Tutu i Nofoaga e Sili Ona Paia
O le mana ma faamanuiaga o le malumalu o le a fesoasoani ia te oe i aso luitauina ma fiafia o i luma atu.
Malumalu o Navu Ilinoi
A o avea au ma se alii talavou, ou te manatua le tuuina e lo’u tina o o laua laei o le malumalu ma lo’u tama i luga o le laulau o le umukuka. Ona ia aveina lea o se ofu talaloa o le malumalu ma auli ma le faaeteete piliki taitasi i luga o se laupapa auli. Na te faifaimalieina i taimi uma lava. O se tasi lea o mea ou te manatuaina mai lo’u talavou.
I lena taimi, ou te le’i talisapaia atoatoa le malumalu, ae a o ou vaavaai atu i lo’u tina o auli o la’ua laei o le malumalu, sa mafai ona ou iloa le taua o le malumalu ia i la’ua. O a la’ua faataitaiga na aoaoina ai a’u i le paia o le malumalu ma le taua tele o le “tutu … i nofoaga paia, ma aua le masii ese” (Mataupu Faavae ma Feagaiga 87:8).
O Peresitene James E. Faust (1920–2007), o lo’u peresitene o le siteki a o avea au ma se alii talavou ma o’u faiaoga faaleagaga, na uunaia le Au Paia “i le lalolagi atoa, i soo se mea e mafai ai, ina ia taumafai e tutu soo i nofoaga paia.” E mautinoa lava e mafai ona avea o tatou aiga ma falelotu ma nofoaga paia, ae “o o tatou nofoaga sili ona paia o o tatou malumalu paia ia.”
O le tu i nei nofoaga sili ona paia o le a e maua ai le mana ma faamanuiaga a le Atua e fesoasoani ia te oe i aso luitauina ma fiafia o i luma atu.
Malumalu i le Lalolagi atoa
I le avea ai ma taitai o le Ekalesia, e masani ona fesiligia i tatou, “Aisea ua outou fausiaina ai le tele o malumalu?” Tou te manatua le tali a Peresitene Russell M. Nelson i lena fesili i lana saunoaga i le konafesi aoao ia Oketopa 2024? Fai mai o ia, o loo tatou fausiaina malumalu i se saoasaoa e lei masani ai “aua ua faatonuina i tatou e le Alii e faia lena mea.”
O se tasi o mafuaaga taua mo lenei mea ona ua vaetofia malumalu e ala i le mana o le perisitua ina ia fusifusia feagaiga tatou te osia ma sauniga tatou te maua iina i le lalolagi ma i le lagi (tagai Mataio 16:19). Pe a tatou mulimuli i faatonuga a le Alii e fausia malumalu i le lalolagi atoa, o le mana ma faamanuiaga e tuuina mai e malumalu o le a mafai ona oo atu i le toatele o fanau a le Atua i itu uma e lua o le veli.
Mana Folafolaina
Na aoao mai Peresitene Russell M. Nelson, “o tagata taitoatasi e osia feagaiga i vai papatiso ma i totonu o malumalu—ma tausi i ai—ua faateleina le avanoa e maua ai le mana o Iesu Keriso.”
O lenei mana sa folafolaina mai i le faapaiaga o le Malumalu o Katelani. Na tatalo le Perofeta o Iosefa Samita “ina ia mafai e tagata uma e ulufale … i le maota o le Alii ona lagona le mana [o le Alii]” ma “ina ia o atu … ua faaauupegaina i [Lona] mana” (Mataupu Faavae ma Feagaiga 109:13, 22; faaopoopo le faamamafa).
O loo faaauau pea i aso nei. Sa ou maua le faamamaluina e faatasi ma Peresitene Nelson mo le toefaapaiaga o le Malumalu o Manti Iuta ia Aperila 2024, lea sa ia tatalo ai ina ia mafai ona tatou malamalama “i le mana ua faaeeina mai ia [i tatou] [i totonu o le malumalu].”
