Manuki ma Vavega Faafaifeautalai

Sa ou fai atu, “Oi, Tinamatua, ou te fia sau e fesoasoani ia te oe. Ou te avanoa i le Aso Toonai nei. E leai sau mea e faia, o lea o le a ou sau ai e fesoasoani ia te oe e fau se upega.”

Ina ua ou taunuu i le Aso Toonai, sa saofai mai o ia ma le onosai i lona nofoa ma faatalitali mai mo au. Sa ma o atu i le togalaau, ma sa ou fesoasoani ia te ia e fau le upega. Ou te le iloa pe na faapefea ona ou faia, auā e faigata tele, peita’i e oo mai i le aso lenei o loo tu sa’o lava.

Mo au, sa lei foliga mai o se mea telē le fesoasoani ia Tinamatua—sa leai ni a’u mea sa fai i lena aso. Ae sa o se mea telē lea mo ia. Sa aoaoina ai au o le auauna atu atonu o se mea aupito itiiti lea mo au, ae i le isi tagata, e mafai ona avea ma se mea sili ona telē.

Sa ou amata laitiiti foi i le faasoaina atu o le talalelei. I le taimi muamua, sa ou popole tele—matuai popole lava—e faasoa atu le talalelei i a’u uo. Sa ou manatu o le a le fiafia a’u uo i le lotu. Ma ou te lei manao e faaoso i latou ia faanoanoa pe ona o se mea faigata.

Ae ina ia ou amata, sa tuuina mai e lo’u tina ia te au se kata mai faifeautalai sa i ai i luga le tuatusi o le falelotu. Sa ou tuuina atu i la’u uo le kata ma fai atu, “Sau i se gaoioiga a le autalavou. O le mea sili lea ona lelei.” Na sau o ia i le gaoioiga. I le malaga atu i le fale, sa filemu o ia i le ala atoa. Ona ia fesili mai lea i le vaiaso na sosoo ai, “Ta te toe o?” Sa ou faapea, “Oi, e te fia sau mo’i lava?” Ma mai lava i lena taimi sa sau ai pea o ia i gaoioiga, ma mulimuli ane i le lotu.

Ina ua ta’u mai e la’u uo ua saunia o ia e papatiso, sa ou faapea, “Ioe, tuu mai ia te au se sekone e faagasolo ai lena mea.” Ona ia valaaulia lea o le isi a ma uo i le lotu, ona toalua lea o ma’ua e fesoasoani ia te ia. Ma badda boom, badda bam—lea ua papatisoina nei a’u uo e toalua! Ma o i matou e toatolu o loo taumafai e fesoasoani i se isi uo ia sau i le lotu ma ia papatisoina foi.

Ua ou vaaia le tuputupu ae tele o le faatuatua o a’u uo ia Iesu Keriso. Ou te manatu e tele atu lo laua faatuatua nai lo au i nisi taimi. Pe a ou vaai o matou tufaina faatasi le faamanatuga, ou te manatu, “E maoae tele lenei mea. O le meaalofa sili lenei e mafai ona tuuina mai ia te au.” Na amata uma lava i lena kata laitiiti ona taitai atu ai lea i ni tagata se toalua ua papatisoina.

O le faia o se eseesega e amata laitiiti. O le fesoasoani atu i se tasi, e oo lava i le ataata i se tasi, e mafai ona tele sona uiga. Pe a e iloa le eseesega e faia i lena tagata, e te manao ai e faaauau pea ona e auauna atu. “O mea laiti ma faatauvaa e faataunuu ai mea tetele” (Alema 37:6).