Iesu Kristo Bon ibukin Boong aika a Raraoi Naba
Ngkana a nakoraoi bwaai, ti na kanga ni kateimatoa ara iango i aon te Tia Kamaiu? Aikai tabeua iango.
Katamneia n am iango bwa aongkoa iai raoraom ae a tii kabanea aia tai ma ngkoe ngkana iai aia kangaanga ao aki kan kubariko ngkana a kukurei. Te reitaki ae kakukurei? Tiaki ngaia raoi.
Ti kona ni karaoa anne nakon ara Tia Kamaiu—ukoukoria inanon taai aika a kangaanga ao ni mwaninga taekana n taai aika a nakoraoi?
Ti kakarabakauakina ae mwaiti bwa e kanga Iesu Kristo ni buokiira n taai ake ti rinanon iai taian kangaanga, tao ibukina ngkai aomata ni kabane, n te tai teuana ma teuana, a kaitara ma bwaai aika a kangaanga.
Ma iai boong tabeua—wiiki ke ririki naba, ngkana ti namakina te rake—ike a bon taraa n nakoraoi bwaai. N tabetai ti mwaninga taekan te Tia Kamaiu inanon taai akanne. A karaoia naba aomata inanon karaki n ana Boki Moomon. A maiuraoi man ana kakabwaia te Atua inanon te tai ma ni koauana n tokin te tai ao a konaaki n te kainikatonga ngke a mwaninga taekana.
Taai aika a raraoi tiaki nanona bwa n te tai ae waekoa ao ti aki manga kainnanoa Iesu Kristo. Taai ni kakabwaia bon taai aika a kororaoi ni kimwareirei ma te Tia Kamaiu, ao n aki mwaninga taekana.
Ngaia are ti na kanga n teimatoa n reitaki ma Iesu Kristo ao Tamara are i Karawa ngkana akea kauringaakira inanon taai ni kataaki bwa ti aonga ni manga oki Nakoia?
Teimatoa n Nanorinano
Ngkana a nakoraoi bwaai, e raoiroi ngkana ko katekeraoa am kakabwaia ao am tokanikai. Ma tai mwaninga bwa antai ae kona ni karaoa aei ibukim n te tabo are ko mena iai. E katerea n te anga aio te Uea ae Beniamina n ana kabwarabwara inanon ana Boki Moomon:
“Bwa taraia, tiaki ngaira taian rarikin ni kabane? Tiaki bane ni katan iroun ae ti Temanna, ae te Atua, ibukin ara bwai ni kabane, ibukin te amwarake ma te kunnikai, ao ibukin te koora, ao ibukin te tirewa, ao ibukin taian kaubwai n aekaia nako ake iroura?” (Motiaea 4:19).
Rikim n nanorinano ibukin nakoraoin arom bon man ururingan te bwai are a tia ni karaoia Tamara are i Karawa ao Iesu Kristo ibukim bon te kawai ae moan te tamaroa bwa ko na kaairia inanon am tai aika a nakoraoi.
Teimatoa ni Kakaitau
Te kakaitau bon teuana te anga ae tamaroa ibukin totokoan te kainikatonga ao te mwamwaninga nako. Te kakaitau nakon te Atua e na buokiko n ururingnga ao bwaai ni kabane aika a raraoi ake E karaoi ma Natina inanon maium. E bon riki naba aei inanon taai aika a raraoi n aron naba taai aika a nakobuaka.
Teimatoa ni Kauringko
Teuana mai buakon ana kamwane Tatan bwa “e na kamaraui nanoia tabemwaang, ao e na karaurau ni kewei[ko] bwa aongkoa ko mano ni maiuakinan te aonaba” (2 Nibwaai 28:21). N taekana teuana, e tangiria ngkana ko namakina te rauaki ao te mano inanon taai aika a raraoi are ko a mwaninga bwa tera te bwai ae kakawaki riki. Ngaia are tai mwaninga taekan te Atua! Ngkana ko teimatoa ni kauringko ibukin ana mwakuri ni kamwamwane teuare e buakaka ao n totokoi e ngae inanon am bong aika a nakoraoi, ko na teimatoa ni kaan riki ma Tamara are i Karawa ao Iesu Kristo.
Te Tia Kawakin Tiibu ae Raoiroi, iroun Michael Malm
Teimatoa Kabotoa Maium iaon Kristo
E reirei Beretitenti Russell M. Nelson: “Ngkana e kaineti maiura iaon ana babaire ni kamaiu te Atua … ao Iesu Kristo ao Ana Euangkerio, ti kona n namakina te kimwareirei n aki tabe ma te bwai ae riki—ke akea ae riki—inanon maiura. Te kimwareirei e roko mai Irouna ao te kimwareirei bon Ibukina. Bon Ngaia ae e nako mai irouna te kimwareirei ni kabane.”
Mwaitira am tai n iangoa te koaua aei n taekan te kimwareirei ngkana e nakoraoi aron te maiu? Tiaki tii te taeka n reirei ae anga te karaunano ngkana a taraa ni matoatoa bwaai. E bon koaua n taainako, n ikotaki naba ma am bong aika a raraoi. Ngaia are karaoa am kabanea ni kona ni kabotoa maium iaon Kriisto, n tain te nakobuaka ke te nakoraoi.