Na aoao mai Peresitene Emily Belle Freeman, o le Peresitene Aoao o Tamaitai Talavou, o le sa ou iloaina talu ona ou auauna atu o se epikopo i se uarota a le iunivesite i tausaga ua mavae, o Iesu Keriso o le a “siitia i tatou i luga i le mea o loo i ai o Ia ma, i le faagasologa, e mafai ai ona avea i tatou e faapei o Ia” a o tatou “maua sootaga loloto atu o le feagaiga ma Ia” e ala i le malumalu.
O sauniga ma feagaiga e faalatalata atili atu ai i tatou i le Alii, fusia ai i tatou ia te Ia, ma tuuina mai ia i tatou le avanoa sili atu i Lona mana ma faamanuiaga, lea tatou te manaomia uma. Na aoao mai Peresitene Nelson “O Iesu Keriso … , ma ua na o Ia lava, [ua i ai] le mana e siitia ai oe i luga a’e o le toso a lenei lalolagi.”
Faamanuiaga o le Filemu ma le Olioli
E le’i leva ona valaau a’u i le Au Fitugafulu, ae tofia a’u e auauna atu i Egelani. Sa ma aveina ma Sister Rasband le ma fanau laiti e toalua, o Shannon ma Christian. Na vave ona ma iloa le osigataulaga o le a faia mo i laua, aemaise lava mo Christian. Sa 17 ona tausaga ma sa tulimatai atu i lona tausaga mulimuli i le aoga maualuga ma ana uo ma tauvaga afeleti, lea o le a ia misia nei i [Amerika].
Ina ia fesoasoani ia Shannon ma Christian e faamasani i lenei nofoaga fou, sa ma filifili ai e o i le Malumalu o Preston Egelani e faatino papatisoga mo e ua maliliu. Matou te le’i faia lava lenei mea i lo matou olaga pisi i [Amerika]. O le minute lava na matou savavali atu ai i totonu o le potu papatisoga o le malumalu, sa suia ai mea uma.
Ina ua uma ona faia papatisoga, sa tuu e Christian lona lima i luga o lo’u tauau ma fesili mai ma le faamaoni, “Tama, aisea na tatou le faia ai muamua lenei mea?”
Potu papatisoga o le Malumalu o Preston Egelani
Sa ou aoaoina se lesona taua i lena aso. Na suia e le malumalu a matou vaaiga, aumaia ia i matou le filemu ma le olioli, ma siitia ai i matou faaleagaga e sili atu nai lo se isi lava taamilosaga lakapi po o taaloga pasiketipolo. Afai e i ai sou avanoa e auai ai i le malumalu, ou te uunaia oe ina ia e alu soo i le tele e mafai ai. Ave igoa o ou tuaa ma faatino papatisoga ma faamauga mo i latou. O ou aafiaga i le malumalu o le a aumaia ai le filemu ma le olioli ia te oe ma isi iinei ma le olaga a sau.
O Se Valaaulia
Afai na o ou matua, matua matutua, po o nai ou tei i le malumalu, ou te valaaulia oe e matau pe faapefea ona latou vaai i le malumalu i a latou amioga ma faatinoga—e pei lava ona sa ou faia i o’u matua. Vaavaai mo avanoa e talanoa ai i lou aiga, lou epikopo, ma isi taitai e uiga i le malumalu. O le a latou fesoasoani ia te oe.
Ou te valaaulia foi outou ina ia taulai atu i taimi uma i le Alii ma ia agavaa. Ona pei lea ona saunoa mai la’u uo pele, o Peresitene M. Russell Ballard (1928–2023), i se tasi taimi, “O le a e faafetai pe a oo mai le aso e te auai ai i le malumalu ma ua e saunia e maua folafolaga ofoofogia uma ma faamanuiaga e finagalo le Alii e tuuina mai ia te oe.”
Ou te molimau atu o loo soifua Iesu Keriso. O le tutu i Ona malumalu—o o tatou nofoaga sili ona paia—e ala i le sauniuni mo, ma le faamamaluina o sauniga ma feagaiga paia o le a faamanuia ai oe i le filemu, olioli, ma le mana i le taimi nei ma lou olaga atoa.