Apan̄ ko An Iaļ Eo An
Iaļ eo an Rilo̧mo̧o̧r emaron̄ jab pidodo iienotemjej, ak Enaaj etetal ippād im tōl kōj n̄an ijo jej kōņaan etal n̄ane.
Kōmeļeļe ko jān by Yukai Du
Ekkā ad kāālōt juon iaļ kōnke ej tōl ļo̧k kōj n̄an ijo jej kōņaan etal n̄ane. Ijoke ewōr men eļapļo̧k jān baj mejen kajjik. Ewōr bareinwōt meļan iaļ eo—jekjekin in bwidej in enaaj bōk kōj ie ļo̧k.
Jisōs Kraist ej karuwainenetok kōj n̄an etetal Ippān (lale Moses 6:34; Maika 6:8; 1 Jon 2:6; Katak im Bujen Ko 19:23). Iaļ in Ej karuwainenetok kōj n̄an etetal ion ej iaļ in bujen eo—iaļ eo n̄an aeņōm̧m̧an, lan̄lōn̄, im mour indeeo ippen Jemedwōj Ilan̄—ijo jej kōņaan pād ie.
Ak elmen rōt iaļ in? Apan̄ rōt ko jenaaj kijoon e ilo ad etetal Ippān Rilo̧mo̧o̧r eo?
Aidik
“E rānin̄ kōjam, im e aidik iaļ eo ej tōl ļo̧k n̄an mour” (Matu 7:14).
N̄e iaļ eo An ej pen, ewōr juon wūnin. E aidik in iaļ eo ej dāpij eok jān am̧ kāliktak jen ijo komaron̄ in jorāān ak jebwābwe.
Kaju
“Iaļ ko An rejim̧we” (Alma 37:12).
An ejjab juon iaļ an raan ko āliktata. Ej iaļ eo ejim̧we tata n̄an mejen kajjik eo ad kōn mour indeeo. Ejjab kōm̧m̧an jebwābwe. Ak jet iien jej kōm̧m̧ane. Kōn wōt Pinmuur eo an Rilo̧mo̧o̧r eo, jemaron̄ ukweļo̧k im oktak n̄an iaļ eo An.
Eju im Jet iien Edekāke
“Iaļ eo [n̄an ippān Anij] eju im jet iien edekāke” (President Henry B. Eyring of the First Presidency, “Help Them on Their Way Home,” Apr. 2010 general conference [Ensign ak Liahona, May 2010, 25]).
Etetal lōn̄ļo̧k ion tōļ ko emaron̄ in ļap, im komaron̄ jab loe ion toļ eo kwoj tallōn̄e. Ijoke Rilo̧mo̧o̧r eo ej kakajoor im rōjan̄ eok ilo am̧ kajjieon̄ kōm̧m̧ane men ko repen Ej kūr eok n̄an kōm̧m̧ani.
Dekā ko ilo iaļ eo am̧ remaron̄ oktak jān ko an ro jet. Māllijon̄ ko im ta ko rej waļo̧k rej am̧ wōt make. Ijoke Rilo̧mo̧o̧r eo ej kampānien eo am̧ em̧m̧antata ilo etetal im naaj jipan̄ eok jelm̧ae aolep men repen.
Ej Romaak
“Am̧ in naan e ļamp n̄an neō, im meram n̄an aō ial.” (Sam Ko 119:105). “Etetal ilo meram, āinwōt ej ilo meram” (1 Jon 1:7).
N̄e iaļ eo am̧ ej marok, Rilo̧mo̧o̧r eo emaron̄ kameram am̧ iaļ, em̧ool mekarta n̄e ekar jabwe n̄an ņee innem bar juon ilo iaļ in jepļaak eo am̧ n̄an Jemam Ilan̄.
Ineem̧m̧an
“Aet, men̄e ij etal ilo kom̧laļ in annan̄in mej, I jāmin mijak jabdewōt nana, bwe kwoj pād ippa” (Sam Ko 23:4).
Jekdo̧o̧n ewi jon̄an kaamijakin, kaen̄taanan, ak pen in iaļ eo am̧, komaron̄ bōk aeņōm̧m̧an im jeļā bwe ilo am̧ etetal ippān Jisōs Kraist, Enaaj etetal ippam im tōl eok n̄an kōjparok, ļok n̄an ippān Jemed Ilan̄.