Kallim̧ur ko Raorōk an Karōk eo an Jemād
Jetōb ko ad rej aikuj obrak kōn kam̧m̧oolol ilo ad ļōmņak kōn karōk eo eļap an Anij n̄an kōj.
Kōmeļeļe ko jān Alyssa Petersen
Karōk eo an Jemādwōj Ilan̄ ej kōmeļeļeik “kallim̧ur ko reļaptata im aorōk” (lale 2 Piter 1:3–4) im m̧ool ko me rej kōmeļeļeik kadkad eo im jibadbad eo ad indeeo.
Āinwōt kar kōmeļeļeik ilo “Baamle Eo: Juon Naan in Kean̄ n̄an Lal in”: “Aolep armej otemjej—em̧m̧aan im kōrā—kar kōm̧anm̧an ilo nememein wōt Anij. Kajjojo ej juōn jetōb jitōnbōro likao im jiron̄ nejin jined im jemed ilan̄, im, ilo āinwōt, kajjojo ewōr juōn mour kwojarjar im jipadpad ippān.”
Jemādwōj Ilan̄ ej kallim̧uri kōj bwe eļan̄n̄e jej ļoor karōk eo An im waanjon̄ak eo an Nejin Ejitōnbōro, kōjparok kien ko, im niknik ilo tōmak n̄an jem̧ļo̧kin, je “naaj bōk mour indeeo, eo ej mennin letok eo eļaptata iaan aolep mennin letok ko an Anij” (Katak im Bujen Ko 14:7).
Jerbal eo an Anij ej pedped ioon eddekļo̧k eo im mour ijo eutiej tata an ajri ro Nejin. Aolep m̧ōttan ko an karōk eo An kar ejaaki n̄an kōjeraam̧m̧ane kōj kōnke “aorōk in jetōb ko ekanooj ļap ilo [Mejān]” (Katak im Bujen Ko 18:10).
Karōk eo an Jemād
Ilo ko̧o̧njeļ eo ilo mour eo m̧okta, Jemādwōj Ilan̄ ekar kwaļo̧k n̄an ajri in jetōb ro Nejin karōk eo An n̄an eddekļo̧k im m̧ōņōņō eo indeeo eo aer. E ekar jiron̄ kōj bwe E enaaj jilkintok kōj n̄an laļ in n̄an kwaļo̧k n̄an kōj, n̄an lale eļan̄n̄e jenaaj pokake E im karbōb n̄an “bōk aiboojoj kobaikļo̧k ioon [bōrad] n̄an indeeo im indeeo” (lale Ebream 3:24–26).
Innām E ekar ba: “Wōn I naaj jilkinļo̧k? Im juon ar uwaak āinwōt eo Nejin Armej: N̄a e, jilkinļo̧k eō. Im bar juon ar uwaak im ba: N̄a e, jilkinļo̧k eō. Im Irooj eaar ba: I naaj jilkinļo̧k eo m̧oktata.
“Im eo kein karuo eaar illu, … im, ilo raan eo, elōn̄ rekar ļooreļo̧k e” (Ebream 3:27–28).
Juon wōt karōk kar jakem̧aantak—karōk eo an Jemād. Jemādwōj Ilan̄ eaar jab likūt kajjitōk eo, “Ta jenaaj kōm̧m̧ane?” E eaar jab kappok kakkobaba, kajjitōk kōn elmakot ko, ak kajjitōk kōn kōtmene ko. Loļātāt eo an kajjitōk eo An ekar pedped ioon won eo aikuj kar jilikinļo̧k n̄an lolorjake koņ ko im ļamļam ko an karōk eo An.
Lucifer eaar jab jakemaantak juon karōk me kar jab bōk jān juon jar eo edoom̧ an ribōk koņaan ro ilo ko̧o̧njeļ eo ilo mour eo m̧okta. Ekar jum̧ae! Ekar kappukot n̄an ko̧kkure anemkwoj in kāālet eo an armej, kar jolaļļok e, im “Eaar erom Setan, … devil eo, eo jemān aolep riab otemjeļo̧k, n̄an m̧oņ im n̄an kapiloik armej raņ, im n̄an tōlļo̧k er n̄an rikōm̧akoko ilo ankilaan” (lale Moses 4:1, 3–4). Utiej bōro, kabbwil, im ļōmņak kōn e make kar kōllowetake jum̧ae eo an ņae karōk eo an Jemād.
Karōk eo an Jemād im Gospel eo an Rilo̧mo̧o̧r
Karōk eo ej kōmeļeļeik jerbal ko an Jemān im Nejin me rej kōm̧m̧an an kōjeraam̧m̧an ko an mour indeeo ren pād n̄an aolep armej.
