’O rātou iho tō rātou ha’avā

Te tumu mātāmua roa nō te Hāmanira’a ’e nō tō tātou vaira’a i te tāhuti nei, nō te fa’afāna’o ïa ia tātou i te rāve’a nō te ’ohipa ’e nō te riro mai i te mea tā te Fatu e ani ia tātou ’ia riro mai […]

[…] ’Aita tātou i ha’amaita’ihia i te ti’amāra’a mōrare nō te rave i te mau mea ato’a tā tātou e hina’aro, i te taime ato’a e hina’aro tātou. ’Aita, ’ia au i te fa’anahora’a a te Metua, ’ua fa’ari’i tātou i te ti’amāra’a mōrare nō te ’imi atu ’e nō te ’ohipa mai te au i te parau mau mure ’ore […]

’Ua tūra’i te peresideni Dallin H. Oaks i te parau ē, tē tītau manihini nei te ’evanelia a Iesu Mesia ia tātou ’ia ’ite i te hō’ē mea ’e ’ia riro mai i te hō’ē mea nā roto i te fa’a’ohipa-ti’a-ra’a i te ti’amāra’a mōrare […]

[Noa atu rā] e ’ere nā tā tātou noa mau ’ohipa ’e tō tātou mau hina’aro e fa’aora ia tātou, e’ita e nehenehe. « Hope noa atu ā te mau mea ato’a ’o tē mara’a ia tātou ’ia rave » e fa’afaitehia tātou i te Atua nā roto noa i te aroha ’e te mata’i rahi tei matara nā roto i te tusia tāra’ehara hope ’ore ’e te mure ’ore a te Fa’aora […]

E rave rahi o tātou tē mana’o nei ē, e ti’a atu tātou i mua i te ha’avāra’a a te Ha’avā mure ’ore mai te tahi ’ohipa i te tiripuna ha’avā a tō te ao nei. Nā te tahi ha’avā e peresideni. E vauvauhia te mau parau. E topa mai te parau utu’a. ’E e riro ē, e vai noa te mana’o fē’a’a ’e te mata’u ē tae noa atu e fa’aro’o tātou i te parau utu’a. Tē ti’aturi nei rā vau ē, e ’ere terā te fa’ahōho’ara’a tano […]

E ’ere te mata’u i te Fatu i te taiāra’a fa’a’ōtohe ’ia tomo i mua i tōna aro ’e ’ia ha’avāhia. ’Aita, ’o te rāve’a hau atu rā nō te fā’ira’a hope’a nō ni’a ia tātou iho, te mau mea « e vai mau nei » ’e « ’o tē vai mau noa atu » […]

I te hope’ara’a, ’o tātou iho ïa tō tātou ha’avā. ’Aita e faufa’a te ta’ata ’ia parau mai i hea e haere. I mua i te aro o te Fatu, e fā’i tātou i te mea tā tātou i mā’iti ’ia riro mai i te tāhuti nei ’e e ’ite tātou iho ’ei hea tātou i roto i te tau mure ’ore.