Mau tao’a i hunahia

Te aura’a e « ha’amāmū » i te hō’ē ta’ata ’o te fa’a’āhuehuera’a ïa iāna, te ha’amāerera’a, te fa’a’amu’amura’a, te fa’aha’amāra’a, te ha’amata’ura’a, ’aore rā te fa’a’inora’a.

Nō reira i te paraura’a te Fatu ia Iosepha Semita ē ’ia « fa’ateitei mai te hō’ē ta’ata i tōna reo nō te pāto’i ia ’ōrua, e ha’afifi ’oia i te taime i ha’apa’ohia e au ra » (Te Ha’api’ira’a Tumu ’e te mau Fafaura’a 71:10 ; reta tei fa’ahuru-’ē-hia), ’ua fafau ’oia ē te feiā e pāto’i i te ’evanelia e fa’aruru rātou i te hō’ē mahana, te mau hope’ara’a ’ino o tā rātou mau mā’itira’a.

« I te taime i ha’apa’ohia e au ra » te aura’a ’oia ho’i e tārena tā te Fatu iho. E ti’a ia tātou ’ia fa’ari’i ē, e rave rahi ta’ata e’ita e riro ’oi’oi ’ei tia’au nō tā rātou ’ohipa i rave—’e ’ātīrā ïa. E ti’a ia tātou e ti’aturi i te Fatu ’e i tāna tārena.

’Oia mau, e ti’a ia tātou ’ia ’aro nō te parau mau. ’Ia nā reira rā tātou, e ti’a ia tātou ’ia fa’atura i te mau ha’apa’ora’a fa’aro’o o vetahi ’ē ’e i tō rātou ti’ara’a ’ia mā’iti ’eiaha e fa’ari’i i te ’evanelia.

’Eiaha e ha’ape’ape’a nō te mau ta’ata ’o tē tītau nei ’ei ’ohipa nā rātou ’ia fa’ahapa ’e ’ia ha’amou i te ’Ēkālesia, ’o tē ineine nō te ha’avare ’e nō te tāviri i tō tātou mau ti’aturira’a. ’A vaiiho i te Fatu ’ia rave i te reira. E ha’amāmū ’oia ia rātou ’e e hōro’a ia rātou i te rāve’a nō te ha’api’i mai ’e nō te taui—i te pae hope’a.

E riro paha te reira ’ei parau iti ha’iha’i, tē vai nei rā hō’ē ’ohipa fa’ahiahia mau tei heheuhia i roto Te Ha’api’ira’a Tumu ’e te mau Fafaura’a 77 : E vairua ato’a tō te mau ’ānimara !

Teie te hō’ē ’ohipa tā te rahira’a ta’ata i ti’aturi noa na—e au ra e parau mau te reira—noa atu ’aita te Bibilia ’e te Buka a Moromona i fa’ata’a maita’i i te reira. I teienei ’ua parau te Fatu i te reira ma te mau parau pāpū.

Mai te mau ta’ata, ’ua poiete-mātāmua-hia te mau « ’ānimara » ’e « te mau mea ne’e ra » ’e « te mau manu o te reva » i te pae vārua. Tō rātou tino vairua, mai tō tātou, ’ua ti’a maita’i i tō rātou tino tāhuti. ’E rātou, mai ia tātou nei, e fāna’o rātou i te « ’oa’oa mure ’ore »—te poupou ’e te ’oa’oa i roto i tō rātou tino e ti’afa’ahou mai. (Hi’o Te Ha’api’ira’a Tumu ’e te mau Fafaura’a 77:2–3.)

’Ua ’ite tātou ’ua poiete te Metua i te ao ra i te mau ’ānimara, ’ua hōro’a mai ia tātou i te ti’a’aura’a i ni’a i te reira, ’e tē hina’aro nei ’ia hāmani maita’i tātou ia rātou. Mai ia tātou nei, e mau poietera’a mure ’ore rātou ’o tā te Metua i te ao ra e aupuru nei.

’Aita te mana’o ē tē vai ra te hō’ē hōpoi’a rahi i roto i te mana rahi e tae mai nā roto i te mau ’aito rahi. ’Ua fa’a’ite te Fa’aora i te hō’ē ā nīno’a mana’o ’a parau ai ’oia i te peropheta Iosepha Semita : « ’O ’oia ’o tei hōro’ahia atu te mea rahi ra, e mea rahi ato’a ïa te tītauhia atu iāna ra » (Te Ha’api’ira’a Tumu ’e te mau Fafaura’a 82:3).

Nō ’ō mai tō tātou mau tārēni, mau ō ’e mau ha’amaita’ira’a i te Fatu ra. E ’ere te reira i te mana’o maita’i ’ia feruri i te reira ’ei mea noa’a noa. Mai te mea ’ua ha’amaita’i mai te Fatu ia ’oe ma te ferurira’a māramarama ’e te po’ihā nō te ’ite, terā rā te ha’amāu’a nei ’oe i tō ’oe taime i te fare ha’api’ira’a ’e tē fa’ari’i nei ’oe i te mau nota ’ino mau, teie ïa ’ua fa’a’ohipa ’ino ’oe i tā ’oe ō. Mai te reira ato’a nō te hō’ē ta’ata e pūai tū’aro tōna ’e ’o tē fa’a’ohipa nei i tōna pūai nō te fa’ari’ari’a ia vetahi ’ē, ’aore rā nō te hō’ē ta’ata tei ha’amaita’ihia i te hō’ē huru fa’a’ārearea maita’i ’e ’o tē fa’a’ohipa nei i te reira nō te fa’aha’eha’a i te ta’ata (e rave rahi o tātou e ti’a ’ia ’ohipa i ni’a i te reira).

Tē hina’aro nei te Fatu ’ia rave tātou mai tā tātou e nehenehe—’e te reira ’ia fa’aauhia i tō tātou iho mau ’aravihi, ’eiaha rā i tō vetahi ’ē. Tei te huru o te ’aravihi tā tātou e paraparau nei, e nehenehe tō ’oe « maita’i roa a’e » e riro ’ei mea maita’i ’aore rā ’ei mea ’ino i te « maita’i roa a’e » o te tahi atu ta’ata. ’E mai te reira ihoā ! ’Ia māuruuru nō tō ’oe mau pūai ’e ’ia ha’eha’a i mua i tō ’oe mau paruparu, ’e ’a vaiiho i te Fatu ’ia tauturu mai ia ’oe ’ia tāpae i tō ’oe fāito pūai.