Matamata Faasolosolo ia Outou i Nofoaga Paia
Ia e pulea uu avanoa i luga o le initoneti!
Pe na i ai se taimi na e mafaufau ai e suia ou aafiaga i luga o le initoneti e fai ma nofoaga paia?
Ua poloaiina i tatou e le Alii e tutu i nofoaga paia (tagai i le Mataupu Faavae ma Feagaiga 87:8). E mafai ona e faia lenei mea e ala i le faaaluina o le taimi i malumalu, falesa, lou fale, ma isi nofoaga e mafai ona e lagonaina ai le Agaga.
E mafai foi ona e faamoemoe atili i le auala e te faaaogaina ai telefoni feaveai faaneionapo, ala o faasalalauga faaagafesootai, ma le atamai faafoliga (A.I.). E mafai ona e fuafuaina auala e te fegalegaleai ai ma faamatalaga, vitio, ata, ma isi ala o faasalalauga i luga o le initoneti. A o e faia, o le a e fatuina ni nofoaga e mafai ona e lagona lelei atu ai le Agaga ma latalata atili atu ai i le Tama Faalelagi ma Iesu Keriso.
O nisi nei o auala e mafai ona e matamata faasolosolo ai i nofoaga paia.
Aoao Faamasani Au Ta’ui Tulafono [Algorithms]
O aso nei ua faigofie mo o tatou mafaufau ona alu atoa i avanoa faatekinolosi a o tatou punouai i tekinolosi. Afai tatou te le faaeteete, e mafai ona tatou tafefea atu i se āu aave i luga o le initoneti—e pei lava o le aave o se vaitafe—ma faalavelaveina ai mai mea e sili ona tāua. I le tele o itu, o lenei mea ua mafua ona o ta’ui tulafono [algorithms].
O se ta’ui tulafono [algorithm] o se vaega o tulafono po o faagasologa e mulimulitai i ai polokalama faakomepiuta. O nisi o ta’ui tulafono [algorithms] e filifilia mea e te vaai i ai i mea e te fautuaina atu ma mea e tuuina mai. O nei ta’ui tulafono [algorithms] e faavae i le auala e te auai [faaaoga] ai anotusi—fiafia, faasoa, faaali manatu, sefe, e oo lava i le a le umi e te matamata ai i vitio po o ata.
O le faamoemoega o nei ta’ui tulafono [algorithms] o le faatumauina lea o lou fiafia ina ia faaauau ai pea ona e faasolosolo mo se umi e mafai ai. O le faafitauli i lenei mea e mafai ona aafia ai lo tatou faaaogaina o le faitalia. E faatatau i tekinolosi, na faamanatu mai ai e Elder David A. Bednar o le Korama a Aposetolo e Toasefululua e faapea, i le avea ai ma fanau a le Atua, e mafai ona tatou “avea ma sui e galulue ae le na o ni meafaitino e tau galueaiina.” O le filifiliga saoloto, o le “tomai ma le avanoa e filifili ai ma galulue mo i tatou lava i auala e lelei, faamaoni, mama, ma faamamaluina,” o se vaega taua o le fuafuaga a le Atua mo i tatou.
Na aoao mai Elder Bednar o se ta’ui tulafono [algorithms] “e le fiafia ia te oe. E le popole ia te oe. Na te le iloa moni pe o e i ai pe leai.” Ua na o se faagasologa “o le a faia oe o se meafaitino e galueaiina, pe a e faatagaina.” O lea, aua le faatagaina!
E mafai ona e aoao faamasani au ta’ui tulafono [algorithms] e auauna lelei atu ai ia te oe. A e vaai i se ata o se malumalu, matamata i se ata pese o le Taumafai e Avea, pe tau atu i se isi lava savali lelei, ia mautinoa e auai ai. Faaalu lou taimi e fiafia ai nai lo le vave kiliki i totonu ma le alu i fafo. O lenei mea o le a i ai se aafiaga malosi i luga o le ta’ui tulafono [algorithms] ma aoao ai e tulei atu ia te oe e le aunoa ia na ituaiga o anotusi! I le aluga o taimi, e mafai ona fesoasoani lenei mea ia te oe e fausia ai se nofoaga e sili atu ona paia mo le [matamata] faasolosolo.
Faaeteete i Pa o Si’uleo
O le tele o le taimi e te faaaluina i ituaiga o anotusi faapitoa, o le tele foi lena o le avea o na ituaiga o anotusi ma mea o le a e vaai i ai. O lou vaaiga i le lalolagi e faasolo ina vaapiapi ma vaapiapi seia oo ina e lagona o mea e te vaai i ai o mea moni ia. Ua ta’ua lenei mea o se pa o si’uleo.
Afai e te le faaeteete, e mafai ona e āia i ni pa o si’uleo e le aoga ma lamatia faaleagaga. Ua aoao mai taitai o le Ekalesia e tatau ona tatou aloese mai anotusi o loo saili “e faalauiloa atu le ita, finauga, fefe, po o manatu o taupulepulega e lē faavaēa.” E tatau ona tatou taulai atu i faamatalaga faatuatuaina, moni, ma sa’o ma liliu ese mai mea e “taumatemate pe faavae i tala feaveai.” O le Agaga Paia faatasi ai ma le suesue ma le faaeteete, e mafai ona fesoasoani ia tatou e iloatino ai le mea moni mai le mea e sese (tagai i le Mataupu Faavae ma Feagaiga 11:12; 45:57). O le upumoni e mafai ona maua i taimi uma i tusitusiga paia ma aoaoga a perofeta ma aposetolo soifua.
Ua uunaia i tatou e le talalelei e saili le poto ma le malamalama. Ae ia e magafagafa. Afai e te tau atu i se mea e le moni pe ua lapataia ai e le Agaga ina ia aloese mai ai, filifili e mulimuli i na uunaiga ma saili ni nofoaga e sili atu ona faagaeetia e faaalu ai lou taimi. Saili i mea e “mama, matagofie, logoleleia, pe tauleleia” (Mataupu Faavae o le Faatuatua1:13), i le initoneti ma i le lalolagi moni.
Manatua Pe O Ai Oe
E tele leo o loo sailia lo tatou gauai atu. O nisi e lelei, ae o nisi lava e taufaasese—aemaise lava i luga o le initoneti. E aofia ai taumafaiga a Satani ia tatou faagalo po o ai moni i tatou ina ia mafai ai ona tatou faanoanoa e pei o ia (tagai i le 2 Nifae 2:27).
Ooe o se atalii po o se afafine o le Atua faatasi ai ma se gafatia faalelagi e le faatapulaaina. Ia taialaina oe e lenei malamalama i vaega uma o lou olaga e aofia ai a’o e vaavaai mo anotusi faagaeetia ma faasoa atu i isi. Vaai atu i taimi uma ia Iesu Keriso i mea uma e te faia ( tagai i le Mataupu Faavae ma Feagaiga 6:36). Ma, a’o e matamata faasolosolo i nofoaga paia, e mafai ona e fatuina se avanoa e mafai ona fesoasoani ia te oe e lagona ai le Agaga ma faamalosia ai lou faatuatua.