Pe mborayhu potĩ: Mayma Jesucristo remimbo’e añete rechaukaha añetéva.

Jahayhu ha jahechaĝa’u presidente Thomas S. Monson-pe, ha jahayhu ha ñasostene presidente Russell M. Nelson. Presidente Nelson oreko tenda especial che korasõme.

Che ha’erõguare túva imitãva, ore familia michĩva, orekóva cinco áño, oĝuahẽ peteĩ ára escuela-gui ha oporandu isýpe: Mba’eichagua tembiapo ojapo papá?”. Upéi omombe’u umi ikompañéro de clase pyahu oñepyrũhague oñe’ẽ ituvakuéra rembiapóre. Peteĩva he’i itúva ha’eha policía municipal mburuvicha ha ambue katu he’i con orgullo itúva ha’eha peteĩ empresa guasu mburuvicha.

Oporandúvo chupe hikuái itúvare, che ra’y he’ínte: “Che ru omba’apo peteĩ oficina-pe computadora reheve”. Ha upéi, ohechávo hapichakuéra nomomba’eicha pe imbohovái, ha’e he’ive: “Ha añetehápe, che ru ha’e pe universo mburuvicha”.

Oiméne upépe oparara’e pe ñomongeta.

Ha’e che rembirekópe: “Ha’éma ára ñambo’eve haĝua chupe pe Plan Salvación rehegua ha mávapa añetehápe omanda”.

Rombo’évo ore familia pe Plan Salvación rehegua, mborayhu orekóva hikuái Túva Yvagagua ha Salvador-re okakuaa, ontendévo hikuái ha’eha peteĩ plan mborayhu rehegua. Pe Jesucristo evanhelio oñe’centra Túva ha Ta’ýra mborayhu ñanderehe ha mborayhu Hesekuéra ha mborayhu jarekóvare ojuehe.

Elder Jeffrey R. Holland he’iakue: “…peteĩha tembiapoukapy tuichavéva opa eternidagua ha’e jahayhu Tupãme opa ñane korasõ, ánga, apytu’ũ ha mbarete reheve. Péva ha’e peteĩha tembiapoukapy guasu; ha katu peteĩha añetegua tuichavéva opa eternidagua ha’e pe Tupã ñanderayhuha opa Ikorasõ, hi’ánga, iñapytu’ũ ha imbarete reheve; ko mborayhu ha’e pe piedra fundamental de la eternidad ha ha’eva’erã ñande rekove piedra fundamental”.

Ha’évo pe ñande rekove ára ha áragua piedra fundamental, pe mborayhu potĩ ha’e peteĩ mba’e oẽikotevẽva mayma Jesucristo discípulo añetévagui.

Profeta Mormón ombo’e’akue: “Upévare, chejoyke’ykuéra ahayhuetéva, pejerure Túvape opa pene korasõ mbarete reheve, penerenyhẽ haĝua ko mborayhu ha’e ome’ẽva’ekuégui opa umi ha’évape Ita’ýra Jesucristo remimbo’e añete”.

Añetehápe, pe mborayhu ha’e señal añetegua opa Jesucristo remimbo’e añetévagui .

Umi discípulo añetegua ohayhu pe servicio ñeme’ẽ. Ha’ekuéra oikuaa pe servicio ha’eha mborayhu añetegua rechaukaha ha peteĩ konvénio ojapo’akue hikuái ojebautisávo. Taha’e ha’e pe illamamiento Tupaópe térã hembiapo komunidápe, ha’ekuéra oñandu peteĩ deseo tuichavéva ohayhu ha oservi haĝua Ñandejára ha hapichakuéra.

Umi discípulo añetegua ohayhu pe ñeperdona. Ha’ekuéra oikuaa pe Salvador expiasiõ omo’ãha opa ñande jejavy ha pekadokuéra. Ha’ekuéra oikuaa pe precio Ha’e ohepyme’ẽakue ha’eha peteĩ “precio con todo incluido”. Umi impuesto, tarifa, comisión ha cargo espiritual ha’éva pekádo, jejavy ha ofensa rehegua, ojekubripáma. Umi discípulo añetegua oĩ dispuesto operdona haĝua ha oĩ dispuesto ojerure haĝua perdón.

