Tei pīha’i iho noa te Atua ia ’oe

I te va’ura’a o tō’u matahiti, ’ua fārerei te mau misiōnare i tō’u māmā rū’au ’e tō’u metua vahine fēti’i i ni’a i te purūmu. I muri a’e i te ha’api’ira’a mai nō ni’a i te ’evanelia, ’ua bāpetizohia mātou pā’āto’a. Teie rā i te matahiti 2020, ’ua tītauhia ia mātou ’ia fa’aea i te haere i te purera’a nō te ma’i COVID. I te pae hope’a ’ua fa’aea mātou i te ti’aturi.

E piti matahiti i ma’iri, ’aita roa vau i ti’aturi i te Atua ’aore rā i ’ite ē e mea mau ānei ’oia. I te hō’ē mahana i muri a’e i te ha’api’ira’a, ’ua hina’aro vau e haere i terā pae mai o te purūmu nō te ho’o mai i te hō’ē ’amu’amu. ’Ua parau mai rā te hō’ē reo iā’u ’eiaha e haere i terā pae mai o te purūmu. ’Ua fa’aea vau ’e ’ua ū e piti pere’o’o i mua maita’i iā’u. ’Āhiri au i haere i terā pae mai o te purūmu, e ūhia vau e te mau pere’o’o ’aore rā e pohe roa paha. I reira tō’u ’itera’a ē ’ua ’ite maita’i te Atua iā’u ’e ’ua here iā’u. Noa atu ’aita vau i ti’aturi iāna ’e ’aita vau e haere nei i te purera’a i taua taime ra, ’ua here noa ā ’oia iā’u ’e ’ua pāruru iā’u.

’Ua ha’amata fa’ahou vau i te tai’o i te Buka a Moromona ’e ’ua ta’a iā’u ē e parau teie nā te Atua. ’Ua ha’amata ato’a fa’ahou vau i te haere i te purera’a. ’Ia haere ana’e au i te purera’a, e fa’ari’i au i te hau, te here o te Atua ’e tāna tauturu. E putapū vau ē tei pīha’i iho noa ’oia iā’u, ’e e fa’a’oa’oa te reira iā’u.

Tā’u hīmene au roa a’e ’oia ho’i « E tamari’i au nā te Atua », nō te mea tē fa’aha’amana’o mai nei te reira iā’u ē, tē here nei te Metua i te ao ra ia tātou ’e tē tauturu nei ia tātou. E mea au ato’a nā’u te pāpa’ira’a mo’a 2 Nephi 2:27, ’o tē parau nei nō ni’a i te ti’amāra’a ’ia mā’iti i rotopū i te maita’i ’e te ’ino.

E rave rahi ’āva’e i ma’iri a’enei, ’ua ha’amata tō’u taea’e i te haere mai i te purera’a nā muri iā’u, i muri a’e ma’a taime ri’i ’ua fa’aea ’oia. Tē ha’ape’ape’a nei ’oia nō te mea tā tōna mau hoa ’e tā vetahi ’ē e mana’o ra nōna. Tē mana’o nei ’oia e mea ha’amā ’ia haere i tā tātou ’ēkālesia, ’ua parau rā vau iāna ē e ’ere i te mea faufa’a te mana’o o te mau hoa. Te mea faufa’a ’o te mea ïa tā te Atua e mana’o ra.

’Aita tō’u ’utuāfare e haere nei i te purera’a. ’O vau ana’e tē haere nei. Nō te mea ’aita e pere’o’o utara’a ta’ata i tō mātou aroā nō te haere i te fare purera’a a te ’Ēkālesia, e haere ’āvae au fātata e 30 minuti nō te tae atu. Tē ha’ape’ape’a nei tō’u ’utuāfare nō te mea tā te ta’ata e mana’o nei nō rātou, tē parau nei rā vau ’aita te reira i te mea faufa’a nō te mea ’ua ’ite au e parau mau te reira.

’Ia fārerei ana’e au i tō’u mau hoa, i te tahi taime e inu rātou i te taofe. ’E ’ia ’ite ana’e au i te reira, i te tahi taime e hina’aro ato’a vau e inu i te taofe. E ha’amana’o rā vau ē tei pīha’i iho te Atua iā’u. Tē tāpe’a nei ’oia i tō’u rima ’e tē tauturu nei iā’u. E fa’aro’o vau i te hō’ē reo e parau mai ra iā’u ’eiaha e rave i te reira, ’e ’ua ’ite au ē tē tauturu nei te Atua iā’u ’ia upo’oti’a i ni’a i teie mau tāmatara’a.

Mai te mea e ti’a iā’u e hōro’a i te parau a’o i te hō’ē ta’ata i roto i tō’u vaira’a, e parau atu vau iāna ’ua ha’amaita’i-rahi-hia ’oe ’e e fa’aro’o rahi tō ’oe. ’Aita ’oe i vai ’ōtahi noa, nō te mea e nehenehe te mau melo o te ’Ēkālesia ’e te mau misiōnare e hōro’a ia ’oe i te mau parau a’o maita’i. ’Ua here te Atua ia ’oe. E tamaiti ’aore rā e tamāhine ’oe nāna ’e tē hina’aro nei ’oia e tauturu ia ’oe.