Ad Raan in Kijoone—Kwojkwoj eo

Jān David A. Edwards

Māākjiin ko an Kabun̄ in

Ewōr jon̄ak ko ikōtaan Kijoone eo etto im kwojkwoj eo ad aolep wiik.

M̧okta jen an ri Israel ro etto em̧m̧akūt jen kōm̧akoko ilo Egypt, kar kajjitōk bwe ren ļoor jet bun̄tōn ko jān Irooj bwe ri ko̧kkure eo enjab m̧an er, ak etal ioer (lale Exodus 12). Ālkin aer em̧m̧akūt jen Egypt, ri Israel ro raar kōm̧m̧ane juon m̧ōn̄a aolep iiō, etan Raan in Kijoone, n̄an ememej an kar Irooj lo̧mo̧o̧ren armej in bujen ro An.

Ilo wiik eo āliktata in An mour, Jisōs Kraist eaar pād ilo kejota eo an Raan in Kijoone eo. Kiiō jej ņae etan Kejota eo An Āliktata. Rilo̧mo̧o̧r eaar kōjerbal iien in n̄an kwaļok kadkadin kain̄i in kwojkwoj eo, eo im kiiō jej bōk koņaad ie aolep wiik. (lale Matu 26:26-28; Luk 22:19-20; Katak im Bujen Ko 20:77, 79.)

Erkein ej ruo iaan men ko rej juon wōt ikōtaan Raan in Kijoone eo, Kejota eo an Kraist Āliktata, im kwojkwoj eo rainin im emaron̄ jipan̄ kōj ememej ad bōk lo̧mo̧o̧r jān Rilo̧mo̧o̧r.

Pilawā eo

Raan in Kijoone Ium̧win jiljilimjuon raan, ri Israel ro raar m̧ōn̄ā pilawā ejjab uwe (eo im em̧ōkaj kōm̧m̧ane im eto an jorāān).

Kōjota eo: Jisōs Kraist eaar kōjeram̧m̧an im rūje pilawā eo ejjab uwe ilo Raan in Kijoone eo, E eaar leļok n̄an rikaļoor ro An. E eaar ba n̄an er bwe ren m̧ōn̄ā ilo ememej ānbwinnin, im ejeļā bwe enaaj rub im mej ak enaaj bar jerkak bar juon alen.

Kwojkwoj eo: Jej m̧ōn̄ā pilawā ilo ememej ānbwinnin Jisōs kraist.

Jisōs Kraist ej Bred in Mour. Kōn Jerkakpeje eo An, kōj wōj naaj jerkakpeje ilo ānbwin ko reweppān, rejjab tōtoon, in rej n̄an indeeo. E eaar kaanjo̧ik kōj jen mej.

Bōtōktōkin Laam̧ eo

Raan in kijoone: Raan in Kijoone an Ļaam̧ eo eaar erreo, juon iiō rūtto in ļaam kom̧aan eo. Kar m̧an e, im ain bōtōktōkin iloan juon jāpe. Hyssop (juon mar) kar likūt ņa ilowaan juon jāpe im kōjerbaļe n̄an unoik nabōjin joor in kōjām eo. Menin kar kōkaļļe n̄an kwaļok armej in bujen ro an Irooj n̄an kijoone er jen rinana eo bwe ren maron̄ anjo̧ jen kōm̧akoko ilo Egypt.

Kōjota eo Āliktata Jisōs Kraist eaar kōjerbal wain n̄an kōkaļļein Bōtōktōkin. E eaar jiron̄ rikaļoor ro An bwe ren idaak jen e ilo ememej Bōtōktōkin, eo im enaaj to̧o̧rļok kōn jerawiwi ko aer im n̄an juon bujen ekāāl.

Kwojkwoj eo: Jej idaak den ilo ememej bōtōktōkin Jisōs Christ.

Jisōs Kraist ej Ļaam̧ eo an Anij. Bōtōktōkin eaar to̧o̧rļok ilo An kar en̄taan kōn nan̄inmej im jerawiwi ko ad. Bōtōktōkin—An en̄taan—eaar karreoik kōj. Eaar kaanjo̧ik kōj jen jerawiwi.