Malosi e Taofi ai le Faatusatusa

Ata na tusia e Katelyn Budge

O nisi taimi ou te faatusatusa ai a’u lava i isi ma lagona le faanoanoa ona ou te le aulelei pe “atoatoa” e pei o i latou. Ona o lenei mea, sa ou feagai ai ma ni tofotofoga faigata faalemafaufau ma faalelagona. Sa ou saili i luga o le initoneti mo punaoa e foia ai, ae sa le mafai ona ou maua se mea na aoga.

I se tasi aso sa ou filifili ai, “E manaomia ona ou alu i lalo ma tatalo, aua o loo i ai se tasi iina e mafai ona tuuina mai ia te au le opo e sili ona tele.” O lea sa ou faalagolago ai i le Tama Faalelagi ma Iesu Keriso ma tatalo faamaoni loa.

Ina ua ou faia, sa ou manatua na faia a’u e toatasi e le Tama Faalelagi ma i Lona faatusa, o lea e tatau ai ona ou talisapaia a’u lava. Sa Ia tuuina a’u iinei mo se faamoemoega, ma ua ou fiafia ua ou i ai i le lalolagi! E ala mai i le Agaga Paia, sa Ia faamanatu mai ai ia te a’u ou te sili atu nai lo le mea ou te mafaufau i ai, ma na aumaia ia te a’u le malosi.

Sa ou filifili e aveese ala o faasalalauga faaagafesootai ma ia mautinoa sa ou siomia au lava i tagata sa’o—o tagata na faaali mai ia te au le alofa faaKeriso. Ou te matua faafetai lava mo a’u uo i la’u vasega o Tamaitai Talavou aua o i latou lava o ni malamalama susulu. Soo se taimi lava ou te faitioina ai a’u lava, sa latou faamanatu mai ia te a’u ou te aulelei ma e i ai so’u taua.

Ou te faatusatusa pea a’u lava i isi i nisi taimi. Ae o taimi uma lava ou te tatalo ai, e ta’u mai e se leo filemu, ma le itiiti ia te au, “Amara, e te aulelei.”

O Iesu Keriso o lo’u Faaola ma o la’u uo sili. E i ai pea o Ia iina mo au, e tusa lava pe ou te lagona e pei ou te le o manatuaina pea o Ia e pei ona tatau ai. Ou te iloa e alolofa o Ia ma le Tama Faalelagi ia te a’u, ma ou te alofa foi ia i Laua. Ou te manatu o le a ou le oo lava i le ituaiga alofa La te tuuina mai ia te au i se isi lava mea.