Tera Tion?

Ni booki aika tabu, te taeka ae Tion e kona n nanonaki bwa:

• “Ake a itiaki nanoia” (Reirei ao Berita Aika Tabu 97:21).

• Ana aomata te Atua, ke te Ekaretia ao ana titeiki (taraa Reirei ao Berita aika Tabu 82:14).

• Te tabo ae onoti ike a maeka iai ana aomata te Uea ao n ikotaki, n aron:

  1. Ana kaawa Enoka (taraa Mote 7:18).

  2. Te kaawa are i Ierutarem n taai ake ngkoa (taraa 2 Tamuera 5:6–7; 1 Uea 8:1; 2 Uea 9:28).

  3. Te Ierutarem ae Boou—te kaawa ae e na kateaki ni boong aika kaitira i Jackson County, Missouri, USA (taraa Reirei ao Berita aika Tabu 45:66–67; Taekan te Onimaki 1:10).

E ngae ngke kaain te Ekaretia ni Boong aikai a aki ikotaki n te tabo teuana, ti “kaainna bwa ti aonga n riki bwa taan buoka aron katean Tion ao ni katauraoi imwaain manga okin te Uea.” A tia n reireiniira ara taan kairiiri bwa ti na katea Tion ao ni kakorakora te Ekaretia n taabo ake ti maeka iai. Ti karaoa aio, n te aro ae onoti, man ukoran te kan maiu n aron maiuia ana aomata “Tion. N aron te katooto, n Mote 7:18 ti reiakinaki ae:

• “Ti teuana nanoia ao teuana aia iango.”

• A maeka inanon te raoiroi.

• Bon “akea ae e kainnano i buakoia.”