E Aki Ataia Ae I Kainnanoia

Tamnei iroun Melanie Miza

I tabe ni keiakin tabeua kangaanga aika inanon maiu. N te bong teuana I namakina te aki konamaki, ao I aki tangiria bwa N na ira te tieminari. Ma I taku n au iango, “Ai bon au kabanea n ririki, ao I riai ni kabongana raoi ni karekei kakabwaia mai iai.”

Ngaia are I a nako, ao ti maroroakinna bwa e kanga Iesu Kristo ni kinaira man arara. Ti wareka Reirei ao Berita aika Tabu 18:10: “Uringnga bwa e korakora kakawakia aomata imatan te Atua.” Iai te namakin are I karekea ngkai I kanikinaea te kibu. Ngke I karekea te namakin anne, e waanai te tang ae bati, ngaia are I aki kan manga warekia riki n tain te kiraati.

Imwiina ao e titiraki te tia reirei, “Tera ae rangi n anaaki nanom iai, ao bukin tera?” I aki tangiia ni kan taetae, ma raoraou arei e a taetae iaon te kibu arei. E kaota ana koaua bwa te Atua e aki kona ni katikuira n tii ngaira, bwa n tabetai ti kona ni mwaninga, ma E ataira ao E boni memena ikekei ibukira.

Ngke I ongo arei, taraan ae kanga e taetae Tamara are i Karawa nakoiu rinanon raoraou. Titebo ma kanga E kangai, “Tai tannako mairou—I mena ikai.”

Teutana te tai imwiina I a nako ni kamwaua ubu, ao e a roko ni kawarai raoraou. E taku, “N na bon aki tibwatibwa, ma I namakinna bwa I bon riai ni karaoia ibukina e na kona ni buoka temanna. I aki ataia ae te aomata anne boni ngkoe.” Anne e kamatoa riki nakoiu bwa Tamara are i Karawa e bon mwannanoai.

Imwiin te tieminari, I okira mweengau ao n tataro. Ni bon arona, I anga au kakaitau ao ni bubuti bwaai aika I kainnanoi. Ma te tataro anne—I taku bwa bon te kabanea ni kakawaki n tataro ni kakaitau are I a tia n anga. I namakina te Tamnei inanon au ruu, ao I namakinna bwa e mena irarikiu Tamara are i Karawa.