“Etetal Ippa”—Jen kōllaajrakki

Ke Irooj ekar kūr Inok n̄an an erom juon rikanaan, E ekar leļo̧k n̄an e juon kallim̧ur “Aolep naan ko am Inaaj kajejjeti; im toļ ko renaaj ko im̧aam, im reba ko renaaj oktak jān aer to̧o̧rļo̧k; im kwo naaj jokwe ilo n̄a, im N̄a ilo kwe; kōn menin etetal Ippa.” (Moses 6:34).

Eļan̄n̄e kar kallim̧uri eok bwe etetal ippān Anij ekar meļeļe in E enaaj rie naan ko am̧, kōm̧akūtļo̧k kabbōjrak ko jān iaļ eo am, im pād ippam̧ iien otemjej—ekwe, etke kwojjab maron̄ etetal Ippān?

Naan em̧m̧an: Em̧ōj kar kallim̧uru eok menin, bōlen kiiō epaak in wōt Jabōt eo ļo̧k. N̄e kwoj bōk kwojkwoj eo, kwoj kallim̧ur n̄an “keememej E iien otemjej, im kōjparok kien ko An”—ilo bar jet naan, n̄an etetal Ippān. Etke kwoj kōm̧m̧ane menin? “Bwe Jetōb eo An en pād [ippam̧] iien otemjej” (Katak im Bujen Ko 20:77; eoon ko kar kobaiktok).

Kiiō, kwonaaj kile bwe Irooj ekar jab jiron̄ Inok, “Jutak ijin im reito reitak ippa.” E ekar jab ba “Jijjet im kakkūje ippa jidik.” E ekar ba, .”Etetal ippa.” Jej aikuj in jerbal ekkar n̄an im̧we ko an jetōb jej būki. Jej aikuj kōm̧m̧ane im ba ta eo jej tōmake ejim̧we.

Āinwōt Būreejtōn Marion G. Romney (1897–1988), juon rikakpilōklōk ilo Būreejtōnji eo Kein Kajuon, ba, “E wōt emaron̄ tōl būn̄tōn ne ko ad n̄e jej kōm̧akūt need.”

Bōtaab kile bar ta eo Irooj ekar jab ba. E ekar jab ba, “Ettōr ippa.” E ekar jab ba “Kājoon aolep kabbōjrak ko am̧ ippān ilo ejjeļo̧k kakkōt.” E ekar jab kajjitōk ippād n̄an “ettōr m̧ōkajļo̧k jān kajoor eo [ewōr ippād]” (Mosaia 4:27). E ejjab kōtmene kōj n̄an m̧akūtkūt wōt ilo juon dettan eo eiiūm̧. Ej jab katmāne bwe jen jab kar kōm̧m̧an bōd ak ebweer. E ej kōņaan wōt bwe jen wōnmaanļo̧k wōt.

Jej etetal ippān Rilo̧mo̧o̧r. Ejjab im̧aan In. Em̧ool jab ettoļo̧k jān E!

N̄e kwoj lukkuun etetal ippān juon, kwoj etetal iturier. Bōtaab ilo jon̄ak in kōnono in, jej pād itulikin wōt jidik Rilo̧mo̧o̧r. E ej tōl, im jej ļoore—epaak.

N̄e kwoj pād ioon iaļ eo ejim̧we, iaļ eo ejjab “tōlļo̧k” n̄an Jisōs—E ej bar pād ioon! Kemeemej kwojkwoj eo! Irooj, kōn Jetōb eo An, enaaj iien otemjej pād ippam̧, toon wōt am̧ karuwaineneik E.

Jemādwōj Ilan̄ im Jisōs Kraist rejjab kanooj inepata kōn ia eo kwoj pād ie ioon iaļ eo āinwōt Aer inepata kōn ia eo kwoj jujelļo̧k n̄ane. Er renaaj iioon eok jabdewōt jikin kwoj pād ie. Ejjab aorōk ewi raļo̧k in am̧ etetal, barāinwōt.

Jej aikuj būlik m̧aan (ETETAL). Jej aikuj in kōm̧m̧ane ekkar n̄an kien ko an Anij im im̧we ko an Jetōb (IPPĀN). Im jej aikuj in kōm̧m̧ane aolepān menin ippān ebar ejjeļo̧k ijello̧kin wōt Jisōs Kraist (N̄A).

(Jen ke Jisōs Kraist, Jemān Ilan̄, im Jetōb Kwojarjar rej aolep juon wōt ilo jibadbad—lale Jon 10:30; 17:21; Katak im Bujen Ko 35:2—ejim̧we n̄an ba bwe kwoj “etetal ippān Anij,” “etetal ippān Rilo̧mo̧o̧r,” “etetal ippān Jetōb,” ak jabdewōt iaan ļamļam jab in.)

Elōn̄ ainikien n̄an ļoore ilo laļ in. Ekanooj lōn̄ rikareel ro, ribun̄bun̄ ro, im rikien ro me rej kōņaan bwe kwoj “etetal” ippāer (ak leļo̧k n̄an er jāān). Ta eo ro jet rej ba emaron̄ in wōr tokjen, bōtaab eļan̄n̄e wōt ej jokkuun wōt juon ippān katak ko an Rilo̧mo̧o̧r.

Etetal Ippān.