3 Wāween n̄an Kōjekdo̧o̧n Setan im Kāālōt Jisōs Kraist
Meļeļe ta ekar waļo̧k ilo mour eo m̧okta emaron̄ jipan̄ eok kōm̧m̧ani kāālōt ko rem̧m̧an kiiō.
Kōmeļeļe jān Dean MacAdam
Ke Jemedwōj Ilan̄ ekar kwaļo̧k karōk eo An n̄an m̧ōņōņō indeeo eo ad im eddōkļo̧k, Ekar kallim̧ur n̄an jilkintok juon Rilo̧mo̧o̧r n̄an jipan̄ kōj. Ke Jemed Ilan̄ ekar kajjitōk, “Wōn I naaj jilkinļo̧k?” (Ebream 3:27), Jisōs Kraist, Jitōnbōro an “[Jemād] im kar riKāālet jān jinoin” (Moses 4:2), kar ba, “N̄a e, kwōn jilkinļo̧k eō” (Ebream 3:27). Ekar jab kajjitōk kōn jabdewōt, Ekar kōņaan wōt kōm̧m̧an ankilaan Jemed (lale Moses 4:2).
Innām Lucifer eaar itok. Ekar bareinwōt ba, “jilkinļo̧k eō” (lale Moses 4:1). Ak Lucifer eaar ļōmņak wōt kōn e, ar jab kōņaan mej kōn kōj. Ekar kōņaan utiej eo an Anij, kajoor, im aiboojoj n̄an e make (lale Moses 4:1). Lucifer ekar kōņaan kakkure anemkwōj in kāālōt eo ad. Wāween an kar ļōmņak in kōm̧m̧ane menin eaar jab alikkar. Ak jejeļā bwe n̄e eaar jab anemwkōj in kāālet, jejjab maron̄ in eddōkļo̧k im erom̧ āinwōt Jemedwōj Ilan̄. Innām, ilo jinoin, Lucifer ekar jum̧ae Jemed Ilan̄ im kar jab bōk karōk eo An.
An Lucifer jum̧ae ekar kōm̧m̧an juon tariņae ilo lan̄, ijo kar kōm̧m̧an bwe ren “jolaļļo̧k e;” im eaar “erom̧ Setan” (Moses 4:3–4). Juon-m̧ōttan-jilu in inelep ko ilan̄ raar ļoor e (lale Katak im Bujen Ko 29:36). Ak kōj jekar kōjerbal anemkwōj in kāālōt eo ad im kar ļoor Jisōs Kraist.
Tariņae eo eaar ijjino ilo lan̄ ej wōnm̧aanļo̧k wōt n̄an rainin. Setan im ro raar ļoore rej wōnmaanļo̧k wōt in kappukot n̄an jum̧ae kōj. Erein jilu wāween ko n̄an kile kōppeļaak ko im karōk ko an Setan, eļļā jān aujiid ko an im kāālet Jisōs Kraist ilo aolepen mour ko ad.
1. Jab Kōtļok An Kōjdat Anjo̧
Iiō ko ļo̧k, ikar kajjieon̄ in kipel ro jera ilo jikuuļ bwe ren jab kōm̧m̧an aer homework kōnke iaar jab kōm̧m̧an aō. Iaar bōd, ak iaar ļōmņak bwe eļan̄n̄e kōm enar pād ilo jorāān, emaron̄ in kar em̧m̧an ļo̧k aō mour. M̧wil eo enana ekar bar kakeememej n̄a kōn m̧wil eo an Setan ņae kōj. Kōnke e ej atajinemjen, ej kōņaan kakkure ad maron̄ mour indeeo.
Setan elukkuun iip kōn an atajinemjen im bwe ej—bareinwōt jeļā ke enaaj āliktata bōjrak—an kajjieon̄ in “kajeeded jerbal ko in marok” (Hilamōn 6:28), n̄an kakkure elōn̄ wōt iaad.
An Setan kōjdat ej jab karōk eo jej kāālōte. Jemaron̄ kōjerbal anemkwōj in kāālōt eo ad n̄an ļoor Jisōs Kraist im wōnmaanļok wōt in kōjekdo̧o̧n atajinemjen eo an Setan, ejab aorōk, im make-kōm̧m̧an jon̄an kajjieon̄e. Rilo̧mo̧o̧r eo eaar letok An mour bvwe jen maron̄ erom̧ ta eo Ejeļā jemaron̄ in erom̧ im en̄jake lan̄lōn̄ eo ej itok jen mour indeeo.
2 Jab Kaanjo̧ik Mijak
Jet iien ij ļōmņak etke mōttan jilu in ajri in jetōb ro nejin Anij raar maron̄ in kāālōt n̄an kōjekdo̧o̧n e karōk eo An. Setan ejeļā bwe mijak im pere rej jim̧or wāween ko rewejepdik n̄an kune tōmak. Emaron̄ in kapo kōj n̄an pere aorōk eo ad ak ba n̄an kōj bwe jejjab maron̄ in erreo kōn Pinm̧uur eo an Jisōs Kraist. Ak emaron̄ kajjieon̄ in kōm̧m̧an bwe jen mijak in ukweļo̧k ak ļoor karōk eo an Anij.
N̄e jej jelm̧ae mālijjon̄ ko im men ko repen, jemaron̄ in kāālet n̄an lōke karōk eo an Anij im ilo Jisōs Kraist. Ekar dipuki menotemjej bwe En maron̄ in ad kajoor n̄e jej jelm̧ae mijak, im kōn E, em̧ool jemaron̄ in anjo jene.
3. Bōk Aolep ko Me Rilo̧mo̧o̧r eo ej Lewaj n̄an Eok
Jemedwōj Ilan̄ im Jisōs Kraist ej kōttōpar eo aer in n̄an mije im kōkajoor kōj. Wōn ej ba rej kōņaan jipan̄ kōj erom̧ ijo em̧m̧antata ippād im letok n̄an kōj aolep men ko ewōr ippāer kōn eļap kallim̧ur, kajoor, im en̄jake? Aolep men ko ippān Jemed remaron̄ in ad! Menin kar letok n̄an kōj kōn wōt Jisōs Kraist.
N̄e ij ļōmņak kōn kajoor in lo̧mo̧o̧r eo an Rilo̧mo̧o̧r im an jab ļōmņak wōt kōn e, ij kōņaan ļoor E. Jisōs Kraist ej rijipan̄ eo eweepān an karōk in eweepān. Ilo ad kāālōt E, Ej jipan̄ kōj anjo ion apan̄ ko, ļoor karōk eo an Jemed Ilan̄, im kōttōpar mejān kajjik eo ad ekwojarjar.