Men Otemjej rej Em̧m̧anļo̧k N̄e Kwoj Lōke Anij

Ilo tōre in, ikar jino in pere m̧ool eo an gospel eo, naan in kam̧ool eo aō, im wōn eo kar Jisōs Kraist? Ilo juon iien, em̧ool ikar kajjitikin E emour ke im kar jino ļōmņak ikar juon eo ejjab tōmak. Būruwō ekar pen im kar kijin̄en̄e āinwōt dekā.

Naan eo ilo mour eo aō ekar kanooj pen im kapokpok. Ij ļōmņak kōnke n̄e ej bōjrak ad tōmak ilo Jisōs Kraist im kajoor eo An, ejjeļo̧k meļeļe in mour ko ad im rej erom nana.

Ilo jem̧ļo̧kin, jema ekar kareel eō n̄an jino bar etal n̄an jar. Ikar kōm̧m̧ane menin jekdo̧o̧n men̄e ikar tarpok wōt im jelm̧ae elōn̄ kajjitōk ko.

Juon raan ilo m̧ōn jar eo, ikar loe juon peba kileplep kōn jemeņere. Menin ekar jino juon itok limo ilo n̄a. Iaar kepaak bisop eo aō im kar kajjitōk ippān kōn menin. Ekar m̧ōkaj in kadeļo̧n̄ eō ilo kurup in bwebwenato eo an jemenere im jiron̄ eō bwe ekar ijjino ilo 5:30 jipon̄.

Kōn menin, ikar jino etal n̄an jemenere. Menin ekar jipan̄ eō kōm̧m̧an m̧ōtta im āliktata bōk juon naan in kam̧ool kōn Kabun̄ in im jeje ko rekwojarjar. Ewōr juon aō rūkaki eo ekar lukkuun kōketak kulaaj eo aō im kwaļo̧k ijo em̧m̧an tata ippām. Ikar loe bwe ekkatak jeje ko rekwojarjar em̧ool ej kōtļo̧k ad jeļā kōn Rilo̧mo̧o̧r. Ewōr juon oktak ikōtaan ron̄jake naan in kam̧ool an juon armej im kappukot eo am̧ make kōn ekkatak im kōn tōmak.

Ilo jino in, ikar jeļā kōn Jemād Ilan̄ im Jisōs Kraist kōn ta eo ro jet raar jiron̄ eō. Bōtaab jejjab maron̄ aolep iien pedped eļap tata ioon naan in kam̧ool ko an ro jet. Jej aikuj in jeļā kōn Rilo̧mo̧o̧r kōn kōj make.

Jej aikuj in kōm̧m̧an iien n̄an Rilo̧mo̧o̧r im men ko rekwojarjar bwe jen maron̄ in erom juon iaan rikaļoor ro An. Ikar katak bwe kwoj itok n̄an am̧ jeļā E n̄e kwoj:

1. Ļōmņak wōt in kappukot E.

2. Riiti jeje ko rekwojarjar.

3. Kajion̄ in em̧m̧anļo̧k ilo jetōb.

4. Jar.

5. Etal n̄an tampeļ

6. Jipan̄ ro jet.

7. Jitlo̧k.

8. Ļoor waanjon̄ak eo An.

9. Bōk juon bōro em̧m̧an.

10. M̧akoko in kōnono nana ņae juon ak ruruwe kōn ro jet.

Men kein raar jipan̄ eō jeļā kajjien Rilo̧mo̧o̧r—im erom juon iaan rikaļoor ro An. Erom juon rikaļoor an Jisōs Kraist elukkuun aorōk kōnke jemaron̄ in kōjerbal meram eo An n̄an jipan̄ ro jet. Kōn waanjon̄ak ko ad rem̧m̧an, ro jet remaron̄ lo ewi jon̄an an gospel eo juon jeraam̧m̧an.

Ke ikar bar jepļaak n̄an jar, ikar pād ilo jerata—obrak kōn pere, ejjeļo̧k m̧ōtta, ejjeļo̧k kōjatdikdik, jab jeļā wōn kar lukkuun n̄a ak ta kar jibadbad eo aō.

Kiiō, gospelo eej “urur” eo me ekar kōmeram mour eo aō im ej jipan̄ eō kōm̧m̧ani men ko rejim̧we im erom juon armej em̧m̧anļo̧k. N̄e ekar jab gospel eo, ijaje inaaj kar pād ia.

Men otemjej rej em̧m̧anļo̧k ilo mour n̄e kwoj lōke ilo Anij. Jān iien eo kwoj kappukot E, kwonaaj jino anjo̧ ioon mālijjon̄ im men ko renaaj jino em̧m̧anļo̧k. Aeet, apan̄ ko renaaj itok wōt, ak lōke in im ikdeelel eo n̄an tōmak renaaj jidik kōn jidik ļōn̄aj eok. Emaron̄ bōk iien, bōtaab men ko renaaj em̧m̧anļo̧k!

N̄e kwoj lōke ilo Jemād Ilan̄, kwonaaj maron̄ jelm̧ae jabdewōt men kwoj dibuki—men̄e ej apan̄ ko, pere ko, jorrāān in ājmour, ak amijakeke. N̄an waanjon̄ak, kwomaron̄ bōk grade ko rem̧m̧an ilo juon teej, kōkōm̧anm̧anļo̧k ājmour eo am̧, ak bōk uwaak ko—jet iien uwaak ko kwar pukoti jān ke kwar 10 iiō dettam̧, āinwōt ilo jekjek eo aō—eļan̄n̄e kwoj pukot E im lōke ilo E.

Ij lukkuun m̧ool kōn men kein. Kam̧m̧oolol kōn gospel eo, ij maron̄ in ba emōj aō oktak. Ilo m̧ool, aolep men em̧ōj kar aer oktak—būruo, ļōmņak ko aō, m̧wil ko, im pedped in katak ko. Ij kiiō jeļā m̧ool eo, im bwe ej kōm̧m̧ani aolep oktak ko. Aolep men em̧ōj aer em̧m̧anļo̧k kōnke kōn gospel eo an Jisōs Kraist.