Te Raraoma, te Tamnei, ao Booki aika Tabu

Kamataatan te tamnei iroun Katelyn Budge

E mwaiti au tai ni mwamwaingiing inanon maiu. Tabeua te ririki n nako, ti mwaing mai Dubai ibukin te tai ae uarereke. Ngke I a kaotinakoi kanoan au tuutikeiti , te kabanea ni bwai ae e mena mai inano bon au boki aika tabu. I iangoia bwa I riai ni wareware iai. I bon karaoia, ma kanga bon te bwai ae aki taneiai n riiriki ibukina bwa I aki mwaatai n iriira ana kairi te tamnei. Ma I waaki raoi mai moana, ao I taku bwa I wareki nimaua ke onoua taian mwakoro.

Imwiina, I a tuangaki bwa N na taetae n tain te taromauri. I rangi ni kukurei ni maroroakina taekan kakawakin kamatebwaian booki aika tabu. I korea au marooro ao au iango, “Auee, I riai riki ni wareware ni booki aika tabu.” Taraan ae kanga e a riki bwa te kakaboo imarenau ma tamau. E a roko n Aramwa, ao n tangiria bwa N na karokoai n ana wareware are e roko iai. I a moanna ni wawareka au boki aika tabu ni katoa bong—n tabetai 10 ke 15 te mwakoro!

I a moanna noori taneiai riki aika a mwaiti n te maiu n tamnei. Ngkana e mwaiti ae ko wawarekia, e anganiko am tai ni karekea oin am kaotioti. I bon karekea raoi au tai ibukin te Uea.

I a moanna ni kawakina au tienoo ibukin te maiu n tamnei. Ni kanoana teuana, I korea, “I wareka 3 Nibwaai taekan ae e kanga Iesu Kristo n ruo nakoia aomata ao bwaai aika a kamiimi ake E a tia ni karaoi. I namakina riki kaaniu nakon Tamau are i Karawa ao Iesu Kristo n te bong aei.”

I bon rangi ni miimi bwa mwaitira taneiai ake I a tia ni karekei, ai moarara riki ngke I tabe ni ukoukori. I taku, “Auee, E taetae raoi te Atua nakoiu n te tai ae bati.”

E rangi ni buokai kamatebwaian booki aika tabu, ai moarara riki ngkana iai raraoman nanou ibukin te mwamwainging ae bati. Booki aika tabu bon ana taeka Kristo. E taetae nakoira mai iai. Rinanon Ana taeka, I a kona ni kaan riki Nakoina.