Kakabwaia ibukin te Kariaia n te Nakoanibonga ao te Mwaaka

Iesu Kristo bon atuun te Ekaretia. Te Ekaretia bon te bwai ni mwakuri Are e kateia bwa e aonga ni kakoroaki bukin te mwakuri ae kakawaki ibukin kamaiuaia te botanaomata. Rinanon te Ekaretia, E kona:

• Tataekina Ana euangkerio ni kabuta te aonaaba.

• Karaoa te bwabetito ao tabeua riki berita aika tabu—riki kawain te berita nakon Abanueana.

• Katiteuanakiia utu ibukin te maiu ae akea tokina.

• Anga bwaintangira ibukin te kamaiuaki, riki nakoia ake a tia ni mate n akean bwaai aikai.

• Karaoa te ibuobuoki nakoia natin te Atua ake iai kainnanoia n te maiu n rabwata n te tai aei.

Iesu Ngke E Reireina Maria, iroun Dan Burr

Ni kakoroi bukin kaantaninga aika a kakawaki aikai, ao ni katauraoi ibukin okin te Tia Kamaiu, te Ekaretia e kainnanoa ana kaetieti te Atua ae reitinako, te kariaia, ao te mwaaka. Te Ekaretia bon “tii te ekaretia ae koaua ae maiu” (Reirei ao Berita aika Tabu 1:30) ibukina bwa e katauraoia Kristo ma Ana kairiiri ao te mwaaka rinanon Ana nakoanibonga.

N akean te nakoanibonga ae tabu, e na kona n riki te Ekaretia bwa te bootaki ibukin bwain aonaaba n aron ake tabeua, karaoan te tamaroa n te aonaaba ma akea te korakora ni uaiakina oin te kaantaninga ibukin katauraoaia natin te Atua ibukin kakimwarerein te maiu ae akea tokina Imatana. Ma te nakoanibonga aei, ao kiing ni kaira mwakurin te nakoanibonga, iai te kariaia ao aron waakina n te Ekaretia.

“N te Ekaretia, ni kabane ake a kariaiakaki n te nakoanibonga a kamwakuraki iaan aia kairiiri naake iai irouia kiingin te nakoanibonga.

“Mwaane aika tau ake kaain te Ekaretia a karekea te kariaiakaki n te nakoanibonga rinanon anganakiia te nakoanibonga ao te katabu nakon aobitin te nakoanibonga. Ni kabane kaain te Ekaretia a kona ni kammwakura te kariaiakaki ngkai a kaokoroaki ke ni katabeaki ni buoka kakoroan nanon ana mwakuri te Atua.”

Ngkai e a tia n rairaki ana Boki Moomon n1829, te Uea e waakina barongaan Ana nakoanibonga n aron teina ao nnena. Ni kaekaan ana tataro Iotebwa Timiti ao Oliver Cowdery ni kaineti ma te bwabetito, e kaoti Ioane te Tia Bwabetito ao n anganiia te Nakoanibonga ae te Aaron, are “ taui kiingin aia mwakuri n ibuobuoki anera, ao te euangkerio n rairannano, ao te bwabetito ni kateboaki i an te ran ibukin kamaunaan bure” (Reirei ao Berita aika Tabu 13:1). N te kariaia anne, Iotebvwa ao Oliver a bwabetitoia ibon imarenaia ao tabeman ngkai e a kateaki te Ekaretia.

N te tai ae aki maan imwiina, Abotoro ake ngkoa Betero, Iakobo, ao Ioane a kaoti ao n anga te Nakoanibonga ae te Merekitereka are e rietaata riki, n ikotaki ma “kiingin abanueau tibwauakin te euangkerio ibukin … kororaoin bongina!” (taraa Reirei ao Berita aika Tabu 27:12–13; 128:20).

E a manga roko te kariaia riki teuana ibukin te nakoanibonga ngke a kaoti teniman burabeti ake ngkoa aika, Mote, Eriati, ao Eria, nakon Iotebwa ao Oliver n te Kirtland Tembora ao n anganiia te mwiokoaki ibukin kiingin ikotakiia Iteraera ao ana mwakuri te Uea ibukin te tembora (taraa Reirei ao berita aika Tabu 110:11–16).

N te taeka, oin te kaantaninga ibukin te kariaia n te nakoanibonga ao te mwaaka are e kaokia Iesu Kristo bwa e na kakabwaiaia aomata. E angananiia kaain te Ekaretia te konaa ni kabongana mwaakan te Atua ni beku ao kakabwaiaia tabeman inanon te Ekaretia, n te mweenga, ao ni kabuta te aonaaba. Kaain te aro a ikarekebai ma te Tia Kamaiu ni kakoroa bukin Ana mwakuri ibukin te kamauiaki ao te karietataaki, ni kabonganai bwaintituaraoi mai karawa ao te mwaaka n aron are e riaon aia konaa ni buoka uean te Atua bwa e na rikirkae ao ni kaonrakea aonaaba (taraa Reirei ao Berita aika Tabu 65:2, 5–6).

E kabwarabwara te Uea bwa “te nakoanibonga ae [merekitereka] korakora aei e kamwakura te euangkerio ao n taua kiingin bwain te abanuea aika raba, are kiingin te atatai ibukin te Atua.

“Ngaia are, e kaotaki mwaakan te aro n Atua n taian otenanti mai iai” (Reirei ao Berita aika Tabu 84:19–20).

Otenanti bon bukamaru aika a karaoaki n te nakoanibonga are ti karaoi berita aika tabu ma te Atua, ni moanaki man te bwabetito ao n reitinako rinanon berita aika tabu ake a reke n ana auti te Uea. Bon man kawakinan berita aika tabu aikai are ti a bitaki man te “aro n” mwaane ao n aine nakoia aika itiaki (taraa Motiaea 3:19) man ana akoi ni kamaiu Kristo ao ti a riki n raoiroi ao ni katabuaki —n aki bure ao n aki baareka—imatan te Atua (taraa Reirei ao Berita aika Tabu 20:29–31; 3 Nibwaai 27:16–20).

Kirsto i Amerika, iroun Jeffrey Hein

“Kaokan Bwaninin ana Euangkerio Iesu Kristo: Te Ka Uabubua n Ririki ni Katanoata nakon te Aonaaba,” man te Moan Beretitentii ao te Kooram n Abotoro n te Tengaun ma Uoman:

“Ti katanoata bwa Ana Ekaretia Iesu Kristo ibukiia Aika Itiaki ni Boong aika Kaitira, are e barongaaki n Eberi 6, 1830, bon Kakoauan ana Ekaretia Kristo ae Boou ae kaokaki. E boboto te Ekaretia aei iaon maiun atibun te maninganinga ae kororaoi, Iesu Kristo, ao Ana Mwakuri ni Kamaiu ae akea tokina ma Mangautina. E a tia Iesu Kristo ni manga weteia Abotoro ao e a tia n anganiia te kariaia n te nakoanibonga. E kaoira ni kabane bwa ti na Nakoina ao n nakon Ana Ekaretia, ni karekea te Tamnei ae Raoiroi, otenanti ni kamaiu, ao ni karekea te kimwareirei ae teimatoa.”