Jamin Ejjeļo̧k Kōjatdikdik
Eļan̄n̄e jej ļōmņake ta eo Rilo̧mo̧o̧r eaar kōm̧m̧ane n̄an kōj, jemaron̄ wōnm̧aanļok ilo ad jeļā bwe E ej pād ippād.
Pija jān Albert Espi
Pijaik an peim̧ loklok likim̧, neem̧ reloklok ippān doon, innām rej joļok eok ilo juon dān ruwatimjuon ne mwiļalin! Ta eo kwonaaj kar kōm̧m̧ane? Enaj ke kar pidodo am̧ pād lōn̄in dān im kamōk eok, ak konej ke kar aenōm̧m̧an im pukot mejļan jōkjōk in epen?
Kōmmālmel ko n̄an erom̧ Navy SEAL ro an United State rej ioone ejja jōkjōk in. Rej ņae etan “drown-proofing ” Kōttōpar eo ej n̄an lale eļan̄n̄e remaron̄ ke mour ilo dān ilo elōn̄ jōkjōk ko. Ālikin aer likwoje er im joļok er ilo dān eo, m̧ōttan teej in rej aikuj tum̧laļ ļok n̄an laļ tata ilo aer jab wiwijet, kōjerbal neir n̄an juur laļ lōn̄ļok er jān laļ, tōprakļok ioon dān, innām m̧ōkaj im bōk kūtwōer m̧okta jān aer bar tūm̧laļļok. Men nej bar āliji m̧ae iien ej dedeļok.
Elōn̄ iaad remaron̄ ban deploke kōm̧mālmel eo an Navy SEAL, ak bolen ewōr jet men jemaron̄ ekkatak jān e—im bōlen kwaļok ad kautiej Jisōs Kraist im Pinmuur eo An ilo iaļ in.
Rilo̧mo̧o̧r eo Am̧ ilo Aolep Men
SEAL ro eļap aer pedped ioon kōm̧m̧ālmel eo aer im kōm̧m̧an bwe en maron̄ depļoke kōm̧m̧ālmel in epen—im rej aikuj kadedeļoke ippāer make. Kōj wōj naaj baj wōt depļoki mālejjoñ ko ilo mour in, ejjab āinwōt SEAL ran ilo aer kōm̧m̧ane kōm̧mālmel ko aer, jejjab aikuj in makeļok ilo mālejjon̄ ko ad.
N̄e jej lokjak kōn jerawiwi, inepata, būrom̧ōj, ak jabdewōt mālejjon̄ im jej en̄jaake ad tūm̧laļļok, jemaron̄ oktak tok n̄an Jisōs Kraist. N̄e jej en̄jaake ad pād laļ tata im jab maron̄ wanlōn̄tak, jemaron̄ kememej bwe em̧ōj an Rilo̧mo̧o̧r eo pād ijin, im E enaaj letok n̄an kōj kajoor im ļōn̄aj kōj, kamnonoik kōj, im wōnm̧aanļok wōt. Ippān, ejjamin ejjeļo̧k ad kōjatdikdik.
Jisōs Kraist ej am̧ Rilo̧mo̧o̧r jān jerawiwi im mej. Jisōs Kraist ej am̧ Ripinmuur n̄e kwoj wōtļok im aikujin bar likio ilo mour in jetōb. Jisōs Kraist ej am̧ Rikōmour ilo ļōmņak, jetōb, im jet iien metak ko an kanniōk im E wōt emaron̄ kōmouri. Men kein im et ko jet etan Jisōs Kraist n̄an kwaļok bwe E ej Eo jej reilo̧k n̄ane, eļaptata n̄e ej pen mour.
Ilo an Ijtō epaaktok, jej keememe Jerkakpeje eo an Jisōs Kraist. E emour! Im kōnke E emour, jenaaj bar mour im bōk kallim̧ur ko an mour indeo. Ak m̧okta jān Jerkapeje eo An, Rilo̧mo̧o̧r eaar en̄taan ilo Getsemane im mej ioon debwāāl kōn kōj kōnke E ej iakwe kōj. E “eaar wanlaļtak ium̧win aolep men ko otemjeļo̧k”—ejjab wōt kōn jerawiwi ko ad, ak barāinwōt aolep metak jej en̄jaaki, būrom̧ōj, en̄taan, im mennin kapo ko—bwe E en jeļā kilen jipan̄ kōj (Katak im Bujen Ko 88:6; lale barāinwōt Alma 7:11).
Lo Am̧ Kōjātdikdik ilo E
Ke Rilo̧mo̧o̧r eaar debwāāl, āinwōt ar ejjeļo̧k kōjatdikdik n̄an men otemjej. Rikaļoor ro An raan lukkun inepata. Raar ļoor E, tōmak ilo E— im kiiō E eaar jako. Ke Jisōs eaar babu lo lōb eo, raar būrom̧ōj im jab jeļā ta im̧aan. Ak jilu raan tok ālik, ilo raan in Jabōt, eaar ejjeļok kobban lōb eo. Jisōs Kraist em̧ōj an Jerkakpeje Ta eo eaar jako em̧ōj an bar jepļaak ilo kōjatdikdik!
Eļan̄n̄e kwoj ioon marok im mennin kabweer—āinwōt n̄e rej joļok eok n̄an iloan juon pool ilo an peim̧ im neem̧ loklok—im ejjeļok bar iaļ, kōm̧m̧an an iien n̄an pukot kōjātdikdik ilo Jisōs Kraist, im keememej bwe ejjab jem̧ļok eo in.
Rilo̧mo̧o̧r eo eaar jab ioone Jabōt in Ijtō eo ekam̧ōņōņō eļan̄n̄e eaar jab depļoke Gatsemane im debwāāl eo jilu raan m̧okta. Kōn menin, eļan̄n̄e kwoj depļoke juon iien epen, jab ebweer! Āinwōt an Josep B Wirthlin (1917-2008) jān Doulul eo an Jon̄oulruo Rijilōk ro kar ba, “Ilo marokin ad būrom̧ōj, Jabōt enaaj itok. … Jekdoon būromōj ko ad, Jabōt enaaj itok.”
Ilo Pinmuur im Jerkakpeje eo An, Jisōs Kraist ej pojak aolep iien n̄an jipan̄ eo lo aenōm̧m̧an im wōnm̧aanļok n̄an eļapļok jān ta ko kwoj kōtmeni.