Na Fesoasoani le Atua ia te A’u e Faaleleia La’u Faauoga

A o ou laitiiti, sa le tele ni a’u fegalegaleaiga lelei ma teineiti. Sa ou manatu i taimi uma sa fai i latou ma sui o le "faafeagai." Ina ua ou siitia ese, sa ou tauivi aua sa toatele atu teineiti i la’u uarota fou nai lo le mea sa i ai i la’u uarota tuai. Ou te lei iloa pe faapefea ona talanoa atu ia i latou.

Ae, o se teineitiiti i le uarota sa o se tasi o tagata muamua na faafeiloaia au. Sa iu ina avea i maua ma ni uo mamae. I se tasi aso, sa ou tuuina atu ai ia te ia se meaalofa, ae ou te lei iloa pe o le a fiafia iai. Sa ia faauiga seseina le meaalofa ma sa manatu sa ou fia uo faagaualofa ia te ia. O se taunuuga, ma te lei toe talanoa mo le ono masina.

Sa faigata aua sa ou matuai manao lava e faauo ia te ia. Sa ou fefe i sese la’u faatoesega ma atonu o le a atili ai ona leaga le ma va. Ae sa ou misia lana faauoga ma sa ou lagonaina le faanoanoa ona sa ou faatupuina lona faanoanoa. A o lei tupu lenei mea, sa ou manatu i taimi uma o le tatalo o se mea faigata, ae sa amata ona ou tatalo e le aunoa i le Alii mo se fesoasoani.

I se tasi aso a o ou faitauina tusitusiga paia, sa ou tau ai i le Mosaea 18:9, lea e fai mai e tatau ona tatou "faamafanafana atu ia te i latou o e e manaomia le faamafanafanaga." Sa ou iloaina e le gata ina tatau ona ou faatoese atu ae ia taumafai foi e faamafanafana ia te ia ma faaali atu le fiafia atili i le ma faigauo. O le faia o mea i la’u auala sa le’i aoga. Sa ou manaomia le agaalofa ma le lotomaualalo faateleina.

Na saunia e le Alii le taimi sa’o mo a’u e faatoese ai. Sa ma o ma lo’u tina e ave o’u tei i se gaoioiga a le Peraimeri a le siteki, ma sa ou tau atu ai i la’u uo ma lona aiga iina. Sa ou ole atu i le Alii e fesoasoani ma musuia au ina ia mafai ona ou talanoa atu ia te ia, ma sa mafai ona ou faatoese atu.

O le asō, o i ma’ua o ni uo lelei. Ma te tausua soo, faatutu faatasi ni sini, ma mafaufau ia i ma’ua lava e pei o ni tei. O le fiafia i se tasi e le faapea ai i taimi uma ua e gaualofa ia i latou. O nisi taimi, e tau lava o lou talisapaia o o latou uiga lelei ma fiafia e faatasi ma i latou.

Ou te iloa na fesoasoani mai le Alii ia te au, aua ana faapea e tuu mai ia te au lava, semanu ou te le manuia. Semanu e ese a’u tala e fai atu pe faateleina foi a’u faatoesega, ma o le a le aoga ai. Sa ou manaomia se tasi e sili atu nai lo a’u lava ia.

O iina e sau ai le ole atu ai i le Atua. E tele taimi, ou te le ole atu ai mo se fesoasoani ma taumafai e fai na o a’u mea uma. Ae e le o tuua na o i tatou, a ea? E i ai pea le Atua i o tatou autafa.

E faamanuia a’u e le Atua, e le o taimi uma i mea ou te manao ai, ae o taimi uma lava i mea e tatau ai mo au. I le ono masina ma te lei talanoa ai ma la’u uo, sa manaomia ona ou aoao pe faapefea ona maua faaaliga faaletagata lava ia ma faalogo i le Agaga Paia. O le taimi nei la, ua faigofie ona ou tatalo, aua ou te fiafia e talanoa ma lo’u Tama Faalelagi.