O Se Lesona i le Alofa o le Atua

Saunia e Shane P., 15 tausaga

E faataga i tatou e le Tama Faalelagi e oo i luitau ina ia mafai ai ona tatou malolosi atili. E le faapea ai e le alofa o Ia ia i tatou.

E taua le aoaoga o le poto salalau ia te au. Ou te lagona le tele o uunaiga ina ia maua ni togi lelei, o lea ou te taumafai ai i le mea sili ia lelei au taumafaiga. Ae o nisi taimi ou te toilalo ai.

I se tasi taimi, sa ou misia ni nai aso o le vasega ona sa ou auai i se tauvaga faatufugaga i la’u aoga. Sa ou misia le tele o lesona. Ina ua ou toe foi mai, sa ou tauivi e malamalama i talanoaga a le matou vasega. Na amata ona pa’u o’u togi.

O le le malamalama i lesona na ou le fiafia ai, ma sa amata ona ou fesiligia lo’u taua faaletagata lava ia. Sa ou lagona e pei e le lava lo’u lelei ona o le maualalo o o’u togi, ma sa ou tagi so’o. Sa ou le iloa po o le a le mea a fai.

Mulimuli ane, sa ou tatalo ma ole atu i le Tama Faalelagi e fesoasoani mai ia te au e talia ma faatoilalo o’u tofotofoga.

E Silafia e le Atua O’u Tauiviga

O le taimi lava na uma ai la’u tatalo, sa ou maua se feau mai la’u uo o Shiella. “Ei, o ok oe?” o lana fesili lea. “O a mai oe?”

Sa ou ta’u atu ia Shiella o loo ou tauivi. E ese le aoga e i ai o ia, ae e tutusa le maualuga o ma vasega, o lea e tutusa ai foi ma vasega o loo ave. Sa fesoasoani mai o ia ia ou malamalama i lesona na ou misia.

Sa ou iloaina sa silasila mai le Tama Faalelagi sa ou tiga, ma sa Ia auina mai ia Shiella e faamafanafana ia te a’u. Na ou iloa ai e faaaoga e le Tama Faalelagi isi tagata e faaali mai ai e popole moni o Ia ia i tatou.

O lenei mea na aoaoina ai foi a’u e le manaomia ona ou manuia i mea uma. Pe a i ai ni o tatou luitau, e mafai ona fesoasoani mai le Tama Faalelagi e faamalosia atili i tatou. E le faapea ai e le alofa o Ia ia i tatou. Ua ou aoaoina e sili atu le taumafai e fai se mea ma toilalo ai, nai lo le leai o se mea e faia, aua e mafai ona ou aoao mai le toilalo. O lenei, ua ou fiafia i o’u togi aua na fesoasoani mai le Tama Faalelagi ia te a’u e faatoilalo lena tofotofoga.

O Se Meafaigaluega i Ona Aao

E pei foi o au, e toatele talavou i lau uarota o loo tauivi ma aoaoga. O nisi e le toaaga mai ona e i ai a latou galuega faatino faalevaega po o gaoioiga a le aoga ua faatulagaina i Aso Sa, pe latou te ala i le leva o le po e fai meaaoga ma faamisi ai le lotu ina ia mafai ona latou malolo.

O a’u o se taitai i la’u vasega a Tamaitai Talavou i la’u uarota, o lea o Aso Sa muamua ma lona fa uma, matou te o ai ma faifeautalai po o isi talavou e auauna atu i le autalavou ua le toaaga mai. Ou te molimau atu ia i latou o le faalatalata atili atu i le Tama Faalelagi ma Iesu Keriso tatou te malolosi ai ma fesoasoani e faatoilalo ai o tatou tofotofoga. O le lafoaia o i Latou e le o le vaifofo lea.

I se tasi taimi, sa matou auauna atu ai i se alii talavou. Sa matou valaaulia o ia e faia le tatalo faaiu i le faaiuga o le asiasiga. Ina ua ia tatalo, sa ia faafetai atu i le Tama Faalelagi mo le matou asiasiga. Sa matua fiafia ma faafetai o ia ona na matou faaaluina le taimi e siaki atu ai o ia.

Sa ou lagonaina foi le lotofaafetai, ma ou lagona o le taua o le tagata lava ia. Sa ou iloaina e fiafia isi tagata pe a ou i ai, ma e mafai ona ou fesoasoani ia i latou. E mafai ona avea a’u ma se meafaigaluega i aao o le Atua e faaali atu ai i isi e le o tuua na o i latou.

O le Toilalo E Le Faamatalaina Ai A’u

Atonu e te lagona le lotovaivai ona na e toilalo i se mea, ae o le toilalo e le faapea ai ua le lava lou lelei. E mafai e le Tama Faalelagi ma Iesu Keriso ona fesoasoani ia e tuputupu ae malosi faaletino, faaleagaga, ma faalelagona.

Soo se taimi lava tatou te lagona ai le tuua toatasi, o loo i ai Iesu Keriso iina. E le mafai ona tatou vaai ia te Ia i taimi uma, ma o nisi taimi tatou te le lagonaina ai o loo i ai o Ia iina, ae o loo i ai o Ia. E tusa lava pe e te lagona le mamao mai ia te Ia, ae ua saunia Iesu Keriso e faafeiloai oe ma aao mafola. Soo se taimi lava e te sau ai ia te Ia, o le a i ai o Ia iina, ma o le a Ia taliaina oe mo lou tagata ma siitia oe i luga.

O le tatalo, e mafai ai ona e tau atu i le Tama Faalelagi ou lagona ma ole atu mo se fesoasoani. Ou te iloa e tali mai o Ia i na tatalo. Pe a ou tatalo, ou te lagona le faamafanafanaina, e pei o loo fusi au e se tagata. Ou te lagona ai e pei e mafai ona ou faia soo se mea. E mafai ona ou faia mea uma faatasi ma Ia.

E nofo le tusitala i Cebu, Filipaina.