Te Katanoata ibukin te Utu ao Ngkoe
Te katanoata ibukin te utu e nang koro 30 ririkina n te namwakaina aei. Taraia bwa e kanga ni kakabwaia am utu n te bong aei.
Kamatataan te tamnei iroun Irtaxe López de Munáin
Bon 30 raoi te ririki n nako, n Tebetembwa 1995, te Moan Beretitentii ao te Kooram n Abotoro n te Tengaun ma Uoman a korea “Te Utu: Te Katanoata nakon te Aonaaba,” n taekinna bwa “te utu bon te bwai ae kakawaki nakon ana babaire te Tia Karikibwai ibukin aroia Natina.”
Beretitenti Dallin H. Oaks, te Moan Kauntira n te Moan Beretitentii, bon te abotoro n te tai anne. E taku, “I kakoaua bwa te katanoata iaon te utu bon te kabwarabwara ae itiaki ibukin te koaua ae akea tokina. … Reiakinna, maiuakinna, ao ko na kakabwaiaki.”
E a tia te katanoata ibukin te utu ni kakawaiaia utu ni kabuta te aonaaba inanon 30 te ririki—ao e na reitinako ni karaoia.
Te ibuobuoki ibukiia Utu aika a Korakora, ma ni Kukurei
N te katanoata ibukin te utu, burabeti ao abotoro a reirei bwa “kukurein maiun te utu e na bobonga man te korakora man karekean ana reirei te Uea Iesu Kristo.”
A kaairaki inanona “te onimaki, te tataro, te rairannano, kabwarabure, karinerine, te tangira, te nanoanga, te beku, ao kakibotu aika itiaki.”
Kabonganaan anga reirei aikai a kona ni kakabwaiaia am utu ni kawai aika a kamiimi. Te katooto, ko kona:
-
Kaunga te tataro n utu. Te tataro n akea te nanououa e buokiia utu bwa a aonga n rangi ni korakora. Ngkana te tataro tiaki te anua inanon am utu, kaungaia bwa a na kataia. Te uaia n tataro e kona n uota te rau, te tangira, ao te mweengaraoi.
-
Kaota te tangira rinanon te taeka ao te mwakuri. Kamwaita am tai n tuangiia am utu ae ko tangiriia—e ngae ngkana ko bon kakoaua bwa a ataia. Kabonganai taeka n akoi ao a kaunganano. Aio are e na kaoa te Tamnei nakon mweengam.
Am mwakuri n ibuobuoki nakoia am utu bon te kawai ae korakora ni kaota am tangira. Iangoia karaoi bwaai aika a tangiraki aika a raba ibukiia tarim ma mwaanem ke te ibuobuoki ni mwakurin te auti n aki tutuangaki.
-
Kabanea ami tai n ikotaki ao kaungai ngkami. Te katanoata ibukin te utu e taekin taian “kakibotu aika itiaki” bwa te kawai ni buokiia utu ni kakorakoraaki ao ni kukurei. Ko kona n nako ni bwabwatika n te tabo ni kaunkiang, tauraoi ao kaonoono ni kanam, nako rianna, ira buakon te takakaro ke baane takakaro ni bwaai n takakaro ake a koreaki iaon baba n takakaro. Ao e reitinako riki, ma ni kabanea am tai ma am utu e na kauringko bwa te utu bon te bwai ae moamoa kakawakina.
-
Uaia n ibuobuoki. A kona n rangi ni kaan riki am utu ngkana kam uaia n ibuobuoki. E kona ni bebete n aron katauraoan te amwarake ae ko tatangiria ibukin temanna are e rootaki n te kainnano ke ni kaitiaka te tinoo ni kawain aia kaa kaain rarikim.
E kona te Tia Kamaiu ni katoka te aki booraoi n iango man te aki oota ao kakaewenako inanon te utu rinanon te rairannano, kabwarabure, ao te onimaki. Ngkai ti iriia ao n onimakina Iesu Kristo, te tangirao te karinerine are ti namakinna inanon ara utu e tabe n rikirake.
Iai riki aanga tabeua ni karika am utu bwa e na korakora ao ni kukurei bwa a aonga n rangi ni kaan riki ni kabane.
Tera bwaai aika kam kona ni karaoi?
Koaua ibukin Ngkai ao n Taainako
Akea te Utu ae Kororaoi. Tabeman a kaitara ma kangaanga aika a matoatoa. Ko kona n taraa te aro are a mena inanona am utu ao ni miimi bwa e kanga te katanoata ibukin te utu ni kona ni kakabwaia am uu. Ma e bon kanoaaki ni koaua aika akea tokina are a na kakabwaiaki iai am utu—n aki tabe bwa tera ae riki.