Aumai Mea o Ia te Oe
E mafai e le Faaola ona liliu soo se mea e te ofoina atu—tele pe laitiiti—i ni faailoaga mamana o le alofa.
I se tasi taimi, i la’u misiona, sa ma faia ai ma la’u soa se keke penu manaia lava. Sa ma mananao e faaali atu lo ma alolofa ma le agaga faafetai mo tagata o le matou uarota, o lea ina ua ma vaai i se paluga keke i le faleoloa, sa ma iloa lelei lava le mea e fai.
Sa ma faaaluina le tele o itula e tiliva ai fasi keke, ma sefe ni fasi keke mulimuli mo ni faifeautalai se toalua na faatoa maea mai. Sa ma afe i lo ma fale mautotogi e aumai le koneteina keke mulimuli, ona ma faanatinati atu lea i le fale o a ma uo i le mamafa o timuga.
Sa pogisa lo latou poletito, o lea sa le mafai ai ona ou iloa lelei atu o latou foliga, ae sa mafai ona ou vaai faalemafaufau i o latou foliga ataata faafetai a o latou tofoina le ma keke manaia. Ou te le’i mafaufauina se tasi o i latou o le a taofi le lamuina ina ua ia uina le keke ma fai mai ma le le mautonu, “Tuafafine … o le araisa le mea lea.”
Na oo mai ia te a’u le malamalama. Sa ou uuina mai le koneteina sese—ma aumai ia i latou a ma toe’aiga mai le meaai i le aoauli!
Sa ou matuai ma lava. E mafai faapefea ona matua sese la ma’ua faatinoga o le auauna atu?
Taulaga Laiti …
Pe na i ai se taimi na e popole ai e uiga i le “toilalo” i le auaunaga? O nisi taimi, tatou te lotovaivai ai pe a tatou manatu e tatau ona foliga le auauna atu i se auala faapitoa. Atonu e te lagona e pei e te le o maua ni meafaigaluega sa’o e fesoasoani ai i se tasi pe e te le o mautinoa po o le a tonu le mea o manaomia e se tagata. Afai na e lagonaina faapena, e le na o oe.
Ae manatua le taimi na fafagaina ai e Iesu le 5,000? Na tupu lenei vavega ona sa ofoina atu e se tamaitiiti e toatasi mea sa ia te ia: o areto e lima ma i’a laiti e lua (tagai Ioane 6:9). Na iloa e le tamaitiiti e lē lava lea e fafaga ai tagata uma. Atonu na ia lagona sina faavalevalea e o’o lava i le ofoina atu. Ae na liua e Iesu lona agalelei ma lana galuega itiiti o le auauna atu i se vavega.
E mafai foi e le Faaola ona liliu a tatou faatinoga laiti o le auauna atu i ni faailoaga mamana o le alofa. Soo se taimi—ma e tusa lava po o le a—tatou te “[feoai] ma faia mea lelei,” o le a faatasi le Atua ma i tatou.
… Taunuuga Tetele
Ua fetalai mai le Alii, “O le mea lea, aua le faavaivai i le faia o mea lelei, ona o lo o oulua faataatiaina le faavae o se galuega tele. Ma e mai mea iti e tutupu mai ai mea tetele” (Mataupu Faavae ma Feagaiga 64:33). O faatinoga uma o le alofa moni, e tusa lava po o le a le laitiiti, e tutupu ai mea tetele, e aofia ai faauoga anoa, alofa faateleina, ma se sootaga loloto atu i le Faaola.
E ui lava e lei sa’o le keke sa kilivaina, ae sa faafetaia pea e a’u uo lenei faatinoga (ma sa i ai se uiga malie lelei). “E le faatatau i le keke,” o le tala lea a se tasi o i latou. “O le meaalofa moni o le taumafaiga na lua faia e auauna mai ia i matou.” E le’i afaina ia i latou le mea na ou faia, ae o lo’u faia o se mea. Ona o lenā mea, na faamalosia ai la matou faauōga.
Sister Maxfield ma lana soa, o Sister Sousa
Ia aua laia le fefe e auauna atu! E te lē tau faia ia atoatoa. Ofo atu soo se mea ua ia te oe—e tusa lava pe o le araisa ae le o le keke.