Tera Ngkana Arona Bwa E Kangaanga Kakaeakiia Raoraou?

Te ririki ngke I a mwaing nakon te reirei ae boou, I bon korakai n tang ibukina ngkai I aki tangiria bwa a na bua raoraou ake mai imwaaina. I taetae ni bon nakoiu bwa ngkana I aki tangira au reirei ae boou ao n namakina ae titebo ma I a kaitaraia iai raoraou ake mai imwaaina.

Ni wiiki aika a bwanin, I bon teimatoa ni kabuakakai matau. Akea temanna ae I taetae nakoina. Iai tabeman ataeinnaine ake a kataia n taetae nakoiu, ma I bon aki kan karenaai ao n iraorao mangiia.

N te bong teuana, I ataia bwa I aki tangiria ni kan tiku n tii ngai. I nooria bwa I riai riki n rena ma ni boibuako. Inanon matakuakinan tabeua rongorongon Iesu Kristo iaon te terewition, e kaungaaki nanou n iangoia bwa E kanga ni karekeia raoraona. E ngae ngke E aki kakukurei nanoia tabeman, ma bon angiina aomata, E bitii maiuia.

Ibukin ana banna ni kakairi Kristo, I baireia bwa N na kataia ni karekeia raoroau aika a boou, e ngae ngke I maaku. I maaku ibukina bwa I boni maamaa ao n raraoma tokina ao a na bwainingareai aomata. Ma iai au iango, “Iai Tamam are i Karawa ae e na buokiko. E ngae ngkana ko aki butimwaeaki irouia aomata, E bon mena ikanne.”

Ngkana I tanrikaaki ngkai, I kona n nooria bwa temanna te Rao ae e aki kona ni kitanai inanon te tai anne bon te Tia Kamaiu. Ibukin bwaai aika a kangaanga ake I a tia n rinanona, I a kaan riki Mangaia. E korakora ana tangira ibukira n te aro ae E anga maiuna ibukira. Ao E anganiira booki aika tabu bwa ti aonga n ataia bwa ti na kanga n riki n ai Arona. Ko kona n onimakina Iesu Kristo bwa e na riki bwa raoraom.