O OaNatia

I le 1836, na o atu ai le Perofeta o Iosefa Samita ma ni nai soa i Massachusetts e saili mo se faaputuga tupe e lei i ai se isi e onaina e fesoasoani ai i le Ekalesia e totogi ana aitalafu.

Ae na iu ane sa le’i i ai se na tupe. Atonu na lagona e nei uso faamaoni sina maasiasi. Ae sa faamautinoa atu e le Faaola ia i latou: “O A’u, o le Alii lo outou Atua, ou te le o le fiafia i lo outou o mai i lenei malaga, e ui i o outou sese” (Mataupu Faavae ma Feagaiga 111:1).

E pei ona tupu, sa i ai “oa” i le tulaga o tagata faamoemoeina e liliu mai i le eria o e na saunia e faalogo i le talalelei toefuataiina (tagai i le Mataupu Faavae ma Feagaiga 111:2–3). Sa aoaoina ma papatisoina e Iosefa ma ana soa ni nai tagata liliu mai. O lea na iu ai, sa le o se malaga na ma’umau. O le mea moni, o le mea na iu ina latou ausia atonu e sili atu ona taua nai lo le mauaina o tupe.

O Oliva Kurena sa o se tagata faamaoni o le Ekalesia o lē na tuu i ai le tofiga faigata o le nofo i Katelani, Ohaio, e totogi mea tautupe a le Ekalesia ina ua o atu le toatele o le Au Paia i Misuri.

O lona uiga o le feutagai ma nisi o tagata lava ia o e na tutuliesea le Au Paia i fafo. E le o se mea e ofo ai, sa le’i mafai e Uso Kurena ona aoina mai le tele o mea na aitalafu ai [tagata] i le Au Paia.

Ae sa fesoasoani le Alii ia Uso Kurena e saunia mo le le fiafia ina ua Ia tuuina atu le tofiga. Sa Ia ta’u atu ia Iosefa Samita, “A pa’ū o ia [Oliva Kurena] o le a toe tulai mai o ia, ona o le a sili atu le paia o lana taulaga ia te a’u nai lo ana faatelega” (Mataupu Faavae ma Feagaiga 117:13; faaopoopo le faamamafa).

Mafaufau i mea ua finagalo mai ai le Alii ia i tatou. E finagalo o Ia ia avea i tatou ma e faatupuina le filemu, ia fesoasoani i e matitiva ma e le tagolima, ma ia faasalalau atu le agalelei. Tatou te faia mea uma tatou te mafaia—ae ua tatou iloa foi, i tua o o tatou mafaufau, atonu tatou te le manuia atoatoa i taimi uma. O taua, mativa, ma le agasala e mafai ona faaauau pea seia oo lava i le Afio Mai Faalua.

Ae e mafai ona tatou faia taumafaiga uma e aveese ai le lalolagi (aemaise lava o tatou lava olaga) mai nei mea.

E ui lava i a latou taumafaiga silisili, ae sa le mafai e le Au Paia ona fausia se malumalu i le Itumalo o Jackson, Misuri. O sauaga ma vevesiga na latou feagai, sa matuā lē faavaivai lava.

Vaai faalemafaufau i lo latou mapu ina ua ta’u atu e le Faaola i le Perofeta o Iosefa Samita:

“A Ou tuuina atu se poloaiga i soo se tasi o atalii o tagata, e fai se galuega i lo’u igoa, ma o atu ia atalii o tagata ma lo latou malosi atoa ma mea uma ua ia te i latou e fai lena galuega, ma lē tuua lo latou filiga, ae o mai o latou fili ia i latou ma taofi i latou mai le faia o lena galuega, faauta, ona tatau ai lea ia te a’u ona lē toe manaomia lena galuega mai i lima o ia atalii o tagata, ae talia a latou taulaga” (Mataupu Faavae ma Feagaiga 124:49).

Afai e te faia taumafaiga uma e faataunuu ai se tofiga ae ua taofia e ou “fili”—ma o na mea e mafai ona aofia ai fili e pei o ma’i, atuatuvale, faama’i pipisi i le lalolagi atoa, ma isi tulaga e le mafai ona e pulea—e le afaina. Po o le a lava le mea e mafai ona e faia, o le a talia e le Alii lena mea.