I muri mai i teie orara’a
Pāhonora’a i te tahi mau uira’a
E nehenehe te fa’anahora’a a te Metua i te ao ra e hōro’a mai ia tātou i te hi’ora’a ātea ’e te hau nō te orara’a i muri mai i te pohe.
Fa’ahōho’ara’a nā Thomas Arnaud
E aha te ’ohipa e tupu i muri mai i tō tātou pohera’a ?
Pēnei a’e teie te tahi uira’a e vai nei i roto i te mau ha’apa’ora’a ato’a. Te mau pāhonora’a e vai nei nō tātou maoti Iesu Mesia ’e tāna ’evanelia, mea mana mau ïa. E ’ere teie orara’a i te hope’a. Maoti ’o Iesu Mesia i ti’afa’ahou mai, e nehenehe tō tātou vārua e tā’ati-fa’ahou-hia ’e tō tātou tino, ’e e ti’afa’ahou mai tātou pā’āto’a ’ia tae i te hō’ē mahana.
’Oia mau, tē vai rā te tahi atu mau ha’apāpūra’a nō te orara’a i muri mai i te pohe tei tae mai ia tātou nā roto i te heheura’a ’āpī, ’ō tē nehenehe e pāhono i te tahi atu ā o tā tātou mau uira’a. Teie te tahi o taua mau uira’a ra, ’e tae noa atu te tahi mau pāhonora’a poto.
E aha te huru o te tino vārua ?
E māteria te Vārua, terā noa rā « e mea maitaʼi roa aʼe e ʼaore rā e mea āteate roa aʼe » (Te Ha’api’ira’a Tumu ’e te mau Fafaura’a 131:7). E hōho’a te tino vārua mai te tino ta’ata pa’ari.
Tei hea te ao vārua ?
E aha te mea e tupu nei i roto i te ao vārua ?
Ta’a ’ē i te tahi atu mau mea, ’ua fa’anahohia te mau vārua tei fa’ari’i i te ’evanelia nō te poro i te mau vārua tei ’ore ā i fa’ari’i i te ’evanelia. E nehenehe teie mau vārua e mā’iti i te fa’ari’i ’e ’aore rā i te pāto’i i te ’evanelia.
E aha te huru o te tino ti’afa’ahou ?
E’ita te mau tino ti’afa’ahou e pohe fa’ahou , e tino ’i’o ’e te ivi, ’e e tino maita’i roa. E mea hanahana rātou ’e te nehenehe nui. « ’Aita e mea nehenehe roa atu i te māta’ita’ira’a i te hō’ē tino ti’afa’ahou nō te tāne ’e ’aore rā te vahine. »
E aha te ’ohipa e tupu i roto i te bāsileia tiretiera ?
Te feiā e tāpae i roto i te fāito teitei roa atu o te bāsileia tiretiera, e riro mai ïa mai tō tātou Metua i te ao ra te huru ’e e ’ite rātou i te ’īra’a o te ’oa’oa. E hōro’ahia nō rātou te tā’āto’ara’a o te maita’i a te Metua. E ’āmui mai rātou i roto i tāna ’ohipa ’e tōna hanahana. ’Ua tā’atihia rātou i roto i te fa’aipoipora’a nō te tau mure ’ore ’e nō teienei, tē ora nei rātou ’ei ’utuāfare mure ’ore, ma te fa’ari’i i te mau tamari’i vārua mure ’ore nō rātou iho.
E aha ïa te parau nō te mau ta’ata tei ’ore e fa’aipoipo i roto i teie orara’a ?
E parauti’a hope roa tō te Metua i te ao ra ’e ’ua ’ī i te aroha. « ʼUa fafau te Fatu ē i roto i te mau tau mure ʼore ʼaore roa e haʼamaitaʼiraʼa e faʼaʼerehia i tāna mau tamāroa ʼe te mau tamāhine tei haʼapaʼo i te mau faʼaueraʼa, tei mau māite i tā rātou mau fafauraʼa ʼe tē hinaʼaro nei i te mea tiʼa. »
’Ua tā’atihia tō’u nā metua i roto i te hiero, i teienei rā, ’ua ta’a rāua. ’O vai tā’u i tā’atihia ?
’Ua « fānauhia ’oe i roto i te fafaura’a » (te aura’a, ’ua fānauhia i muri mai i tō te metua tā’atira’ahia i roto i te hiero), ’e ’aore rā ’ua tā’atihia ’oe i tō nā metua i roto i te hiero i muri a’e i tō rāua tā’atira’a i te tahi ’e te tahi. I nā vaira’a e piti, e mana noa ā tā ’oe ha’amaita’ira’a noa atu ’ua mā’iti tō ’oe nā metua ’ia fa’ata’a ia rāua ’e ’ia fa’a’ore i tō rāua tā’atira’a.
’Aita te mā’itira’a a tō ’oe nā metua e ha’ataui i tā ’oe mau ha’amaita’ira’a. Te mea faufa’a roa rā nō ’oe ’oia ho’i, ’ia ha’apa’o maita’i noa ’e ’ia ’imi i te mau ha’amaita’ira’a o te hiero nō ’oe iho. Nō te parau o tō ’oe aura’a ’utuāfare, e « ti’aturi i te Fatu ’e ’ia ’imi i tāna tāmāhanahanara’a », ma te ’itera’a ē « e ha’apāpū mai te Metua i te ao ra, e fa’ari’i te ta’ata tāta’itahi i te mau ha’amaita’ira’a ato’a e au i tōna mau hina’aro ’e tāna mau mā’itira’a. »
E aha tē tupu nō rātou tei pohe nā roto i te ’ōnohi ?
’Aita tātou i ’ite e aha tē tupu nō rātou tei pohe nā roto i te ’ōnohi, ’e e’ita tātou e nehenehe e ha’avā atu ia rātou (hō’ē ā ato’a i te mau ta’ata ato’a). « Noa atu te mau tauto’ora’a maitata’i roa a te feiā e here nei ia rātou, te mau ti’a fa’atere ānei, ’e te taote, e’ita te ’ōnohi e nehenehe noa e mitohia […]
« E ’ere i te mea tano nō te hō’ē ta’ata ’ia rave i tōna iho ora. Terā rā, ’o te Atua ana’e tē nehenehe e ha’avā i te mau mana’o, te mau ’ohipa ’e te fāito ti’a’aura’a o te hō’ē ta’ata (hi’o 1 Samuela 16:7 ; Te Ha’api’ira’a Tumu ’e te mau Fafaura’a 137:9) […]
« Te feiā tei roto i te ’ati pohe ’ōnohi nō te tahi hoa i herehia, e noa’a ia rātou te tīa’ituru ’e te rapa’aura’a i roto ia Iesu Mesia ’e tāna tāra’ehara. »