Te ’Evanelia a Iesu Mesia : E reo fa’aitoito
Nā te ’evanelia i fa’aho’i-fa’ahou-hia e fa’atae mai i te fā ’e te ’oa’oa ia ’oe, i ni’a i tō ’oe tere ē tae atu ai i te ora mure ’ore.
Light of Hope [Te māramarama nō te tia’iturura’a], nā Simon Dewey
’A tāvini ai au ’ei ti’a fa’atere misiōni i te fenua Tāpōnē tau matahiti i teienei, ’ua uiui au i te tahi ta’ata tei tomo mai i roto i te ’Ēkālesia i te matahiti nā mua atu, ’o tē hina’aro i te fa’ari’i i tāna parau fa’ati’a nō te hiero.
I roto i tā māua ’āparaura’a, ’ua fa’a’ite mai teie melo ’āpī i tōna māuruuru rahi nō te mau ha’amaita’ira’a tāna i fa’ari’i i roto i taua matahiti mai tōna bāpetizora’a mai ā. Nō’u nei, e fa’a’itera’a teie nō te tahi ti’aturira’a fafaura’a nō roto mai i tōna māramaramara’a i te ’evanelia, tei a’a-hōhonu-roa i roto iāna. E pipi fa’afāriuhia ’oia nā Iesu Mesia tei ’ite i te tauira’a rahi o te ’ā’au (hi’o Mosia 5:2).
I muri mai i te uiuira’a, ’ua parau vau i te peresideni mata’eina’a i tō’u fa’ahiahia i te mea ē, ’ua ’itehia mai e te mau misiōnare ’e te mau melo iāna, ’e ’ua fa’a’amuhia ’oia i te pae vārua, e ta’ata fa’ahiahia teie ma te fāito pūai mau.
’Ua māere roa vau i te ’itera’a ē, i te ha’amatara’a teie ta’ata i te fārerei i te mau misiōnare ’e tōna haerera’a mai i te purera’a, e ta’ata nohora’a ’ore ’e tei roto i te tahi huru orara’a e ’aita tōna ’ananahira’a. Nā te ha’api’ira’a i te ’evanelia ’e tōna fa’afāriura’a ’a tau ’āva’e noa te maoro, tei arata’i i te semeio nō tōna tauira’a, ’o tei tu’u iāna i ni’a i te ’ē’a nō te fa’arava’ira’a iāna iho i te pae vārua ’e i te pae tino, ’e te ’oa’oa rahi.
’Ua hōro’a te ’evanelia i teie nei taea’e i te tahi hi’ora’a pāpū i te tumu o tōna orara’a. ’Ua horo’a te mau parau mau pāpū ’e te faufa’a rahi o te ’evanelia iāna i te mau pāhonora’a i te mau uira’a faufa’a roa o te tāhuti nei. E roa’a ato’a te reira mau ha’amaita’ira’a ia ’oe ’e i te mau tamari’i ato’a a te Atua nā roto i te ’evanelia a Iesu Mesia.
Te tumu o te orara’a
’Ua fa’aho’ihia mai te ’evanelia a Iesu Mesia nā roto i te peropheta Iosepha Semita. I roto i tōna ’itera’a pāpū hope’a i tō te ’Ēkālesia, ’ua parau te peresideni M. Russell Ballard (1928–2023), Peresideni mono nō te pupu nō te Tino ’Ahuru Ma Piti ’āpōsetolo, i teie parau :
« ’Ua ’ite tātou ’o vai te Atua ; ’ua ’ite tātou ’o vai te Fa’aora, maoti ’o Iosepha […]
« Tē māere nei au […] i tō tātou ha’amaita’ira’a ’ia ’ite i te mea tā tātou i ’ite nō ni’a i te fā o te orara’a, nō te aha tātou i’ō nei, ’e e aha te mea e mea maita’i tātou ’ia tāmata i te rave ’e i te fa’atupu i roto i tō tātou orara’a tāmahana. »
Nō te mau melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, tei roto i te reira ’ite te tahi māramaramara’a nō te « fa’anahora’a maita’i roa » a te Atua nō te fa’aorara’a, tei parau-ato’a-hia te « fa’anahora’a rahi nō te ’oa’oa », ’e « te fa’anahora’a rahi nō te aroha » (Alama 42:8, 11, 15). Nā te fa’anahora’a a te Atua « e fa’a’ore […] i te mau mea huna o te orara’a ’e te pāpū ’ore o tō tātou orara’a a muri a’e. » Te mea faufa’a ’e te pū rahi nō taua fa’anahora’a ra ’e te fā o te orara’a nei, ’o te « ha’api’ira’a tumu īa a te Mesia. »
Nā roto i te ’evanelia, tē ’ite nei tātou ē, e mau tamari’i tātou nā te Atua, tei tonohia i ni’a i te fenua nei ’ia tāmatahia ’e ’ia fa’aineinehia nō te ti’afa’ahou mai (hi’o Te Ha’api’ira’a Tumu ’e te mau Fafaura’a 76:39). ’Ua ’ite tātou i te mau fa’auera’a ’e ’ua ha’api’ihia tātou ’ia « ’ite i te maita’i ’e te ’ino » (2 Nephi 2:5). ’Ua ’ite tātou ē, tei ’ō nei tātou nō te here ’e nō te tāvini ’e ’ua pi’i te Fa’aora ia tātou ’ia upo’oti’a i ni’a i te ao nei ’e ’ia tauturu ia vetahi ’ē ’ia nā reira ato’a (hi’o Ioane 16:33).
