Juon Ijtō Pedped Wōt Ioon Kraist
Im juon mour Pedped-Wōt ilo Ijtō
Kōj wōj maron̄ bōk kajoor eo an Rilo̧mo̧o̧r n̄an kaenōm̧m̧an im oktak.
Pija jān Janae Bingham
Ilo Jemenere, kom eaar kenono kōn Ijtō im ta meļeļein im wāween ad nej kaļok e. Ejjab kōn tōnal wōt im rabit ko—ej kōn ad Rilo̧mo̧o̧r. Ij kajitūkin eō, “Ta iminene ko imaron̄ jino kaki ilo m̧weo bwe in maron̄ reilok wōt n̄an Rilo̧mo̧o̧r?”
Ikōņaan ekkal kōn pirōk in LEGO® ko. Ikar loe juon pijain Rilo̧mo̧o̧r jen Gospel Laibrāre eo online im kar ukōt tok n̄an wāween kalōke. Iaar kōm̧m̧ane pijain pirōk eo ke ron̄jake kweilok eo eļap eo. Ke eaar dedeļok, iaar katotoik ilo m̧weo m̧ō.
Ajeej Annan̄ in Rilo̧mo̧o̧r
Iaar bar wiak juon bo̧o̧k in annan̄ in Jisōs Kraist n̄an Ijtō. Ilo jinoin ikar tin ņooji ipeļaakin jikin jikuul eo aō. Ak ke armej ro ilo m̧ōn jikuul eo raar lo bo̧o̧k eo, raar kajjitoki annan̄ ko. Rikaki ro raar bar kajjitōk. Innām ajri ro me ikar jab kōtmene bwe ren kar kajjitōk annan̄ in Jisōs raar kajjitōk juon. Kōn menin ikar leļok aolepeir n̄an aolep ro iaar iooni.
Rilo̧mo̧o̧r eaar jab mijak in kenono n̄an jabdewōt, jekdoon ro raar jipọkwe ilo tōre ko An, Eaar m̧ōttā ippāer. Eaar kōm̧m̧an iien ippāer. Eaar m̧ōn̄ā ippāer. Ilo aō ajeej annan̄ ko eaar katakin eō bwe in āinwōt Rilo̧mo̧o̧r. Eaar barāinwōt katakin eō bwe jekdoon wōn kwe, jekdoon ta eo kwoj ļōm̧nak kwaar kōm̧m̧ane, ewōr wōt ruum̧ n̄an Jisōs Kraist ilo mour eo am̧.
Ad Oktak Ilo Rilo̧mo̧o̧r
Ilo mour e aō iaar ļōm̧nak, ewi wāween aō maron̄ kōjerbal Pinmuur eo an Rilo̧mo̧o̧r? Ak Ijtō in, N̄a iaar ekkatak bwe eļan̄n̄e ij kōm̧m̧an oktak ko ilo mour e aō im erōm̧ āinwōt Rilo̧mo̧o̧r, An jouj im turiam̧o̧ renaaj jerbal ilo mour e aō. Im eļan̄n̄e inaaj kajjion̄ aolep raan n̄an ukōt juon men edik, innām inaaj em̧m̧anļok.
Jejjo iiō ko kiiō, iaar lukkun jorrāān jen aō kōjerbal pija ko retoon. Ālkin juon katak ilo Jemenere, ikar bōke juon im̧we bwe in etal im kenono ippān Bishop eo aō. Eaar pidodo aō anjo̧ jen m̧ōjno̧ eo aō ālikin aō kar ba n̄an Bishop eo aō im jinō im jema, kōnke elukkun pen depļoke juon men n̄e kwo make.
Iaar jino aō jar im riiti jeje ko rekwojarjar kajjojo raan, im kajjion̄ bwe in jouj ilo jikin jikuul. Menin eaar jipan̄ eō kōnke iaar reilok wōt n̄an aō Rilo̧mo̧o̧r jen jerawiwi ko aō. Iaar jino reilok n̄an E jen ia eo iaar itok jen e.
Kōn Pinmuur eo an Jisōs Kraist, iaar anjo̧ jen pija ko retoon. Iaar erōm̧ eo Anij eaar aikuji eō bwe in erōm̧. Kiiō imaron̄ kōjeram̧m̧an kwojkwoj eo kōnke Rilo̧mo̧o̧r eaar ukōt im karreoik eō. Ij kam̧m̧oolol bwe imaron̄ erreo n̄an kōjerbal Priesthood eo n̄an kōjeram̧m̧an mour ko an ro ipeļaakū.
Kōm̧m̧an Bwe Ijtō en Juon Wōt Ippa
Iiō in ilo Jemenere, eaar wōr juon iien elukkuun em̧m̧an n̄an n̄a ke kōm kar kenono kōn katok eo an Rilo̧mo̧o̧r. Iaar ļōm̧nak bwe ke E eaar en̄taan, Emaron̄ kar bōjrak jabdewōt iien. Innām ij ļōm̧nak kōn An ļōm̧nak, “Ejjab, ij aikuj wōnm̧aanļok im kōm̧m̧ane men in. Ij aikuj kōm̧m̧ane men in n̄an Ben. Ej aikuji.” N̄an n̄a, ļōmņak in eaar kajju kepaakļok jemjera in aō ippān Rilo̧mo̧o̧r ilo Ijtō.
Ijtō in tok, inaaj bar jerbal juon pijain Jisōs kōm̧m̧an jen pirōk. Im inaaj lukkuun ajeej elōn̄ļok annan̄. Juon wōt iaer, inaaj ļōm̧nak kōn an Kraist kar en̄taan im An kar Pinmuur kōn n̄a. Kōn E, imaron̄ ukweļok jen jerawiwi ko aō im bar jepļaakļok n̄an E im Jemedwōj Ilan̄ juon raan.
Ijeļā bwe Rilo̧mo̧o̧r eaar mour im mej kōn kōj wōj kajojo im E ejeļā wōn kōj im aikuj ko ad. Eļan̄n̄e jenaaj kajjion̄, jemaron̄ kōjerbal kajoor eo An n̄an lo aeņōm̧m̧an im oktak, im jenaaj erōm̧ armej ro rem̧m̧anļok.
Rijeje eo ej jokwe ilo Idaho, USA.