ohng Ih sang ni inou sarawi kan en prihsduhd. Oh, ni atail pahn kolokol atail inou sarawi kan, E pahn ketkiheng kitail kisakis en Sapwellime manaman en kakehlail oh kamwahu.”

“Koaros me kin wie kaudok nan tehnpas sarawi,” Preseden Nelson mahsaniher, “pahn ahniki manaman en Koht oh tohnleng kan en ‘kakelail irailda’ [Tepin Padahk on Inou kan 109:22]. Ia uwen ah kalaudehla ahmw koapwoaroapwoar ni ahmw ese me, ni ahmw wia ohl de lih me alehdier endaumen oh silasilkihdi manman en Koht, ke sohte anahne kelehpw erein mour wet? Soangen koapwoaroapwoar dah me e kiheng uhk ni ahmw ese me tohnleng kan udahn pahn seweseiuk?”

Tohnleng kan pahn kin kapawei sawas en kolada me ntingdier nan pwuhk sarawi kan ni ansou me Sises Krais kelepwikihdi nan Mwetuwel en Kedsemeni. Sang ni Eh lokolok Eh ketkihda Tomw me sohte ihmwi. “Wasahu,” Preseden Nelson mahsanih, “kasalehpen limpoak me keieu laud sang koaros me ntingdier nan poadoapoad akan wiawihda. … Wasahu nan Kedsemeni, Kauno ketin ‘lokolongki dihp en aramas koaros, pwe koaros … en koluhla oh kohdo reh’ [Tepin Padahk on Inou kan 18:11].”

“Ketikihweisang ie delen lokolok wet:” Sises Krais mahsanih, “ahpw soh kaidehkin nsenei, pwe kupwuromwihte, en pweida.

Oh tohnleng men sang nanleng ahpw pwaradohng Ih oh kakehlailihda.”

Mie tohnleng kan me mihmihseli rehtail rahnwet. Preseden Nelson mahsaniher, “[Nan Tehnpas,] ke pahn esehla ia mwomwen ahmw pahn kotehla kadehng nan pwungen nanleng oh sampah, ia mwomwen ahmw pahn kalelapak rehn sapwellimen Koht tohnleng kan en iang uhk.”

Tohnleng kan kin wahdo marain. Sapwellimen Koht marain. Ong Wahnpoaron en mehn Nihpai kan Sises ketin mahsanih, “Kilang ngehi me maraino me kumwail pahn kolada.” Ni atail utung atail soukohp, kitail kadehdeki ih iei sounkomouro me malipilipdahr, me wia “marain … en sampah.”

Ohng Preseden Nelson, I pahn weliandi toweh kan oh kempoakepah kan en Sapwellimen Koht Mwomwohdiso koaros nan sampah, se paiamwahu en kolada sapwellimomwi padahk kan, en kolada sapwellimomwi karasaras en momourki Krais, oh en kolada sapwellimomwi kadede lingaling en Kauno oh Sounkomour, Soundor en kitail koaros.

I kadedeki me Sises Krais iei “marain … en sampah pwon.” Kitail koaros, ni atail wia sapwellime tohnpadahk kan, “kolada” Sapwellime marain. Ni mwaren Sises Krais, ahmen.