Che hermano ha hermanakuéra ojehayhúva, hasýramo peẽme pe poperdona haĝua, ani pepensa umi ambue tapicha ojapoakuére penderehe, ha katu pe Salvador ojapoakuére penderehe, ha pejuhúta py’aguapy umi bendición redentora de Su expiación-pe.

Umi discípulo añetegua ohayhu oñesomete haĝua Ñandejárape, py’aguapy reheve ikorasõme. Iñumilde ha isumíso ohayhúgui hikuái chupe; oreko fe oaceptapa haĝua pe Hembipota, ndaha’éi pe Ha’e ojapóvapente, ha katu pe mba’éicha ha araka’épa ojapo. Umi discípulo añetegua oikuaa umi jehovasa añete nda’akói ha’eha pe ha’ekuéra oipotáva, ha katu pe Ñandejára oipotáva chupekuéra ĝuarã.

Umi discípulo añetegua ohayhuve Ñandejárape mundo-gui ha oĩ’atã ha ndoku’éi ijeroviápe. Opyta’atã ha ndoku’éi peteĩ mundo okambia ha iñypytũvape. Umi discípulo añetegua ohayhu ohendu haĝua pe Espíritu ha umi profeta ñe’ẽ ha nokonfundíri chupekuéra mundo gua ñe’ẽ. Umi discípulo añetegua ohayhu “[oĩ] haĝua tenda marangatúpe”, ha ohayhu omomarangatu haĝua umi tenda oĩha. Oho ohohápe, ogueraha Ñandejára mborayhu ha py’aguapy ambue hapichakuéra korasõme. Umi discípulo añetegua ohayhu iñe’ẽrendu haĝua Ñandejára rembiapoukapykuéra ha iñe’ẽrendu hikuái Ñandejárape ohayhúgui. Ohayhu ha iñe’ẽrendúvo umi ikonvénio, ikorasõkuéra oñembopyahu ha pe inaturalesaite okambia.

Pe mborayhu potĩ ha’e mayma Jesucristo discípulo verdadero rechaukaha añetegua.

Che aikuaákuri mborayhu potĩ rehegua che sýgui. Ha’e ndaha’éikuri miembro Tupaogua.

Peteĩ ára, ojapo heta ary, ahákuri avisita che sy, oñorairõva cáncer ndive. Che aikuaákuri ha’e omanotaha, ha katu chepy’apy osufrihague hina. Che nda’éi mba’eve, ha katu ha’e, che kuaa porãitéva he’i: “Ahecha rejepy’apyha”.

Upéi, che sorpresarã, oporandu vevuimi chéve: Ikatúpa chembo’e añembo’e haĝua? Añembo’ese nderehe. Aikuaa iñepyrũme oje’eha: ‘Querido Padre Celestial’; ha katu mba’e ha’eva’erã upe rire”?

Añesũvo hupa ykére ha ha’e oñembo’e cherehe, añandu peteĩ mborayhu araka’eve añandu’ỹva. Ha’ékuri peteĩ mborayhu sencillo, añete ha ipotĩva. Ndoikuaáirõ jepe plan Salvación rehegua, ha’e orekókuri ikorasõme iplan personal de amor, pe plan de amor sy orekóva imembýre. Oñandúkuri tuicha dolor ha hasy chupe oguenohẽ mbarete oñembo’e haĝua. Apéna ahendu pe iñe’ẽ, ha katu añetehápe añandu pe imborayhu.

Chemandu’a apensahague: “Mba’éicha piko máva orekóva tuichaite dolor ikatu oñembo’e ambue hapicháre? Ha’e ningo pe oikotevẽva pytyvõ”.

