Keemem eo an Ijtō: Men ko Rem̧ool
Erkien ej jet iaan men ko komaron̄ kar jeļā kōn keemem eo an Ijto̧.
Deļo̧n̄ļo̧k eo eanjo̧ an Jisōs Kraist ilo Jerusalem, jān Harry Anderson
Ta eo kwojeļā kōn Ijto̧? Komaron̄ bolen jeļā kōn men eo aorōk tata: ej juon keemem kōn pinmuur im jerkakpeje eo an Jisōs Kraist.
Emaron̄ wōr am̧ bar jet kajjitōk ko kōn Ijto̧ im wāween an elōn̄ kaļo̧k e, ippān ļok etke jej leļok ad ilo wāween eo jej leļok e. Erkein jet uwaak ko n̄an jejjo kajjitōk ko.
Ta in Palm Sunday im wiik eo Ekwojarjar?
Wiik eo Ekwojarjar ej keememe wiik eo āliktata Jisōs Kraist eaar kōm̧m̧ane Jerbal eo an ioon laļ. Palm Sunday ej raan eo jinoin tata ilo Wiik eo Ekwojarjar. Ej keememe raan eo Jisōs Kraist eaar deļo̧n̄ļo̧k ilo Jerusalem, uwe ioon juon donkey, n̄an kam̧ool kanaan eo. Armej ro raar ere ial eo an kōn kimej im nuknuk ko Im̧aan, im lam̧ōj im ba, “Hosana.” (Lale Matu 21:6–11.) Men in eaar waļok juon wiik m̧okta jān jerkarpeje eo an Kraist, eo im kar kaļo̧ke ilo Ijtō, raan eo āliktata ilo Wiik eo Ekwojarjar. Wiik in ekitbuuj Good Friday barāinwōt (keememej e an Kraist debwāāl im kallib).
Jisōs ilo Getsamene, jān Dan Burr
N̄aat eo ri Kūrjin ro raar jino keememe Ijtō?
Iien eo jinoin tata jekar jino keememe Ijto̧ ilo jet wāween eaar ilo ioļapin ruo bukwi iiō tok ālik (jet iien ikōtaan 160 im 170 A.D.). Ijoke, ri kūrjin ro raar bōlen baj kaļo̧k iien eo Jisōs Kraist eaar debwāāl im Jerkakpeje ilo jet wāween im̧aanļok. Kōnke ro rej ļoor Jisōs Kraist rej tōmak kōn Pinmuur eo An, im jem̧ļok ilo Jerkakpeje eo, iien eo im eļap an aorōk ilo bwebwenato in armej, āinwōt jemeļeļe n̄e raar kaļo̧k e iien kein jinoin an ejaak ri kūrjin ro. Rainin jej keememe Pinmuur eo an Kraist im Jerkakpeje eo aolep Jabōt ilo ad bōk kwōjkwōj eo.
Etke raan eo an Ijtō eokōtaktak aolep iiō?
Ekapokpok jidik, ako jennade eo epidodo n̄an Jabōt in Ijtō ej: Jabōt en jinoin tata ālikin “paschal full moon,” meļeļein bon̄in meram en ālikin an jon̄an wōt juon raan im bon̄ ilo jibriin̄ ilo tuean̄ in Hemisphere eo (M̧aaj 21). (Āinwōt ebwe an kapokpokļok men ņe, ak ebwe men in.)
Unin formula in ej jerbal n̄an ruo men ko rem̧ool: (1) Debwāāl eo an Rilo̧mo̧o̧r eaar kōm̧m̧an ilo raan in Kijoone eo, im (2) Jerkakpeje eo An eaar kōm̧m̧an ilo raan eo kein kajuon ilo wiik in (Jabōt).
Ri kūrjin ro etto raar kōnono kake eļan̄n̄e eaar aorōkļok bwe ren kaļo̧ke raan in Ijtō ilo raan in kijoone eo ak ilo juon Jabōt. Raan in kijoone eo ej juon iien m̧ōn̄ā an ri Ju ro eaar kōm̧m̧an jān kōļōnta eo an Hibru ro, eo im ej kōļōnta eo an allōn̄ im ejjab juon wōt ippān kōļōnta eo an aļ im elōn̄ armej rej kōjerbaļe. Ilo kōļōnta eo an Hibru ro, raan in kijoone eo eaar kōm̧m̧an ilo raan eo kein 14, ilo allon̄ eo kein kajiljilimjuon. Koba in ke, aolep ruo ak jilu iiō, ej kobaik juon bar allōn̄ bwe en juon wōt ippān ļok iien ko. Innām, kakobaik Ijtō ippān raan in kijoone eo meļeļein ke enaj okotaktak raan eo aolep iien im jeja an naaj kōm̧m̧an ilo Jabōt.
N̄an uwaake kajjitōk in, juon ko̧o̧njeļ an ri Kūrjin ro ilo 325 A.K eaar kāālet n̄an kakobaik raan in ilo iien eo Ijtō ej kaļok.
Innām, ilo tu kadu in: Ekkar n̄an bōnbōn eo kar kōjerbale jen elōn̄ ri Kūrjin ro, Jabōt in Ijtō emaron̄ m̧ōkaj an itok ilo M̧aaj 22 ak rum̧wij ļok n̄an Eprōļ 25.
Ilo Ememej Eō, jān Walter Rane
Elemen an kar bunny im lep ko jino bok jikier ilo Ijtō?
Rapit ko an Ijtō (ak mennin mour ko jet) im bōk to bōk tak lep eaar jino waļok Europe ilo epepen eo kein ka 17. Men kein rekar jab lukkun waļok m̧ae epepen eo kein ka 19. Armej rej tōmak bwe kar kōjerbali jen kōkaļļe ko an ro rejjab Kūrjin kōn iien jibriin̄, iien kōkāāl, im mour innām kobaik tok er n̄an Ijtō im Jerkakpeje eo an Jisōs Kraist.
Jisōs Kraist ej Waļo̧ktok Jen Lōb eo, jān Dan Burr
Etke jej mije Ijtō?
Būreejtōnji eo Kein Kajuon eaar kajjitōk ippād bwe jen kaorōk kaļok ko ad ilo Ijtō. “Jekdoon ta ko ro jet rej tōmake ak kōm̧m̧ane, jej aikuj kemeeme Jerkakpeje eo an ad Rilo̧mo̧o̧r emour ilo ad ekkatak katak ko An im jipan̄ ejaake manit ko an Ijtō ilo jukjukin pād eo ad, eļaptata ilowan baam̧le ko ad. Kōm ej kaketak kom̧ n̄an kōm̧m̧ane (Dallin H. Oaks,He Is Risen!: A Special Easter Season Message from the First Presidency” [pija in alooj], Gospel Ļaibrāre).