Tā Iosepha Semita i parau na « te reo fa’aitoito o te ’Evanelia a tō tātou Fatu ’o Iesu Mesia », e ha’apūai ïa te reira ia tātou i te mau mahana e fifi ai, ’e e hōpoi mai te reira i te aura’a ’e te ’ōpuara’a nō tātou ’e nō vetahi ’ē.
Te ha’apa’ora’a ’e te mau ha’amaita’ira’a
’Ua hōro’a mai te Atua ia tātou nei i te ti’amāra’a mōrare ’ia ti’a ia tātou ’ia amo i te hōpoi’a nō tā tātou mau mā’itira’a (hi’o Te Ha’api’ira’a Tumu ’e te mau Fafaura’a 101:78 ; hi’o ato’a 2 Nephi 2:16). ’Ei tuha’a nō « nā pae e piti i te mau mea ato’a » (2 Nephi 2:11), ’ua fa’ati’ahia ’o Sātane ’ia fa’ahema ia tātou ’ia fa’a’ohipa hape i tō tātou ti’amāra’a.
I teie mahana, ’ua pi’i te Fatu ’o Iesu Mesia ia Iosepha Semita « ’e ’ua parau atu ra iāna nā roto mai i te ra’i, ’e ’ua hōro’a atu ra i te mau fa’auera’a iāna ra » (Te Ha’api’ira’a Tumu ’e te mau Fafaura’a 1:17). Tē tāmau noa nei te Fatu i te heheu mai i tāna mau fa’auera’a ’e tōna hina’aro i tāna mau peropheta i teie mahana nō te mea tē hina’aro nei ’oia e arata’i ia tātou i te ’oa’oa i roto i teie orara’a ’e i te hanahana tiretiera i roto i te orara’a a muri atu.
Tē ha’api’i ra te ari’i Beniamina i te mau ’āti Nephi, nā Gary L. Kapp
Teaching True Doctrine [Ha’api’i i te ha’api’ira’a tumu], nā Michael Malm
Joseph Smith Preaching [Iosepha Semita e ha’api’i haere ra], nā Sam Lawlor
E tae mai te ha’apa’ora’a i te mau fa’auera’a a te Atua nā roto i tō tātou itoito ’e tō tātou here iāna. ’Ua ha’api’i te Fa’aora : « ’Ua hina’aro ’outou iā’u ra, e ha’apa’o i tā’u parau » (Ioane 14:15). Te hope’ara’a hope nō te fa’a’itera’a i tō tātou here i te Fatu nā roto i te ha’apa’ora’a i tāna mau fa’auera’a, ’o te mau ha’amaita’ira’a ïa e hōpoi mai i te poupou ’e te ’oa’oa (hi’o Te Ha’api’ira’a Tumu ’e te mau Fafaura’a 130:20–21).
Ma te hi’ora’a ātea pāpū maita’i i tō tātou tumu hanahana ’e tō tātou hope’ara’a hanahana, ’ua ’ite tātou ē « te mau mea mau ’o tē fa’ariro i tō [tātou] orara’a i te tahuti nei ’ei mea maita’i roa atu, ’o te mau mea ato’a ïa ’o tē fa’ariro i tō [tātou] orara’a i te tau a muri atu ’ei mea maita’i roa atu ā ! »
’Oa’oa i roto i tō ’oe tere
Te melo fa’afāriu ’oa’oa tā’u i fārerei i te fenua Tāpōnē ra e rave rahi matahiti i ma’iri a’enei, ’ua ’itehia mai ïa iāna te ’evanelia a Iesu Mesia tei fa’aho’i-fa’ahou-hia mai, ’aua’a a’e maoti tōna iho itoito ’e te itoito o te mau misiōnare ’e o te mau mero. ’Ua ’itehia iāna tāna fā ’e ’ua fa’a’ā’ano i tōna ’itera’a ātea nō te fa’anahora’a rahi nō te ’oa’oa, tei hōpoi mai i te mau ha’amaita’ira’a ’e te ’oa’oa tei fa’ateitei iāna i te pae tino ’e i te pae vārua ho’i.
Nā Elder Patrick Kearon nō te pupu nō te Tino ’Ahuru Ma Piti ’āpōsetolo e ha’api’i nei ē :
« Maoti te fa’anahora’a here a tō tātou Metua i te ao ra nō tāna mau tamari’i tāta’itahi, ’e maoti te ora ’e te misiōni tāra’ehara a tō tātou Fa’aora ’o Iesu Mesia, e ti’a ia tātou—’e e mea tano ho’i—’ei feiā ’oa’oa roa a’e tātou i ni’a i te fenua nei ! Noa atu te mau vero o te orara’a, i roto i te tahi ao pinepine i te ti’arepu, ’o tē tūpa’ipa’i i ni’a ia tātou, e nehenehe tātou e ’atu’atu i te mana’o nō te ’oa’oa ’e nō te hau i roto, ’o tē tupu noa ’e ’o tē tāmau noa, maoti tō tātou tīa’iturura’a i te Mesia ’e tō tātou māramarama i tō tātou iho pārahira’a i roto i te fa’anahora’a nehenehe nō te ’oa’oa. »
Tē pūpū nei au i tō’u māuruuru, ’e tō’u ’itera’a pāpū nō, te ’evanelia a Iesu Mesia tei fa’aho’i-fa’ahou-hia mai ’e te fa’anahora’a rahi nō te ’oa’oa. Tē ani nei au ia ’outou ’ia ’amu i te mau hotu o te ’evanelia ’e ’ia fa’ari’i i te ’oa’oa rahi atu i roto i teie tere nō ’outou i te ora mure ’ore.