Kanikina ibukin te Kauaoki Akea Bukina bwa Ko na Maaku
Tabeua bwaai aika a kangaanga a kaman taekinaki imwaain manga okin te Tia Kamaiu. Ma iai bukina ae raoiroi iroum bwa ko na aki maaku.
E a Manga Roko ni Kairiiri ao n Tautaeka, iroun Mary RL Sauer
E na manga roko riki, ara Tia Kamaiu, Iesu Kristo. E reirei te koaua aei n te aro ae bebete (taraa Mataio 24). A mwaiti aomata ae a kan ataia bwa e na riki aei ningai, ma e taku Iesu, “akea te aomata ae na ataa te bong ma te tai, akea tiaki aneran karawa, ma ti Tamau” (Mataio 24:36).
E ngae n anne, e a tia te Uea ni kaoti tabeua kanikina ake a na riki imwaain Kauokina. Angiina mai buakon aikai a kakukurei ao a kamiimi, n aron Kaokan te euangkerio, rokon ana Boki Moomon, ao ikotakin Iteraera.
Ma ngkanne iai … kanikina riki tabeua. Te katooto:
-
Buaka, rongorongon buaka, ao te mangaongao ae moan te korakora.
-
Kanikina i karawa (n ikotaki ma taai, namwakaina, ao itoi) ao iaon te aba (n ikotaki ma te ai, te ang ae korakora, angibuaki, ao bubu n ai).
Akanne ni kabane a kona n taraa ni kakamaaku. Ni koauana, e taku te Tia Kamaiu bwa n te kabanea ni bong, angiina aomata a na uruaki nanoia ibukina bwa a maaku.
Ngkai, tao ko taraa te kangaanga ni kabuta te aonaaba, n aron naba kakatai aika a onoti ake ko kaitara mangaai, ao ko namakina te korakai ao te raraoma. Tao ko bae ni miimi bwa tera ae ko riai n ngainga nako iai ngkana a moanna ni kakamaaku bwaai ao n rangi ni kangaanga riki ni karokoa rokon te Kauoaki.
Ma aei tiaki aron karekeara iroun Iesu Kristo —temanna mai buakoia Ana reirei—e kaantaninga okina.
Ana Rongorongo te Uea nakoina Ana Reirei
E ngae n ae iai kamangaongao ao kakiriwe ni boong aika kaitira, e taku te Tia Kamaiu nakoina Ana reirei, “Tai tabeaianga.” Bukin tera? Ibukina, “ngkana a koro bukin bwaai ni kabane aikai, kam na ataia bwa berita ake a tia ni karaoaki ma ngkami a na bon koro bukiia” (Reirei ao Berita aika Tabu 45:35).
E tuangiira Iesu Kristo bwa ti na “aki maaku” (Reirei ao Berita aika Tabu 50:41) ao “ni kabebetei nanora” (Reirei ao Berita aika Tabu 61:36). Ngaia are, n onean mwiin are ti na kabanei ara iango iaon kabuanibwai aika a na roko, e tamaroa riki ae ti ibita ara taratara.
Aikai teniua kawai aika a kakawaki ae ko kona n “aki maaku,” n ingainga nakon mimitongin te Kauoaki, ni kangai, ma Ioane te Tia Kaotioti, “Mai ikai, te Uea are Iesu” (Te Kaotioti 22:20).
1. Taraa te Burabeti
E kauring te Tia Kamaiu bwa a na iai Kristo ni kewe ao burabeti ni kewe aika a na kaoti imwaain okina are a na burebureia aomata aika a mwaiti Ni katobibira ni kabane, a na iai bwanaa aika a beroro, kamangao, ao ni buakaka ake a na kataia ni kairiira bwa ti na bwaka. Ni boong aika kaitira, Tatan e na, “un inanoia natiia aomata, ao e na kakorakorai marakin nanoia ni kaitarai bwaai aika a raoiroi. ” (2 Nibwaai 28:20). E ngae ngke naake a rineaki a na totonako naba man te koaua.
