’Ia riro ana’e te mau tamāra’a ’e mea rarahi mau
E tuha’a te mau tāmatara’a nō te orara’a. Nā roto rā i te tauturu, e nehenehe tātou e hi’o i te reira nā roto i te hi’ora’a ātea o te Atua.
Te mou’a Timpanogos e mou’a ïa nō Utaha i Marite, e 3 353 mētera te teitei ’e ’ua ’ī i te topara’a pape, te mau papa’i ’ōfa’i, te mau vāhi matie ’e te mau ’ānimara ’ōviri. Te ti’ara’a i te tumu o te hō’ē mou’a mai teie te huru, e nehenehe e fa’ariro ia ’oe ’ei mea na’ina’i. E’ita ’oe e nehenehe e hi’o i ni’a a’e ’aore rā ’ati a’e i te reira. E nehenehe te reira e riro ’ei mea rarahi mau ’e e’ita e ti’a ’ia pa’i’uma.
Teie rā, hō’ē tere 10 minuti nā ni’a i te pere’o’o mai te mou’a Timpanogos, e fa’ati’a ia ’oe ’ia hi’o ta’a ’ē i te reira. Nā te reira hi’ora’a, e nehenehe ’oe e ’ite i te mau ’ē’a ’e te mau porōmu ’o tei tāpūhia nā roto i te mou’a. Tē fa’a’ite nei teie mau ’ē’a ē ’ua nā reira ato’a mai vetahi mau ta’ata nā mua atu ’e tē vai ra hō’ē rāve’a pāpū maita’i nō te haere atu nā roto ’e ’ia hā’ati i te mou’a.
Mai te reira ato’a te mau tāmatara’a tā ’oe e fa’aruru nei i teie taime i roto i tō ’oe orara’a. Te fa’arurura’a i te mau tāmatara’a fifi mau e au ra ïa mai te hi’ora’a i te mau mou’a rarahi mau, ’o tā ’oe e ’ore e nehenehe e hi’o i ni’a mai ’aore rā ’oia ato’a ’ati a’e i te reira. E au ra te reira e mea rarahi mau ’e e’ita roa e nehenehe e upo’oti’a. E nehenehe ato’a teie mau tāmatara’a e fa’ariro ia ’oe ’ei mea na’ina’i, e fa’a’ere, e fa’ari’ari’a, ’aore e vai ’ōtahi noa.
Teie rā te tahi ’ohipa e tāmata. ’A rave i te taime nō te fa’afa’aea ri’i ’e ’a tāmata i te hi’o i tō ’oe mau tāmatara’a ma te hō’ē hi’ora’a ātea ta’a ’ē—te hi’ora’a ātea a te Atua.
Ma teie hi’ora’a ātea, e nehenehe ato’a ’oe e ’ite ē ’aita ’oe i vaiiho-’ōtahi-hia nō te fa’atītī’aifaro i tō ’oe mau fifi. E Metua i te ao ra tō ’oe tei here ia ’oe ’e ’o tē tauturu ia ’oe. Vetahi atu, te Fa’aora iho ā rā ’ua nā roto ato’a i te mau taime fifi. Tē hina’aro nei rātou e hōro’a ia ’oe i te arata’ira’a ’o tā ’oe e hina’aro nō te upo’oti’a i tō ’oe mau tāmatara’a, tae noa atu te mea rarahi mau.
Nāhea tātou ’ia taui i tō tātou hi’ora’a ātea ?
1 ’A pe’e i te fa’anahora’a a te Metua i te ao ra.
’O Iesu Mesia tō tātou hi’ora’a maita’i a’e. Te mau parau tumu tāna i ha’api’i e mea ’ōhie ïa, e mea pūai ’e e mea ’ōhie ’ia māramarama. Tē parau ra ānei te reira ē e mea ’ōhie noa ’ia pe’e ? ’Aita roa ïa. ’Aita i te mau taime ato’a. Tēra rā i te mau taime ato’a ’a pe’e tātou iāna ma te fa’aro’o, e ha’amata tō tātou hi’ora’a ātea i te taui. E ha’amata tātou i te hi’o i te mau tāmatara’a mai te mau rāve’a nō te toro atu i te rima i te Fa’aora ra, ’eiaha rā ’ia hi’o i te reira mai te fa’autu’ara’a, te herepata, ’aore rā te mau fifi ’o te fa’aātea ’ē ia tātou.
2 ’A ani te tauturu i te Atua.
’O te Atua tō tātou Metua i te ao ra. ’Ua ’ite maita’i ’oia ia ’oe, ’ua here ia ’oe ’e ’ua ineine nō te tauturu ia ’oe i te mau taime ato’a ’a ani ai ’oe iāna. ’Ua ha’api’i te peresideni Russell M. Nelson ē « e nā ni’a a’e te hi’ora’a a te Fatu i tō [’oe] pa’ari tāhuti nei. E nehenehe [’oe] e māere i tāna pāhonora’a i tā [’oe] mau pure ’e e tauturu ia [’oe] ’ia feruri tiretiera ».
’Ia pure ana’e ’oe, e nehenehe te Atua e tauturu ia ’oe ’ia hi’o i te mau mea ’o tā ’oe e ’ore e nehenehe e hi’o i teienei. E nehenehe ’oia e arata’i ia ’oe nā roto i tō ’oe mau tāmatara’a ’e e hōro’a ato’a ia ’oe te hau ’e te pūai ’a pe’e ai ’oe iāna.
3 ’A ani i te tauturu ia vetahi ’ē.
’Ua tu’u te Metua i te ao ra i te mau ta’ata maita’i i roto i tō ’oe orara’a ’o tē nehenehe e tauturu ia ’oe. ’Ia fa’aruru ana’e ’oe i te mau tāmatara’a e fā mai ra i mua ia ’oe, ’a feruri i te ’āparau atu i te hō’ē melo o te ’utuāfare ’o tā ’oe e ti’aturi nei, te hō’ē hoa, te hō’ē ti’a fa’atere o te ’Ēkālesia, ’aore rā i tō ’oe ’episekōpo.
’A ani i te hō’ē taea’e ti’amā tei mau i te autahu’ara’a i te hō’ē ha’amaita’ira’a tāmāhanahana ’e te arata’ira’a, ’o te tahi atu ïa rāve’a fa’ahiahia nō te hi’o ia ’oe iho ’e te orara’a nā roto i te hi’ora’a ātea a te Atua.
Hi’o māramarama maita’i
Mai te hō’ē mou’a rarahi mau e ti’a ra i ni’a i tō ’oe ’ē’a, i te tahi taime e nehenehe tō ’oe mau tāmatara’a e riro e mea rarahi mau. Terā rā ’a ora ai ’oe i te fa’anahora’a a te Atua ’e e vaiiho ai iāna ’e ia vetahi ’ē e tauturu ia ’oe, e nehenehe ’oe e hi’o ta’a ’ē i tō ’oe mau tāmatara’a.
E nehenehe ’oe e fa’afa’aea ri’i ’e ’ia hi’o ē tē vai ra hō’ē rāve’a nō te upo’oti’a i ni’a i tō ’oe mau tāmatara’a. Tē fa’a’ite nei Iesu Mesia i te hō’ē ’ē’a ’o tā ’oe e nehenehe e rave. Noa atu te rahi o tō ’oe mau tāmatara’a, e mea pūai a’e te Atua.