’Āparau ana’e nō te moni !

’Ua ’ite ’o Iesu ē, ’ua rahi te mau mea e tītauhia nō ’oe (mai te mā’a) ’e ’o tā ’oe ato’a e hina’aro (mai te mau ha’uti ānei). Tē ha’api’i nei ’oia ē : « E ha’apu’e rā i te tao’a nā ’outou i ni’a i te ra’i, i te vāhi e ’ore e pau ai i te huhu ’e te pē » (Mataio 6:19–21). Te rahira’a tao’a tā te moni e ho’o, e mōrohi ïa, nō reira, ’a feruri maita’i i te mea tā ’oe e ho’o mai.

E nehenehe ’otuou e feruri maita’i i te moni mai te peu e fa’ata’a ’oe i tā ’oe mau tītaura’a ’e te mau hina’aro. ’A feruri i roto ia ’oe iho : « Tē ho’o ra ānei au nō te mea e tītaura’a ’e ’aore rā e hina’aro ? » ’Aita ana’e ’oe e pāpū, tāmata e tīa’i hō’ē ’āva’e ; ’ia ma’iri taua taime ra, e ui fa’ahou atu ai taua mau uira’a ra. ’Ia nā reira ’oe, e’ita ’oe e ho’o haere noa i te mau tao’a faufa’a ’ore, ’e ’aore rā nō te fa’a’oru noa i mua i te ta’ata. Terā rā, e rave ’oe i te mau fa’aotira’a māramarama maita’i nō te fa’aherehere ’e nō te ho’o i te tao’a ma te feruri māite.

I roto i te parabole nō te mau tārēni, tē fa’a’ite nei ’o Iesu i te parau nō te tahi Fatu ’ohipa tei hōro’a i te tahi fāito moni (pi’ihia « tārēni ») i nā tāvini e toru. E piti tāvini tei fa’ahotu tāta’i piti i te moni i hōro’ahia ia rāua, ’e hō’ē rā tāvini tei huna i taua moni ra. ’Ia ho’i mai rā teie Fatu, ’ua rahi te ’oa’oa i nā tāvini e piti tei fa’ahotu i tā rāua mau tārēni ’are’a rā ’ua māuruuru ’ore ’oia i te tāvini i ’ore i fa’ahotu (hi’o Mataio 25:14–30).

’Ia au i te fatu o teie parabole tei hōro’a i tāna nā tāvini i te mau tārēni, ’ia ha’amaita’i ana’e te Atua ia ’oe i te tahi tuha’a moni, tē tīa’i nei ’oia ē ’ia fa’a’ohipa ’oe i tā ’oe faufa’a nō te ha’amaita’i ia ’oe ’e ia vetahi ’ē. ’A ha’apa’o ai ’oe ia vetahi ’ē, tē fa’atupu ra ïa ’oe i te fa’auera’a a Iesu ’ia « aroha atu ’oe i tō ta’ata tupu mai tō aroha ia ’oe iho na » (Mareko 12:31).

’Aita e fifi ’ia ho’o mai ’oe i te mau mea nehenehe, ’ia feruri māite rā ’oe i te mau hina’aro nō ’oe iho ’e nō vetahi ’ē hou ’a ho’o mai ai. ’A feruri noa ai ’oe i te mau hina’aro a vetahi ’ē, e tauturu mai te Atua ia ’oe ’ia ’ite e nāhea i te fa’a’ohipa i te moni nō te ha’amaita’i i te mau ta’ata i roto i tō ’oe orara’a.

Mai te mea tē ha’ape’ape’a nei ’oe ’aita tā ’oe moni e nava’i ra nō te mea ’ua ’aufau ’oe i te tuha’a ’ahuru, ’a tai’o i teie mau parau tāmāhanahana a te Atua : « E hōpoi mai na ’outou i te ’ahuru ato’a o te mau tao’a i roto i te fare vaira’a […] e tāmatara’a te reira iā’u nei […] te ’orera’a vau i te ’īritira’a i te mau ha’amāramarama o te ra’i ra, ’a nīni’i atu ai i te tao’a rahi roa ’ei maita’i nō ’outou » (Malaki 3:10). Mai te mea, e ’aufau ’oe i tā ’oe tuha’a ’ahuru, e ha’amaita’i mai te Atua ia ’oe hau atu i tā ’oe e nehenehe e feruri !

E’ita paha ’oe e ha’amaita’ihia i te pae mātēria—e’ita paha tā ’oe e moni nō te ho’o mai i terā piriaro moni rahi mai tā ’oe e hina’aro nei, e ti’a paha ia ’oe e ha’ataime i terā ha’amāu’ara’a. E ha’amaita’i rā te Fatu ia ’oe. I te roara’a o te tau, e ’ite ’oe ē e mea ’ōhie a’e te ’aufaura’a i te tuha’a ’ahuru, ’e e rahi atu ā te ’āteura’a o tō ’oe vārua i mua i tō ’oe mau ha’ape’ape’ara’a pae moni.

’A ti’aturi i te mau parau a te peresideni Russell M. Nelson : « ’Aita e ’ōti’a tō te ’aravihi o te Fa’aora nō te tauturu ia ’oe » (’āmuira’a rahi nō ’Ātopa 2024 [Liahona, Novema 2024, 122]). Maoti te feruri-maita’i-ra’a e nāhea i te fa’a’ohipa i tā ’oe moni nō te pāhono i te mau mea e tītauhia nō ’oe, nō te aupuru ia vetahi ’ē ’e nō te ’aufau i tā ’oe tuha’a ’ahuru, e ’itehia mai ia ’oe te here hōhonu roa nō te Atua ’e nō vetahi ’ē, ’e te māuruuru nō te mea tā ’oe i fa’ari’i.