Ma te Uea e anganiira buokara ae moan te korakora. E weteia burabeti bwa a na kakabwaiaira ao ni kairiira. Te Moan Beretitenti ao te Kooram n Abotoro n te Tengaun ma Uoman a na bon aki kona ni kairiira bwa ti na bwaka. E taku te Tia Kamaiu, “E ngae n ae bon man oin bwanaau ke bwanaia au tia mwakuri, bon titebo” (Reirei ao Berita aika Tabu 1:38). Ko kona ni butiia Tamara are i Karawa ibukin te Tamnei ae Raoiroi ni kamatoai koaua ake a reiakin, n aron ana reirei Beretitenti Russell M. Nelson: “A na bati baika a raraoi ni kaoti, … ibukina bwa e na manga oki kaua ara Tia Kamaiu!” Ao: “E katauraoia bwa e na manga oki. Ti a katauraoira naba nakon butimwaeana.”
Ao ngkai ko iriiri aia reirei “ma te taotaonakin nano ao te onimaki ni kabanea” (Reirei ao Berita aika Tabu 21:5), ko kona n nooria bwa a kanga ni kakabwaia maium.
E taku Unimwaane Allen D. Haynie man te Itingaun: “Ngke I uarereke, [taian] taetae ni burabeti akanne ibukin boong aika kaitira a kakamaakai ao e karika ae N na tataro bwa e na aki roko te Kauaoki inanon au tai ni maiu. … Ma ngkai I tataro ibukin kaitaraana. …
“… Ti riai n aki maaku. Te tua ao reirei ake ti riai ni iriiri bwa ti aonga ni kamaiuaki n tamneira ao n teimatoa n te maiu n rabwata a kuneaki n ana taeka te burabeti ae maiu.”
Ngkai ko iriiri aia kairi burabeti ao abotoro, e na oneaki maakum nakon te onimaki, te kaantaninga, ao te kimwarerei.
2. Teei n Taabo aika a Tabu
E taku te Tia Kamaiu bwa ribuakon kabuanibwai ni boong aika kaitira, “au taan reirei a na tei n taabo aika tabu, ao n aki kona ni kamwaingaki” (Reirei ao Berita aika Tabu 45:32). Taabo aika a tabu aika n ikotaki ma mweengara, autinibootaki, ao taian tembora.
Ni kaineti ma taian tembora, e reirei Beretitenti Nelson bwa “kamanoara ae moan te mano bon reitinakoan te kororaoi n tau n rin n Ana auti ae tabu.” Ao “kamwaitan ara tai n te tembora e na buokiira ni katauraoira ibukin te Kauaoki”
Eventide, iroun Yongsung Kim
3. Katauraoa te Aonaaba
Teuana taben ana Ekaretia Iesu Kristo ni boong aika kaitira bwa e na buoka ni katauraoa te aonaaba ibukin Okina. Ao ko kona n ibuobuoki n ira waakin Ana mwakuri.
Ko kona n tibwaua te euangkerio ma tabeman ao n ibuobuoki n uota ootan te Atua ao ana koaua nakoia naake “a tii kararoaaki man te koaua ibukina bwa a aki ataia bwa a na kunea iaa” (Reirei ao Berita aika Tabu 123:12).
Ko kona naba ni karaoi mwakuri ni bwabetito inanon te tembora ibukiia naake a mena n iteran te rabuna ake a maiu ao a “mate n akea aia atatai n [te] euangkerio aei, ake a na bon butimwaia” (Reirei ao Berita aika Tabu 137:7).
Ma mwaitin te buakaka n te aonaaba, ko kona n riki bwa te oota nakoia tabeman ao n uota te kamaiu nakon te aonaaba. Ko kona n ibuobuoki ni katauraoiia aomata nakon rokon te Tia Kamaiu are naake a tauraoi ni butimwaia.
Anne bon te mwiokoaki ae bubura ao te bwai ae kamiimi ae kaingainga nano uaiakinana.