Tibwauaan te Kimwareirei i Kenya
Ngke e kunea te euangkerio Robert, e tibwauaia nakoia aomata ake e kinaiia. Tiaki, ni koauana—aomata ni kabane.
Tamnei iroun Leslie Nilsson ao Eric D. Snider
N te tai are e bwabetitoaki iai n Aokati 2024, Robert L., 18, ae kaain Kenya, e kairiia riki raoraona aika 50 tabun mwaitiia nakon te taromauri—ao e bwabetitoia 25 mai ibuakoia!
Akanne bootaia ni kabane ngke ti marooro mangaia tabeua namwakaina n nako, ma e aoria. E tabe n rikirake mwaitiia aomata man te tai anne.
Robert, boni kaain te Mwaanga ae Bukuru n te Mwakoro ae Kisumu Kenya, e kabwarabwaraaki n te moan tai nakoina Ana Ekaretia Iesu Kristo ibukiia Aika Itiaki ni Boong Aika Kaitira ni moan 2024, ngke e kaitibo ma te mwaane ae kaain Amerka ngke e mwakuri ibukiia te botanaomata i Kenya.
“I bon aki kaantaningaia ae nang moanna n nakoraoi maiu,” e taku Robert. “Akea aia mwane au karo; a aki kona ni kamwanangaai n nako n reirei.” (Iaon Kenya, e rangi ni bobuaka naba taabo n reirei ibukiia te botanaomata.)
“Ma I ataia bwa e na bon buokai Tamau are i Karawa. I a moana au tataro ao ni wareka te Nu Tetemanti. Ngkanne I a kaitibo ma au tibwaontia.”
Ana “tibwaontia” boni kaain Ana Ekaretia Iesu Kristo ibukiia Aika Itiaki ni Boong aika Kaitira are e kakabwaia maiun Robert ni kawai aika uoua: e buokia ni karekea ana reirei ao, ae kakawaki riki, e tibwaua te euangkerio nakoina (n aron are e karaoia nakon te ataeinimwaane are e a tibwa kaaina naba te Ekaretia). E bwabetitoaki Robert tao onoua te namwakaina imwiina.
E kaoiia tengaun ma uoman aomata Robert L. ae kaain Kenya nakon te taromauri—kaain rarikina, raona n reirei, ataei ake e tatakakaro mangaiia—aomata ni kabane.
Kakabwaiaaki Man te Mwakuri n Akoi
Ni bon arona, e tangiria Robert ni kan tibwaua ana kakabwaia ae boou ma tabeman. E aki kona ni kabwaka roon temanna n te reirei. Ma e kona n reireiniia taekan te euangkerio!
E a moanna ni kaoiia aomata nakon te taromauri—kaain rarikina, raona n reirei, ataei ake e tatakakaro mangaiia—ni kabane ake e kinaiia. “I roko n te Tabati ma, tao niman, ao te Tabati teuana I roko ma 10,” e taku. “Ngkanne I kamwanangaia mitinare nakoiia bwa aonga ni mataata raoi ao n ataia bwa e koaua te Ekaretia aei ao a na kona n namakina are I namakinna.”
N te tai ae aki maan imwaain ae tabeman raoraon Robert a riniea bwa a nang bwabetitoaki ao ni butiia ngkana e kona nii karaoa te otenanti ibukiia.
E waekoa n rikirake te Ekaretia i Aberika, n ae bon tau n anuan maiun teuae Robert ngkai e riki bwa ana reirei. E bwabetitoia 10 aomata inanon teuana te wiiki, 11 n te wiiki are imwiina, ao “tii” 4 n te wiiki are imwiina.
E kaoiia raoraona Robert nakon te Taromauri n ana mwaanga, are a bootaki iaan te ooning n te tabo ae kiriuteute aona.
Bon tengaun ma uoman tabun mai buakoia raoraona ake a tibwa tia ni bwabetitoaki ake a iria nakon te maungatabu Ibukin Kakorakoraia Kairake i Kenya n Ritembwa ae nako, n ikotaki ma temanna te rao are e a kaman tia ni bwabetitoa temanna mai buakoia raoraona.
Taraia bwa e kanga ni waaki te mwakuri? E bon waaki i bon irouna!
Namakinan te Tamnei
E taku Fredrick A., 17, bwa ngke e kaoia raoraona ae Robert nakon te taromauri, e namakina korakoran te Tamnei are e aki kona ni kakewea.
“Ngke I nako n taromauri, e mena iaou Tamnein te Atua,” e taku Fredrick. “Ngkai I anganaki ana Boki Moomon, I a moana wawarekana. Ngkana I aki oota, I aki toki n titirakina au beretitenti n te mwaanga ao n tataro.”
Robert (n te angamaing) ao Fredrick a teimatoa n riki bwa raao n te tai are e kairia Robert nakon te euangkerio.
Gift M., 18, bon raoraona temanna are e bwabetitoaki iroun Robert. “I kukurei n riki bwa kaain te Ekaretia ae koaua—bon tii te Ekaretia ae koaua n te aonaaba,” e taku Gift ma te momoangare.
E ingainga nanon Gift ni kan nako ni mitinare.
Angiina aomata ake e kaoiia Robert nakon te taromauri a rineia bwa a na bwabetitoaki, ao a kaoiia naba tabeman bwa a na roko.
E Mwaiti Riki te Mwakuri Ane Imwaaira
E baireia Roberta bwa e na nako ni karaoa ana mwakuri ni mitinare ae bwanin taina ngkana e bane ana reirei (n aron naba Gift ao Fredrick). Bukin tera e tangiria bwa e na karaoa anne ngkai e a kaman ataia bwa e na kanga n tibwaua te euangkerio?
“I riai n nako ni mitinare ni karekei riki tabeua taneiai ao n reiakina riki ae mwaiti,” e taku Robert. “E na bon kakorakora au onimaki ao ni bita anuau. Bon te bwai ae tangiria te Atua bwa N na karaoia.”
E tuai tia taben Robert n nako n tibwaua te euangkerio. E baireia bwa e na nako ni mitinare. ”Bon te bwai ae tangiria te Atua bwa N na karaoia,” e taku.