Nakomai, Iriirai
Reirei ao Berita aika Tabu 95; 103; 107
Kaubwai aika a Karabaaki
Ukeuke inanon Booki aika tabu. Ao e bon uaana.
Te Uea e Kauringiira ma te Tangira ibukin Tuua ake Ti Aki Mwannanoi.
N Reirei ao Berita aika Tabu 95, e aki kukurei teutana Uea irouia Aomata Aika Itiaki. E a kaman kauringiia mai imwaaina bwa a na katea te tembora (taraa Reirei ao Berita aika Tabu 88:119)—ma nimaua te namwakaina imwiina, akea te bwai ae a tia ni karaoia nako iai.
Kanga akea iangoana n te bong aei. Katean taian tembora bon te bwai ae rangi ni boboto iangoana ibukira! Ma akea te bwai ae kaotia te Uea n taekan te tembora n 1833. Aomata Aika Itiaki a aki rangi ni butimwaea bwa kakawakira aron te tembora.
Ngaia are tera are e a tia ni karaoia te Uea? E karaua ni kabwarabwara raoi arona bukin tera E tangiria bwa a na katea te tembora (taraa Reirei ao Berita aika Tabu 95:8–17). E kamataata raoi te bwai are E taekinna mai imwaaina, e anga te atatai aika a boou ao e katuruturua kakawakin katean te tembora.
Te Bure e Uota te Boaaki, ma e Teimatoa te Uea n anga ana Kakabwaia n aron ana Berita.
N 1834, a bon miimi Aika Itiaki bwa bukin tera ngkai e kariaia te Uea bwa a na kakiriweaki irouia aia kairiribai ao ni kanakoaki man oin abaia. Rinanon te Burabeti, Iotebwa Timiti, te Uea e anga uoua ana kaeka.
Te Moan, e taku te Uea bwa n tabetai E kariaia aomata aika a buakaka bwa a na karaoi mwakuri aika a bubuaka “bwa a aonga ni kaonrakea bairean buakakaia, bwa e aonga n onrake aia mwangko” (Reirei ao Berita aika Tabu 103:3). E katerea n te aro aei Aramwa: “E bon kariaia bwa a na karaoi [bwaai aika a buakaka] …bwa taian motikitaeka are e na kamwakuria iaoia n unna e na bon eti” (Aramwa 14:11).
Bukina teuana ngkai te Uea e anganiia Aomata Aika Itiaki bon ibukin aia bure tao e bon matoa teutana aron ongoraeakinana: “Ao bwa aonga naake arania n arau ni katuaeakaki i nanon te tai ae uarereke ma te tuaa ae e rang ni kakaiaki ao ni karawawata, ibukina bwa aki bane n ongo nakon taian reirei ao tuua ake I angania” (Reirei ao Berita aika Tabu 103:4).
Tiaki nanona bwa e kariaia te Atua mwakuri aika a buakaka n aki rinanon te tua mairouia aia kairiribai. E bon aki “kaungai nanoia” taan kamwarua bwa a na kaikoakiia Aika Itiaki; E kariaia bwa a na kabonganai inaomataia ao e aki tukiia ke ni katokiia.
Ma e bon teimatoa te Uea n ana berita bwa ngkana a ongotaeka Aika Itiaki, “a na bon aki toki n tokanikai” (Reirei ao Berita aika Tabu 103:7).
Bukin tera e aranaki te Nakoanibonga imwin Merekitereka?
Ko bon bae ni miimi bukin tera ngkai te kabanea n rietaata n nakoanibonga e aranaki imwiin Merekitereka. E kamataata te Uea rinanon te Burabeti ae Iotebwa Timiti:
“I mwaain ana bong [Merekitereka] e aranaki bwa te Nakoanibonga ae Tabu, n aron ana Karinan Natin te Atua. Ma ibukin te karinerine nakon aran Teuare Moan te Mwaaka, n totokoa kaokiokan arana, te Ekaretia, ni bong ake ngkoa, e ingoana te nakoanibonga anne n aran Merekitereka” (Reirei ao Berita aika Tabu 107:3–4).
Iangoia mwaitira te tai ae ti atonga “Te Nakoanibonga ae te Merekitereka” inanon bootakin te Ekaretia ao marooro aika a baireaki. Ngkai iangoia ngkana, n oneanwiin te “Merekitereka” ti atonga ae kangai “natin te Atua” ni katoa tai. E na moanna n taraa n aki karinerine. E tangiria te Uea bwa e na totokoaki anne.