Mennin Aorōk ko Em̧ōj Ņooji
Pukot Pinmuur eo an Rilo̧mo̧o̧r ilo Kallim̧ur M̧okta.
Lukkuun lale; Kam̧wilaļ ļok am̧ ekkatak.
Jet armej rej ļōm̧nak bwe kallim̧ur M̧okta, eo kar je m̧okta jen an kar Rilo̧mo̧o̧r ļōtak im ejjab ba etan Jisōs Kraist, ejjab lukkun kenono kōn Ijtō. Ak ilo an Bok in Mormon kalikkare, armej ro etto raar barāinwōt jeļā im eaar wōr aer tōmak ilo Rilo̧mo̧o̧r, barāinwōt (lale Jekab 4:4).
Kar katakin ri Israel ro bwe wūnin kien ko an Moses eaar n̄an tōl ļok er n̄an Kraist. N̄an waanjon̄ak, ke rekar mour jen an jedpānit baijin eo kar kūji er, raar reilok n̄an jedpānit bronze eo Irooj eaar kappeik Moses n̄an kōm̧m̧ane, Moses eaar katakin er bwe menin eaar kakōḷḷein Rilo̧mo̧o̧r, eo im enaaj itok im lo̧mo̧o̧ren er jān jerawiwi ko aer (lale Bōnbōn 21:7-9; Alma 33:18-20).
Ijoke, aolepen meļeļe kein rejako jen baibōļ eo epād ippād rainin, itok wōt jen oktak ko—ilo pepe im jirilo̧k jim̧or—ium̧win bukwi iiō ko (lale 1 Nipai 13:23-27).
Ak n̄e konaaj lale, komaron̄ nej ello wōt elōn̄ men ko rej kenono kōn Rilo̧mo̧o̧r im Pinmuur eo An ilo Kallim̧ur M̧okta. Jen kōnono kōn jejjo iaer!
Palm Sunday, Getsemane, im iien Liakeļok eo
“Lo, Kiin̄ eo aṃ ej iwōj; E wānōk im ewor lọmọọr ippān; ettā, im ej uwe ioon juon donkey, im ioon juon koon.” (Zekaraia 9:9
Men eaar kūrm̧ool im kiiō jej ņae etan Palm Sunday, jiljilimjuon raan m̧okta jān Ijtō, deļon̄ļok eo an Jisōs ilo Jerusalem (lale Matu 21:15).
“E m̧ool Ear ineek en̄taan ko ad, im bōkļo̧k būrom̧ōj ko ad; a jaar ļōmņak bwe Anij ear m̧an E, im den̄ļo̧k E, im kaen̄taan E” (Aiseia 53:4).
Ilo Getsemane, Rilo̧mo̧o̧r eaar en̄taan kōn aolep jerawiwi ko—im en̄jake būrom̧ōj, metak, nan̄inmej, im en̄taan ko—an aolep armej ro raar mour ak renaaj mour laļin. Kōn menin, E ejeļā kilen kaenōm̧m̧an kōj ilo iien ad mālijjon̄ (lale Alma 7:11-13; barāinwōt lale Matu 8:17).
“Ar kōttāik E, a ke ar kaen̄taan E, Ear jab waļan̄i lọñiin; āinwōt juon lamb rej tōl ḷọk e n̄an mej, im āinwōt juon sip ej ikōn̄ im̧aan ro ri m̧wijbare, āindein Ear jab waḷan̄i lọn̄iin” (Aiseia 53:7).
Jisōs eaar jab kōnono ke pris ļapļap eo eaar kajitūkin E (lale Mark 14:60-61).
Debwāāl eo
“Jar an ri nana raar kōpooḷ eō; rej wākare neō im peiū” (Sam Ko 22:16).
“Rej ajej nuknuk ko aō n̄an doon, im raar kōjerbal kein kaalikkar kōn aō kopā” (Sam Ko 22:18).
“Raar letok n̄an eō paijin kōn kijō, im ilo aō maro raar letok dān e men̄ limō” (Sam Ko 69:21).
Debwāāl eaar juon kilen m̧anm̧an armej ekkā aer kōm̧m̧ane ilo tōrein, ak ritarinae ro an Rome ro raar lukkun nana kōn naan in kajirere im kakkure ko aer n̄an Rilo̧mo̧o̧r (lale Jon 19:1–3; Matu 27:34–35, 48).
Jerkakpeje eo
“Ear oran̄ļo̧k mej n̄an indeeo, im Irooj Jeova enaaj kam̧ōrāik dānnin kōmjaaḷaḷ jān mejeir otemjej, im naan in kinaak an ro ri aelōñ An, Enaaj bōkḷọk jān aolepen laḷ, bwe Jeova ear ba” (Aiseia 25:8).
“I jeļā bwe aō ri Lo̧mo̧o̧r ej mour wōt, im ilo iien eo āliktata Enaaj jutak ioon laļ in; Im ālikin an jako kilū, ilo ānbwinnū in wōt inaaj lo Anij” (Job 19:25-26).
Irooj Jisōs Kraist eaar Jerkakpeje. E ej mour kio! Elōn̄ jeje ko rekwojarjar im naan in kam̧ool ko rej kwaļok kōn menin. Bar ta eļapļo̧k, Jemedwōj Ilan̄ eaar jeļā jen jinoin ke jenaaj aikuj juon ad Rilo̧mo̧o̧r, im E eaar kepooj ro Nejin n̄an bōk Rilo̧mo̧o̧r jen iien ko an Kallim̧ur M̧okta.