Etetal Ippa

Em̧ōj ke kar kajjitōk ippam̧ n̄an kōm̧m̧ane juon men eo me kwaar jab ļōmņak bwe kwomaron̄ kōm̧m̧ane? Bōlen kwar jab en̄jake ebwe kajoor ak ebwe am̧ māletlet, ak kwar inepata bwe ro jet renaaj kar ettōn̄ kake ak kōrraate eok. Eļan̄n̄e kwar bar en̄jake wāween in, kwoj jab make iaam̧.

Taujin iiō ko remootļo̧k, eaar wōr juon em̧m̧aan kar etan Inok. Anij eaar kajjitōk ippān Inok n̄an kwaļo̧k kōn ukweļo̧k n̄an armej ro—jet iaan ro renana tata laļ ejjan̄in kar loe.

Inok eaar jab ļōmņak ke emaron̄ kar kōm̧m̧ane. Ekar jiron̄ Anij bwe eaar juon ļaddik wōt, ejjab kanooj lōn̄ ro m̧ōttan, im ekar jab bwe an māletlet (lale Moses 6:31).

Bōtaab Anij eaar leļo̧k n̄an Inok juon kallim̧ur. E kar jiron̄ em̧m̧aan in eleļn̄o̧n̄, “Kwōn ilo̧k im kōm̧m̧an āinwōt Iaar jiron̄ eok” im “toļ ko renaaj ko im̧aam, im reba ko renaaj oktak jān aer to̧o̧rļo̧k; im kwo naaj jokwe ilo N̄a, im n̄a ilo kwe; kōn menin etetal ippa” (Moses 6:32, 34).

“Etetal Ippa.” Ej juon kūr elem waan, aiboojoj.

Anij ekar kallim̧uri Inok bwe eļan̄n̄e enaaj kar peran n̄an jinoe, innām Anij enaaj kar pād ippān ilo aolepān jerbal eo. Anij enaaj kar kōm̧m̧ane bwe Inok en kajoor im kōkajoorļo̧k e n̄an kōm̧m̧an eļapļo̧k im jipan̄ e eromļo̧k jān jon̄an eo emaron̄ in kar ļōmņake.

Juon iaan āt ko rellōn̄ etan Rilo̧mo̧o̧r ej Immanual, ak “Anij ipped wōj” (Matu 1:23). Ej pād ilo etan im paotok eo an Irooj n̄an etetal ippād. Kāālet eo ej ad—jenaaj ke etetal Ippān, barāinwōt?

Ilo raan kein, jej kalimjōk Inok āinwōt juon em̧m̧aan in tōmak im juon rikanaan im ritōl eļap. Bōtaab m̧okta jān Inok rikanaan eo, ekar wōr juon Inōk eo edikļo̧k me ekar pere e make bōtaab ekar wōr kāālet n̄an etetal ippān Anij.

N̄e mour ej pen, n̄e kwojjab en̄jake āinwōt kobwe, keememej kallim̧ur eo an Irooj n̄an Inōk, im n̄an kwe. E enaaj etetal ippam̧. E ejjamin naaj kōmakeļo̧k eok, jaab n̄an jidik wōt iien.

Emmanuel. Anij ippād wōj. Anij ippam̧!

Āinwōt kom̧ likao raņ, Irooj ekar kajjitōk ippān Inok n̄an kakūrm̧ool priesthood eddo ko an roaorōk. Jerbal eo an eaar n̄an kwaļo̧k kōn ukweļo̧k n̄an armej ro renana. Inok ekar kwaļo̧k pere ko an. “N̄a [ij] juon ļaddik wōt,” ekar ba. “Aolep armej rej dike eō … bwe n̄aij rum̧wij ilo kōnono; ekōjkan n̄aij karejeram̧?” (Moses 6:31).

Irooj eaar uwaak kōn kajoor im kallim̧ur. “Kwōn ilo̧k im kōm̧m̧an āinwōt Iaar jiron̄ eok. … Kōppeļļo̧k lo̧n̄iim̧ im renaaj obrak … . Lo Aō Jetōb ej pād ioom … ; toļ ko renaaj ko im̧aam, … ; kōn menin etetal Ippa.” (Moses 6:32, 34).

Inok ekar katak bwe n̄e Irooj ej letok n̄an kōj juon jerbal, jejjab makeļo̧k kōm̧m̧ane. N̄e jej kōm̧m̧ani im kōjparoki bujen ko ippān Kraist, jej etetal Ippān im bōk kajoor eo An—jej erom kein jerbal ilo Pein.

Āinwōt Inok, ewōr juon am̧ jerbal aorōk: jerbal in karejar, jerbal ilo tampeļ, leto letak kwojkwoj eo, ekkatak jeje ko rekwojarjar, mour kōn jon̄ak ko an gospel eo, ukweļo̧k, m̧aanjabpopo n̄an mijen ko, im elōn̄. Maron̄ en̄jake tōrjān jon̄an. Kwomaron̄ en̄jake likjab. Ej Em̧m̧an Wōt. Ejjab kōn makeļo̧k kōm̧m̧ane. Ej kōn kāālet rainin—rainin im aolep raan—n̄an etetal ippān Anij.

Kōn jipan̄ eo An, kwomaron̄ kōm̧m̧an aolep men ko. E enaaj kōkajoorļo̧k, jeroļo̧k bōd, im kōmaron̄ eok eļapļo̧k jān lukkuun piktok in armej am̧. E ej iakwe eok! Āinwōt Būreejtōnji eo Eutiej an Doulul an Likao ro, kōmij iakwe kom̧ im reimaanwaj in koba ippāmi ilo etale Būreejtōnji eo Eļap an Doulul an Likao ro 2026 unin tōl eo eim̧we: “Etetal Ippa.”