Te hihi mahana i roto i tō’u mau vero

’Aita i maoro a’enei, ’ua fa’aruru vau i te hō’ē tau fifi mau. ’Ua ta’a tō’u metua tāne ’e tō’u metua vahine, ’e tē ’ohipa nei tō’u metua vahine i te ara. ’Ua pa’ari au ’e tō’u māmā rū’au—nāna i fa’a’ite mai iā’u i te ’evanelia ’e i te ’Ēkālesia. I teie rā matahiti, ’ua fa’aru’e mai ’oia ma te mana’o-’ore-hia.

’O ’oia te ta’ata hope’a ’o tā’u i mana’o e pohe. I te tahi taime, ’ua mana’o vau ē e pohe au nā mua iāna nō te mea e ea maita’i roa tōna ! ’Aita roa ’oia i fa’a’ite mai i te paruparu ’e e mea pūai noa ’oia i mua iā’u. ’Aita roa atu vau i mana’o a’e i tō’u orara’a ’aita ’ōna.

I muri a’e i tōna pohera’a, ’ua hina’aro vau i te tahi taime e pohe ato’a. ’Ua mana’o vau e fa’aoti i tō’u iho ora. Ma’a taime rā i muri mai, ’ua haere atu vau i te hō’ē ’ātivite nā te feiā ’āpī o te titi, i reira ’ua fa’ari’i mātou i te hō’ē ha’api’ira’a nō ni’a i te fa’anahora’a nō te fa’aorara’a.

’Ua ’ite au te fa’anahora’a nō te fa’aorara’a, terā rā ’ua ’āno’ino’i ri’i paha tō’u māramarama nō te ’ohipa i tupu nō tō’u māmā rū’au. ’A fa’aro’o ai au, ’ua mana’o vau, « ’ua mo’ehia iā’u te mau ha’amaita’ira’a nō te tusia a Iesu Mesia nō’u ».

’Ua ’ite a’era vau ē ’ua pohe Iesu Mesia nō te fa’aora iā’u. E’ita e ti’a iā’u e rave fa’aoti i tō’u ora nō te mau fifi tā’u e fa’aruru nei. Tē hōro’a mai nei te fa’anahora’a nō te ’oa’oa iā’u i te tīa’ira’a ē, e nehenehe au e fārerei fa’ahou i tō’u māmā rū’au i te hō’ē mahana, nō te mea ’aita te ora e hope ’ia pohe ana’e tātou. E ti’a iā’u ’ia tāmau noa i te pe’e i te Fa’aora nō te fārerei fa’ahou iāna.

I muri a’e i te pohera’a tō’u māmā rū’au, ’ua haere mai tō’u tuahine fēti’i e fa’aea i tō’u fare ’e ’ua riro mai ’ei metua tīa’i nō’u. ’Ua riro tō’u mau tuahine fēti’i ’ei mau hoa maita’i roa a’e nō’u, terā rā e mea fifi roa te tauira’a. ’Ua tītauhia iā’u ’ia ha’api’i mai i te rave i te mau ’ohipa ato’a tā tō’u māmā rū’au i mātau i te rave. E ti’a iā’u iho e ara nō te haere i te fare ha’api’ira’a ’e ’ia ’atu’atu i te fare.

’Ua parau noa tō’u ’episekōpo nō ni’a i te fa’arava’ira’a iāna iho, nō reira ’ua mā’imi au nō te reira i roto i te Vaira’a buka ’evanelia. ’Ua tauturu te reira iā’u ’ia ha’api’i mai i te ’imi i te rāve’a nō’u iho.

Tē fārerei noa nei ā vau i tō’u metua tāne. I te hō’ē mahana, ’ua tātama’i māua. ’Ua fifi roa vau nō te reira, i muri mai rā ’ua fāna’o vau i te ’āmui atu nō te hō’ē tere i te hiero nā te feiā ’āpī. ’A vai ai au i roto i te hiero, ’ua fa’ari’i au i te hau. ’Aita roa vau i feruri i te mau fifi i te fare. ’Aita roa vau i feruri i te riri tā’u i fa’ari’i nō tō’u metua tāne. ’Ua feruri au i te mau mea tā’u e nehenehe e rave nō te tauturu iāna. ’Ua feruri au ’ia riro ’ei hi’ora’a maita’i. ’Ua feruri au i te mau mea mure ’ore, ’ia tā’atihia vau i tō’u nā metua i roto i te hiero i te hō’ē mahana. ’Ua fa’aoti au e tātarahapa i tō’u metua tāne nō te tātama’ira’a ’e ’ōna.

’Ua ha’api’i mai au i te rōtahi tāmau noa i ni’a ia Iesu Mesia ’e i te Metua i te ao ra. Tē fa’ari’i nei au i tō’u pūai nā roto mai ia rāua, ’e tē ha’amana’o nei au ē tē turu nei rāua iā’u.

Nā te hāro’aro’ara’a i te fa’anahora’a nō te fa’aorara’a, te tāra’ehara iho ā rā a te Fa’aora, ’ua tauturu iā’u ’ia upo’oti’a i ni’a i tō’u mau mana’o ’ōnohi. E tauturu te reira iā’u ’ia putapū i te hau i roto i te orara’a. E hōro’a mai te reira iā’u i te tīa’ira’a ē, e nehenehe au e fārerei fa’ahou i tō’u māmā rū’au i terā pae mai o te pāruru i te hō’ē mahana.

’O Iesu Mesia te tīa’ira’a ’ia tāmau noa tō’u ora, noa atu e mea rahi tō’u mau tāmatara’a. E’ita tōna here nō’u e fa’aea. ’O ’oia te hihi mahana i roto i tō’u orara’a. ’Ia tupu ana’e te vero ’aore rā te ua, tei reira ’oia. ’O ’oia tō’u Fa’aora. ’O ’oia tō’u fare. ’O ’oia tō’u ora. Nāna e fa’ahaere iā’u i mua. ’O ’oia te hō’ē o te mau tumu i here ai au i te ora.