Gospel eo an Jisōs Kraist ej wāween eo jemaron̄ bōk kōjeraam̧m̧an ko kar kallim̧ur kaki ilo karōk eo an Anij, em̧ool katak eo, pedped in katak ko, kain̄i ko, im bujen ko jej aikuj tōmaki im ļoori. “Ejjeļo̧k bar juon āt ium̧win lan̄ ijello̧kun wōt in Jisōs Kraist, eo iaar kōnono kake, bwe armej ren mour” (2 Nipai 25:20). Em̧ool, Jisōs Kraist ej “iaļ eo, m̧ool eo, im mour eo: ejjeļo̧k juon armej ej itok n̄an Jema, eļan̄n̄e ejjab kōn [E]” (Jon 14:6; naan ko kar kobaiktok).
Taitōļ ko an Karōk eo ilo Bok in Mormon
Jej katak kōn m̧ool ko ilo ad kile im ekkatak elōn̄ taitōļ ko rooktak jen doon kōn karōk eo an Jemān ilo Bok in Mormon: Bar Juon Kallim̧ur kōn Jisōs Kraist. N̄an waanjon̄ak, ļōmņak kōn jon̄ak in taitōļ kein kar jokāāleti:
-
“Karōk in tūriam̧okake eo an Rikōm̧anm̧an eļap” (2 Nipai 9:6).
-
“Karōk eo an ad Anij” (2 Nipai 9:13).
-
“Karōk in lo̧mo̧o̧r” (Jarom 1:2; Alma 24:14).
-
“Karōk in lo̧mo̧o̧r” (Alma 12:25, 26, 30, 32, 33; 42:11, 13).
-
“Karōk in jepļaaktok” (Alma 41:2).
-
“Karōk in m̧ōņōņō” (Alma 42:31).
-
“Karōk eļap an tūriam̧o kake” (Alma 42:31).
Kajjojo tatiōl kein rej jipan̄ kōj kalikkarļo̧k ad meļeļe kallim̧ur ko raorōk an karōk eo an Jemān im ej kōkōm̧anm̧anļo̧k erreim̧aanļo̧k eo ad kōn jibadbad ko im meļeļe in mour wabanban ko ad.
Ekabwilōn̄lōn̄, taitōļ eo emakijkij tata kōjerbale n̄an karōk eo an Anij ilo Bok in Mormon (“karōk in lo̧mo̧o̧r”) ej pedped ioon pinmuur eo jān jerawiwi im mej kar kapidodoik kōn Pinmuur eo an Jisōs Kraist (lale Alma 12:25; 33:22).
Iaļ Eo Epojak
Jetōb ko ad rej aikuj obrak kōn kam̧m̧oolol ilo ad ļōmņak kōn karōk eo eļap an Anij n̄an kōj Jeļā eo kōn karōk eo An ej letok erreim̧aanļo̧k ko raorōk, rej kōkm̧anm̧anļo̧k lan̄lōn̄ ko ad, im kōkajoorļo̧k kōj n̄an anjo̧ ioon idajon̄jon̄ ko im apan̄ ko ad.
Jemādwōj Ilan̄ ej kea kōn kōj n̄an bar ro̧o̧lļo̧k n̄an kapijuknen eo n̄an Ippān. E ej karuwainene im kallim̧ur kōn kōjeraam̧m̧an ko, bōtaab E ejjamin naaj kōm̧akoko, kareel, ak kipel ad kōjerbal anemkwoj in kāālet eo ilo mour in E ekar letok n̄an kōj. Jej aikuj in jerbal im kāālet n̄an bar ro̧o̧lļo̧k n̄an Ippān kōn ļoor waanjon̄ak eo an Nejin Jitōnbōro.
“Iaļ eo epojak, im eļan̄n̄e jenaaj reilo̧k jemaron̄ mour indeeo” (Alma 37:46; naan ko kar kobaiktok).
Ij m̧ōņōņō ilo kam̧ool bwe Jemādwōj Ilan̄ ej rikōm̧m̧ane karōk kwojarjar eo n̄an ro Nejin. Jisōs Kraist ej ad Ripinmuur im ad Rilo̧mo̧o̧r. Āinwōt juon iaan Rijilōk ro An ilo raan ko āliktata, ij kam̧ool bwe E ilo m̧ool ej “iaļ eo, m̧ool eo, im mour eo” (Jon 14:6; naan eo kar kobaiktok).