Iesu Kristo Bon Ngaia te Bwai ae Raoiroi ae E na Kaoti
Te kimwareirei are e anga Iesu Kristo e tauraoi nakoim n taainako.
Iangoa te tai are ngke ko taku n am iango bwa e nang toki te aonaaba. E bon aki, e koaua! Ko a tia n rinanon te bwai ae kangaanga are ko a taku bwa ko aki kona n rinanona?
ENG, tao ko aki iangoia ae e nang toki te aonaaba. Ma ko namakinna ae kanga am aonaaba e nang toki? Tao aei e kona n riki man bwaai nako n aron te aki bwaati n tain te ukeuke, mwaingin raoraom ae ko tatangiria, ke maten ae tangiraki iroum n akea kaantaningakina.
E aki kakawaki bwa aekakira arom ni kaitarai korakai akana mai imwaaina, bon taraiko n te tai aei, ko maiu ko a tebenako! Ae rangi n tamaroa riki, a kauringiira burabeti ao abotoro bwa e mwaiti ae ti na kona riki ni karaoia nakon tii te maiu ni keiakin baika a kakorakai n te tai aei ao n taai aika a na roko. Ti kona ni karekea te kimwareirei inanon keiakinan kakatai ma kangaanga.
“A na bati baika a raraoi ni kaoti ”
E riaon te korakai te Tia Kamaiu nakon ae ti kona n iangoia i Ketetemwane ao iaon te kaibangaki. Ni keiaki n rinanon te maraki, te aoraki ao buren te aonaaba ae bwanin (taraa Aramwa 7:11–13) e bon kangaanga, aron taekinana! Ma E bon tokanikai iaon bwaai ni kabanel.
E taku Unimwaane Patrick Kearon man te Kooram n Abotoro ake Tengaun ma Uoman, “Eng, ti iangoa te korakai ao te mwakuri ni babakanikawai are e katokaaki i aon ara Tia Kabooi Maiura ibukin ara bure, ao anne ae karika iangoana ae nano. Ma n tabetai ti bae ikekei—n te onaroka, n te kaibangaki, i nanon te ruanimate. Ti kabwaka ni waakirake nakon kimwareirein te ruanimate ae ukinako, te tokanikai i aon te mate, ana tokanikai Kristo!”
Ibukin Iesu Kristo, ti bon aki kona ni bae inanon oin korakaira. Ti kona ni waakirake ao riki n taraa kanoan taai aika a na roko ma te kimwareirei ao te onimaki.
Ngaia are, ngkai e kona n rangi n taraa ni kangaanga aron te maiu n aron ae ti ae taku n ara iango bwa ti kona ni keiakinna, uringa ana reirei Beretitenti Russell M. Nelson: “A na bati baika a raraoi ni kaoti!” Ai tamaroara man anainano te berita aei! E mwaiti ana atatai Beretitenti Nelson n te maraki ao te uruaki n nano are e nooria te aonaaba ni katoa bong. Ma e teimatoa ni kona n taekinna bwa “a na bati baika a raraoi aika a na kaoti!”
E na kanga ni bitaki am taratara ngkana ko bon ataia raoi bwa a na bati baika a raraoi aika a na kaoti? E na kanga ni bita te kawai ni kaitarai kangaanga n te maiu aei?
Kateimatoaan Ara Iango iaon Kristo ni Waakin Maiura
Teuana te tai ae onoti ibukin taai aika a na roko are e kaoira Beretitenti Nelson iai bwa ti na kimwareirei ao n ingainga ibukin Kauoakin Iesu Kristo.
Imwaain ae ko katerea raoi bwa “a bwara nanoia aomata” (Ruka 21:26) ao te urubwai ae e na bwakara aoia naake a buakaka taraan aei akea kaantaningaan “baika a raraoi ni kaoti,” ti na kamataata teuana te bwai: bon Kauaokin Iesu Kristo. E kona ni bua ara atatai ngkana ti kamwaingnga man te tamnei. Bon ngaia “te bwai ae raoiroi” ae e na kaoti—Boni ngaia oin bukin kimwareireira! N aron ae taku Beretitenti Nelson, “A na bati baika a raraoi ni kaoti … ibukina bwa E na manga oki kaua te Tia Kamaiu!”
Taraiia Nibwaite, n aron te katooto. E ngae ngke a mena iaon te tabo ae rangi kaokoro, ngke e mate te Tia Kamaiu,, a rinanon tabeua kangaanga n aekakin are e riki n tain te Kauaoki: te mate, te urubwai, kabuanibwai aika a karina. Taian kaawa ni kabane a bwaka itaari (taraa 3 Nibwaai 8).
Ma imwiin nako taian kamangaongao, naake a kakoaua te Tia Kamaiu a ataia bwa kabuanibwai aika a reke bon kanikinaean maten te Tia Kamaiu. Inanon raoi te tai are a kakarabakauakina taekan Iesu Kristo ao kainikina ake a tia n noori, e kaoti te Tia Kamaiu nakoia (taraa 3 Nibwaai 11:1–11).
Iangoia bwa mwaitira te kimwareirei are a namakinna Nibwaite! Imwiin te urubwai ae karika te uruaki n nano, e roko te Tia Kamaiu ni buokiia ao ni kamaiuiia. Imwiin te maaku ma te nakonnano, a kimwareirei Nibwaite ao a kamoamoa te Atua bwa a kona ni kaitibo ma aia Tia Kamaiu (taraa 3 Nibwaai 11:14–17).
E na aki kona ni kawariko te Tia Kamaiu n rabwatana n te maiu aei n aron are E karaoia nakoia Nibwaite. Ma ko kona n ataia rinanon warekan booki aika tabu, kanakin te toa, kawakinan berita aika tabu, ao a mwaiti riki. E kona ni buokiko n namakina te kimwareirei ngkai, n aki tabe ma arom are ko mena inanona.
Ngke Ti Tabe n Tataninga …
Tao inanon am tai ni maiu e na kona ni Manga Oki Kaua te Tia Kamaiu, ke tao e na aki. Bon tii te arona, iai te kimwareirei inanon Kristo ngkai n te tai aei.
E anga te koaua ae kaunganano Beretitenti Nelson are e na buokiira ngkai ti kakaantaninga okin te Tia Kamaiu: “Tariu ma mwaaneu, a bati bwaai aika a kamimi i mwaira. Ni boong aika imwaira, ti na noori bwaai aika korakora n riki man mwaakan te Tia Kamaiu are e tuai nonoria te aonaaba. Ma ngkai ni kakoroa te tai are E na oki “ma te mwaaka ao te mimitong ae korakora,” E na kabaroa ana akoi, kakabwaia, ao kakai nakoia ake a onimaki.”
N taekana teuana, ti kona ni kunea te rau ao te kimwareirei iroun Kristo n te tai aei, ni karokoa Okina, ao n akea tokina. Ti kona ni karekea te kantaninga iroun Iesu Kristo inanon kangaanga ni kabane ake ti rinanona. Boni ngaia te kimwareirei inanon te kangaanga ae onoti. Boni ngaia katokan maakura. Boni Ngaia am Tia Kamaiu. Ngkai ko kabanea am iango Iaona, e tauraoi te rau ao te kimwareirei nakoim ikai, ngkai, ao n taainako.