Pe mbohovái tesakãme ou che apytu’ũme: mborayhu potĩ. Ha’e cherayhuetégui hesaráikuri ijehegui; ára ohasavaive jave, ha’e cherayhuve ijupégui.

Ha péicha, hermano ha hermanakuéra pohayhúva, ndaha’éi piko péva pe Salvador ojapo’akue? Upeichaite, peteĩ perspectiva eterna ha tuichavévape. Imba’erasy vaiete pa’ũme, upe pyhare ka’avotýpe, Ha’ékuri pe oikotevẽva pytyvõ, ohasa’sy jave ñaimo’ãkuaa’’ỹ ha jaikuaa’ỹháicha. Ha katu, ipahápe, Ha’e hesaráikuri Ijehegui ha oñembo’e ñanderehe ohepyme’ẽmbaite peve. Mba’éicha ojapóra’e? Mborayhu potĩ orekóva rupi Túvare, ombou’akue chupe, ha ñanderehe. Ha’e ohayhúkuri pe Túva ha ñanderayhuve ñandéve pe Ijehegui.

Opagákuri peteĩ mba’e ha’e ojapo’ỹakuére; ohepyme’ẽ umi pekádo ha’e ojapo’ỹakuére. Mba’ére? Mborayhu potĩ rupi. Ohepyme’ẽmbaitévo, Ha’e ikatúkuri oikuave’ẽ ñandéve umi mba’e ohepyme’ẽakue rehegua jehovasa, ñañearrepentíramo. Mba’ére oikuave’ẽ ko’ãva? Peteĩ jey, ha akóinte, mborayhu potĩ rupi.

Pe mborayhu potĩ ha’e mayma Jesucristo verdadero discípulo rechaukaha añetegua.

Presidente Thomas S. Monson he’iakue: “Ajerure tañañepyrỹ ko ára, ko araite, jahechauka haĝua mborayhu opavave Tupã ra’y ha rajykuérape, taha’e umi ñande rogaygua, ñane anguirũ, tapicha jaikuaánteva térã umi jaikuaa’ỹva. Opa pyhareve ñapu’ãvo, ñaiméke ñambohovai haĝuáicha mborayhu ha py’aporãme oimeraẽ mba’e ikatúva osẽ ñanerenonderãme”.

Hermano ha hermanakuéra, pe Jesucristo evanhelio ha’e peteĩ evanhelio mborayhu rehegua. Pe tuichavéva tembiapoukapy mborayhúre oñe’ẽ. Chéve ĝuarã, opa mba’e ha’e mborayhu rehegua. Pe Túva mborayhu, Ta’ýra osakrifikava’ekue ñandereheha. Pe Salvador mborayhu, opa mba’e osakrifikava’ekue ñandereheha. Peteĩ sy térã peteĩ túva mborayhu ome’ẽtava oimeraẽ mba’e ifamília reheha. Umi kirĩháme ome’ẽva servicio mborayhu ha hetave ñandekuéra ndajaikuaáiva, ha katu Ñandejára oikuaa porã chupekuéra. Umi opa mba’e ha akóinte operdonáva mborayhu. Umi ome’ẽvéva pe orrecibívagui mborayhu.

Ahayhu che Ru Yvagaguápe; ahayhu che Salvador-pe; ahayhu pe Evanhelio; ahayhu pe Tupao; ahayhu che familia-pe; ahayhu ko vida hechapyrãva. Chéve ĝuarã, opa mba’e ha’e mborayhu rehegua.

Ko ára ñaromandu’aha pe Salvador resurrección, taha’éke peteĩ ára de renovación espiritual enterove ñandéve ĝuarã. Ko ára taha’e peteĩ vida henyhẽva mborayhúgui ñepyrũmby, pe “ñande vida diaria piedra fundamental”.

Tahenyhẽ ñanekorasõ Cristo mborayhu potĩgui, mayma Jesucristo discípulo verdadero techaukaha añetegua. Ha’e cheñembo’e, Jesucristo rérape. Amén.